قصة طلاقي ~ .. او ظلمي !💔
مساء الخير بنات اخباركم ..
كلكم طلبتوني قصه موضوعي هذا
تطلقت !

وتوني افضى اكتبها
بداية الحمدلله على كل شيء
قصتي يا اخواتي ان ام زوجي لها مواعيد كثير لانها مريضه بأكثر من مرض وكثيره مراجعاتها ومره تجي عندي ومره عند بنتها ( هي برا المدينه اللي احنا فيها )
كل مره تجي والله يابنات والله يشهد على ما اقول اعاملها زي امي واخاف الله فيها وفي نفسي وفي عيالي مستقبلاً ..
اقوم ٩ الصبح يومياً اسوي فطور و١٢ الظهر الغداء جاهز و ٩ بالليل العشاء جاهز غير القهوه والحلا والشاي ( يومياً ) .. الحلا مو يوميا بس ك تغيير عن التمر ..
آخر مره جتني قبل اسبوع تقريباً ..
وش اسوي لك فطور ياخاله ؟ مابي شيء نفسي منسده يابنتي .. وش اسوي لك غداء ياخاله ؟ مابي شيء نفسي منسده يابنتي ( ومع ذلك اسوي غداء لي انا وزوجي بس هي ماتجي تتغداء معانا ) وش تبين عشاء ياخاله نفس الكلام .. من يوم جت لين طلعت ماتاكل غير الخبز والجبن الا مره اكلت معنا حلا وفطاير ومره تعشينا من مطعم اكلت معنا ومره عشاء انا سويته
طبيعي بتنسد نفسها عن الاكل حرمه كبيره فيها سكر وضغط وعيونها تعبانه وتاكل من مطاعم اكل دسم مايناسب عمرها والمستشفى عشان كذا اتوقع تتعب جهازها الهضمي مايستقبل هالنوع من الاكل جسمها يحتاج خضار فواكه ورقيات الكبار يحتاجون حجامه عن الاكلات السريعه والدسمه ..
عموماً .. مرت الايام وجاء اليوم اللي تبي تروح بيتها فيه وانا رحت معها عشان بشوف ابو زوجي واسلم عليه من زمان عنه ..
جلست يوم بس ورجعت والمغرب من بكرا مشيت على طول لان عندي موعد تجديد بطاقة احوال وضروري ارجع ..
عموماً من بكرا الصبح الساعه ٨ ونص تماماً ..
وزوجي منشغل بالجوال ومركز فيه اكثر من الطريق
وفجأه لف علي من غير اي سبب قال تدرين شلون؟ خلي اهلك يودونك الاحوال وانتي طالق ....
يابنات قسم بايات الله العظيم ماضايقته ب اي شيء ولا غصبته يوديني ولا اي شيء ..
قلت ايش ؟ طبعاً ما استوعبت الموضوع انا بس طال الحديث وقال اختي فلانه بأسمها ناشبه في حياتي ومأذيتني وكل شيء تسوينه انتي تشوفه غلط وسكت
قلت حسبي الله عليها انا وش سويت لها !!
وانا حرفياً ماقد سويت لها اي شيء الحرمه نظامي اصلا مع حمولتي السلام عليكم ورد السلام لا اكثر ولا اقل ، ورسميه معهم لأن اعرف انهم شر قد صار لي مواقف معهم ولا عمري تكلمت لزوجي او شكيت له يبوني اشكي له عشان تصير مني الزله .. بس انا مطننششه وصرت اقلل روحاتي كثير عشان افتك من غثاهم
عموماً .. انا جلست ادعي عليها بالسياره ( ع اخته )
وقلت له والله ما اتركم من دعائي والظلم ظلمات يوم القيامه وهو قال لي بوديك البيت تاخذين اغراضك وتروحين اهلك
كلمت ابوي انا وقلت له السالفه وجيت لقيته لابس بدلة الدوام وجاي عشاني من الدوام يابعد عيني يابوي
وجلس يسولف علي ويقول شكلك اخطيتي على امه يابنتي ووضحت له وقال بقريح وصكيه بلوك بالواتس اب وبكل مكان خليه يحتار مايدري وش يسوي ولا يدري وش قاعده تسوين انتي .. قلت ابشر وسويت كل اللي يبيه ابوي وطبعاً الاب دايم عنده حكمه في هالاشياء لان الرجال يعرفون بعض .
يابنات انا قريت محادثة اخته امها تقول لها اني انا ما اسوي غداها ولا اسوي عشاها ولا افطرها ولا اسوي لها قهوه وزوجي بالمحادثه كان يدافع عني بشكل كبير مع انه ضعيف شخصيه عند خواته .. لكن كان يدافع انا اذكر كان كاتب امي تقول انا مابي اكل انا تعبانه انا اكلت توست انا انا ماقصرت ام فلان معها اللي هي انا ..
الحين ي بنات لي ٤ ايام عند اهلي ولحد الحين ماشلت البلوك ، صراحه منقهره بس احاول اني ما اقهر نفسي على انسان تافه يدري وش مسويه انا ويسمع كلام ماما وخيتو .. حاقده عليه قد الدنيا
وادري انه نااااادم قد شعر راسه من حالته وصورة العرض بالواتس اب وشخصيته ضعيف شخصيه زي ماقلت لكم ويننننندم مره .. شالحل يابنات اجلس عند اهلي لين يكلمني واخلي البلوك ولا اشيله ولا انتظر يكلم ابوي ؟ ..اسفه ع الاطاله لكن ابيكم معي بالاحداث
10-08-2018, 09:36 AM
 
