..الولادة القيصرية

مرحبا خواتي الحوامل شلونكم وشخباركم اتمنى تكونوا بخير ياااارب ..
انا قبل فترة كنت كاتبة لكم تساعدوني بنصائحكم لان موعد ولادتي فات وماولدت وماقصرتو ولكن اسمعوا قصتي وساعدوني لاني تعبانة نفسيا وجسديا ساعدوني ولو بدعاء.. ياريت ماتخيبون ظني وتقرون قصتي الى النهاية ..
انا كان موعد ولادتي بتاريخ 1/10/2006 وماكان في ذاك اليوم اي بوادر ولادة بس رحت المستشفى وخبرتهم قالو لي اذا صار تاريخ 9/10/06 وماولدتي لازم تجين المستشفى حتى نسوي لك طلق صناعي .. بصراحة كنت خااايفة وصرت ادعي ربي في كل ساعة اني اولد طبيعي ومايجي تاريخ 9 الا وانا والدة..وصرت قاعدة على اعصابي ومحتارة وبيتنا يسألوني بتروحين او لا وانا محتارة مابين رأي مؤيد ورأي معارض الى ان قررت اني اذا ماولدت اسلم امري الى الله واروح يسون لي طلق صناعي كله ولا سلامة البيبي .. بس في تاريخ 7/10 كنت صاحية من النوم والا بالدم بنزل مني مرة وحدة ومن غير سابق انذار .. عرفت ان هذي اول اشارة من اشارات الحمل واول شي سويته حمدت ربي انه استجاب لدعائي وان شاء الله بولد طبيعي .. اللي صار ان بعد كم ساعة حسيت بآ لام ولأن هذا اول حمل لي رحت مع زوجي المستشفى على طول لأني ماعرف شو اسوي .. فحصتني الدكتورة اللي هناك وقالت لي انتي الحين 1 سم يعني توي البداية نصحتني اروح البيت ولما يزيد علي الالم ارجع .. رجعت البيت وصرت ادعي ربي تسهل ولادتي ويفرج علي والألم كل ماله ويزيد ويزيد بس الفترات ماكانت عشان جذي كنت متحملة الالم في البيت .. ثاني يوم زاد الألم علي ماكنت قادرة اتحمل قلت اروح المستشفى احسن .. رحت وفحصوني مرة ثانية وخبرتهم ان الالم عندي شدشد وموقادرة اتحمل فحصوني وقالو لي 1 سم .. قلت لهم مو معقولة مرت 24 ساعة والالم شديد بس مافي اتساع ؟؟ قالولي يصير .. ومن زود الآلام اللي عندي خلوني بالمستشفى عنهم وكل شوي يجون يفحصوني ومافي اتساع يعني شنو الحل صارو يطقون ابر وتحميلات واشياء ثانية وانا موعارفة حق شنو كنت بس ابي اخلص لأن الألم ذابحني .. العصر فحصوني قالو لي 3 سم وبعد ساعتين قالولي 5 وبعد ها بشوي قالو لي 7 سم وبعدين قالو لي 4.5 سم وبعدين 6 وبعدين 5 .. ومثل مانتو ملاحظين يصير عندي اتساع ويرد يرجع مرة ثانية وانا من زود ماسمع هالكلام تعبت اكثر واكثر .. لما سألتهم شلون قالو لي رحمش يصير فيه انقباضات كثيرة عشان جذي ماقاعد يستقر يتسع ويرد مرة ثانية .. يعني باختصار مرو علي يومين بالآلاااااام والوجع من غير فايدة.. وانا متحملة وكل ماتوجعت اكثر كل ماناجين ربي ودعيته اكثر انه يفرج لي .. في اليوم الثالث الصبح جت لي الدكتورة فحصتني وقالت لي مافي فايدة رحمك مافي اي تطور ان يستقر على اتساع احنا بنادي زوجك عشان يوقع على عملية قيصرية .. قلت امري الى الله المهم سلامة البيبي .. وودوني حجرة العمليات ودعيت ربي انه يسهل علي ويرزقني بنتي بصحة وسلامة والحمد لله بعد ساعة تقريبا خلصنا وكنت تعباااااااااانة ومو حاسة اني قادرة اسوي شي .. بعد ساعتين تقريبا صحيت من النوم .. حمدت ربي على كل حال..
بس المشكلة ان نفسيتي صارت سيئة الى ابعد الحدود واللي زاد عليها الم العملية والجرح اللي موجود فيني واللي ماقدر اتحرك منه .. ياسبحان الله منت دايما طول فترة حملي اتخيل ان يوم ولادتي واللي اشوف فيه البيبي بيكون اسعد ايام حياتي .. بس انا في هذا اليوم كنت تعبانة ومتضايقة وكنت اطالع البيبي واصيح احس اني مو قادرة اسوي له شي لاقدر اتحرك او ارضع او حتى ابوس البيبي ..
صرت اتصل على امي وخبرها اقول لها ساعدني موقادرة احس بالبيبي .. وكنت اصيح لان موحابة اول ايام بيني وبين البيبي تكون بهذا الشكل .. بس هذا اللي صار .. صرت ادعي ربي ان يفرج علي ويهديني والحمد لله بعد كم يوم حسيت اني احسن وعلاقتي مع البيبي احسن واحسن .. ومازلت ادعي ربي ان يهديني اكثر واكثر .. والحمد لله على كل حال ..
هذي قصتي يابنات ادري اني طولت عليكم فيها بس انا احب افضفض عندكم وتساعدوني .. انا كنت ايام حملي دايما اقرأ بالمنتدى عن الولادة وشلون احاول اساعد نفسي عشان تكون سهلة وشلون اهيئ نفسي وتمارين البطن والاكل واشياااااااء كثيرة بس ماخطر ببالي ان ولادتي بتكون بهذا الشكل .. الحمدلله الف مرة ..
الحين دوركم ياخواتي .. انا موعارفة اللي تولد بالقيصري .. شنو لازم تسوي شنو تاكل متى تسوي تمارين رياضية شنو يساعد على التئام الجرح وشنو وشنو وشنو ...
يعني يابنات ارجوكم اللي عندها اي معلومة حتى لو كانت صغيرة لاتستكثرها علي انا متأكدة ان اي معلومة بتفيدني .. وعسى ربي يفوقكم ياااااااااااارب ويعطيكم ماتتمنونه ويسهل عليكم ولادتكم يارب العالمين