نصايح ذهبية وسهلة لشعري صحي

مسا الورد صبايااا
من فترة قصيت شعري وندمت ومن يومها وانا بدور على افضل الطرق لتطويل وتكثيف الشعر وحبيت فيدكن بتجربتي
اولا: حمام الزيت
افضل الزيوت للشعر زيت اللوز الحلو وزيت جوز الهند اما زيت الزيتون ما كتير يفيد متل ماهو شايع لان الجزيئ تبع زيت الزيتون اكبر من انو يمتصمو الشعر او البشرة بشكل كبير
وملاحظة هااااامة : لا يوضع حمام الزيت على الفروة بل على الشعر بعد سانتي من الفروة حتى ما يسكر المسام وبالتالي يسقط الشعر عالتكرار
تانيا :شطف الشعر بمي باردة اخر شطفة ويفضل ماء معدنية لان مافيا الكلور الموجود بمي الحمام
تالتا : البابونج للشعر الفاتح او الميرمية للشعر الغامق
يغلي ويصفى ويوضع ببخاخ ومنحطا بالثلاجة ومنبخ منها على فروة الشعر والشعر كل يوم كم بخة والشعر يصير روعة والبابونج بيعمل لون الشعر الفاتح خيال
رابعا : الالوفيرا لفروة الراس تخفف الحكة او الحساسية اذا في حكة وتريح البشرة بس كمان ما نكتر عدد المرات لان بتتسكر المسام اذا كتير كررنا العملية ولوقت طويل
خامسا : البيض وصفار البيض تحديدا رائع للشعر ونزلت الوصفة المرة الماضية وفرقت شعري عليها جداااا بس الريحة للصراحة مزعجة بس اذا بتتحملي الريحة ف رووووعة مرة كل اسبوع ماسك صفار بيض وموزة لمدة شهر بيصير الشعر خيال
سادسا : ما نحط الشامبو مباشرة عالفروة نحاول نحط معو شوية مي وبعد نحطو عالرأس حتى نخفف المواد الكيماوية قد ما فينا
سابعا : تدليك فروة الراس ( مو حك تدلللليييك ) كل يوم شي اربع خمس دقايق بحركات دائرية حتى يوصل الدم للراس وتتغذى الجذور بالفيتامينات اللازمة الموجودة بالدم
هي شوية نصائح عم اتبعا وعنجد فرقت شعري عليها وصار حيوي وانشالله كون فدتكن 🌹