 

5.00

عدد التقييمات: 2
5
100%
4
3
2
1
لاتشيلينه خليه مدام بلكتيه لاتشيلة خليك حازمة شوي امشي ع كلام ابوك...قهر عيني عينك طلقك ومافي سببب قوووي
10-08-2018, 09:56 AM
 
 
يا الله والله انمغصت من القهر
الموقف نفسه يقهر طيب ليش يطلق ؟وهو يدافع عنك وشايف أنك صح يعني عشان عارف انك مظلومه الحل يطلق لاحول ولاقوة الا بالله
تدرين انتي غلطتي بإيش المفروض انك تطبخين لها حتى لو قالت ما ابغى جيبي الغدا لحدها ولو اني منك ادق على الام نفسها أقول انا قصرت معك بشي احرجيها خليها تأدب بنتها اذا هي جايبه الكلام من عندها و لأن بعض الأمهات يدورون الزله وياليتك بعد تنزلين بالسناب طبخك لهم اذا هم عندك بشوف ايش حجتهم استغفر الله صار لازم ادله عشان نثبت صدقنا<<مقهوره والله
سوي اللي قالك الوالد الله يحفظه لك ولا تنقهرين عليه أبدا خليه هو ينقهر
10-08-2018, 10:05 AM
 
 
ام سحاب900:
لاتشيلينه خليه مدام بلكتيه لاتشيلة خليك حازمة شوي امشي ع كلام ابوك...قهر عيني عينك طلقك ومافي سببب قوووي
حسبي الله عليهم 💔
10-08-2018, 10:18 AM
 
 
رشفة قهوة:
يا الله والله انمغصت من القهر
الموقف نفسه يقهر طيب ليش يطلق ؟وهو يدافع عنك وشايف أنك صح يعني عشان عارف انك مظلومه الحل يطلق لاحول ولاقوة الا بالله
تدرين انتي غلطتي بإيش المفروض انك تطبخين لها حتى لو قالت ما ابغى جيبي الغدا لحدها ولو اني منك ادق على الام نفسها أقول انا قصرت معك بشي احرجيها خليها تأدب بنتها اذا هي جايبه الكلام من عندها و لأن بعض الأمهات يدورون الزله وياليتك بعد تنزلين بالسناب طبخك لهم اذا هم عندك بشوف ايش حجتهم استغفر الله صار لازم ادله عشان نثبت صدقنا<<مقهوره والله
سوي اللي قالك الوالد الله يحفظه لك ولا تنقهرين عليه أبدا خليه هو ينقهر
انا اسوي الغداء يومياً لان انا وزوجي نتغداء بس هي اللي ماتجي تاكل معانا ..

امين ويحفظ لك غاليك ❤️
10-08-2018, 10:19 AM