حمله لمكافحة البطاله أتمنى من الجميع الدخول للفائده

ابي تكلم عن بدايتي وعقب راح اتكلم عن قصص البنات الي كملو من بعدي او تبعو نفس طريقتي

واكرر واقول والله الذي لااله الاهو اتمنى للجميع الخير والفائده

تخرجت انا واختي من الجامعه فكان اختي الله يسعدها دنيا واخره عندها حماس وطموح ماشالله لاقوة الابالله

فكانت كل يوم تزن على راسي انا وامي انا ماتخرجت من الجامعه علشان اجلس كذا انا لازم اشتغل انا وانا <<<مزعجه 😁

كانت كثير جلوس على الكمبيوتر وتابع المسلسلات الكوريه تقولي شوفي حماسهم على شغل شوفي وشوفي طبعاً انا نظام

تسليك لها المهم ماراح طول عليكم

هي تخرجت في شهر ٧ هجري شهر رجب فلاحظنها انا وامي دائم تكتب ملاحظات بس ماهتمينا لها.

لما صار شهر ١٠ هجري شهر شوال قالت ابي شريحه برغم عندها رقم خاص قلنا ليه وش تبين فيه قالت بشتغل

انا وامي وجيهنا كذا >>😳😳

وش الشغل قالت طباعه على تشيرتات انا بهذي الفتره كنت استلم حافز دفعه الاولى قبل ٣ سنوات وهي لانها توها خريجه لازم

تنتظر ٦ شهور علشان تقدم

المهم للامانه انا وامي كنا مره رافضين الفكره وماكنا متقبلين لها قالت انا استخرت ورتحت تكفون لا ترفضون ومن هذا الكلام

طبعا بحكم ماعندنا اخوان وابوي الله يرحمه كان تعبان ومايدري عن احد فكانت الكلمه مشتركه بينا

قلت انا وامي خلاص بس ماراح نتدخل فيك وغير كذا مانبي احد يعرف حتى صديقاتك

اصلن عطينها على جوها وكنا نسلك لها نسينا حكمة ربي اذا الشخص

تقرب له واصلحها معه راح يتوفق ويرزقه من حيث لا يحتسب

اشتغلت في طباعة التشيرتات برغم انها متعبه فكان مكسبها في كل تشيرت ٤ ريال متخيلين المكسب

لكن ربي ماضيع لها تعب وصادف هذي الفتره اليوم الوطني فسبحان الله من معلمه تعاملت معها انتشرت بخلال ٣ ايام

ماشالله تبارك الرحمن فطلعت في اقل من شهر ١٢٠٠ ريال

قل طلب عليها فحبت تكبر مشروعه وصارت تطبع شعارات الماركات وبدأ يتحرك سوق لكن جداً بطي

لحظه قبل انسى كانت قهوتنا كثير يمدحونها فقالت فوز وش رأيك نبيع قهوتنا قلت لها شكلك نهبلتي قالت الكلام

معك ضايع فصارت كل ماتجهز تشيرت تحط مقدار فنجان القهوه من البن المخلوط يعني مجرد ذواقه وترسله مع تيشيرت

فصارو زباين يسألون وش ذا وتخبرهم انها قهوه مخلوطه فبدأ الناس تطلب منها استمرت في شغله


انا صرت اذا نامت ارد على زباين واتفق معهم <<<هذي الي كانت رافضه الفكره ههههههههه

امي صارت اذا شافت الجهاز لمبته تاشر لان جوال فيه لمبه قالت جاتكم طلبيه ردو <<<<العزيزه الثانيه الي كانت رافضه الفكره

جاء شهر ١٤٣٤/١/١هــ

قالت اختي انا كلمت عمي وراح يوديني سوق الجمله بجده قلت هو عرف قالت لا بس قلت ابي اغراض وافق

راحت معه تفاجئنا جايبه ٨ شناط تقليد ماركه

ماشالله لاقوة الابالله اذكرو الله ياجماعه باعتها ماعدا حبه وحده

صادف شهر ٢ كان اخر دفعه من حافز قلت لها تكفين طلبتك ابي ادخل معك ب٢٠٠٠

صارت تضحك عليه تقول وين الي تمسخر عليه هنا وجهي صار كذا >>>🙈🙈🙈🙈

المهم ماقصرت ودخلت معها تعاونا مع بعض والحمدالله

تعلمنا طرق الطلب من المواقع لان سوق الجمله اصبح غالي بشكل موطبيعي


خلاصة تجربتنا

نويت انا واختي انها تكون عباده قبل ماتكون تجاره ومصدر رزق لنا لدرجة كل شهر ننوع مره نحط بسكويت او حلاو او

مناكير او مطوية اذكار مع كل غرض لزبون وانويها صدقه كل ماجلسنا على اجهزتنا لنشر اعلانا شغلنا اذاعة القران

والهينا السنتنا على تسبيح وتهلليل وتعاونت انا وهي اذا بدانا نتكلم في الناس نخاصم بعض ونستغفر

والله الذي لااله الاهو اذا اصلحنها مع ربي ربي يزينها معنا

وتبعنا قاعدة تاجر قليل دائم افضل من كثيرا منقطع خلينا اسعارنا متناول الجميع او بمعنى اصح نفس اسعار السوق

واليوم والله الحمد دخلنا السنه الثالثه من مسيرتنا والحمدالله كثيراً طيباً مباركاً فيه

الحمدالله حتى يبلغ الحمد منتهه

لمشاهدة حساب أختي متجر زهرة البنفسج

Z_BVIP

وحسابي متجر هنو فاشن

Hino_fashion

يتبع باقي القصص ..........

اي والله كلامك در ر وصادقه
الشغل موعيب بس المشكله في بعض الاشغال تحتاح لرجال يروح ويجي ويشحن لشركات الشحن
انا وحده من الناس افكر بالتجارة الالكترونية بس مشكلة المواصلات هي السبب في تجارة البنات من البيت

الجزء الثالث مو راضي ينزل عطوني حل ينسخ لكن المتصفح مو راضي يعمل لصق

حتى حملت التطبيق ونفس المشكله :(

يامرحبا شرفتي موضوعي
انتي بس تستصعبين الموضوع اذا عندك اخو او زوج كلميه بهذا الموضوع

واذا ماعندك تقدري تتفقي مع مندوب يوصلك شحنات ويستلمها

قصة بنت بالثانويه

هذي البنت في الصف الثاني ثانوي اشتغلت بدون علم اهلها لان اهلها رافضين الفكره

فكانت ترجع من المدرسه وتساعد اهلها بشغل البيت وتنام الين العصر واذا صحت كملت دروسها

وبدات تشتغل بواصلات الشواحن الملونه فكان الي يساعدها صديقتها واخو صديقتها

طبعاً هذي الطالبه هي الي تتفق مع زبون على كل شي صديقتها الوسيط بينها وبين اخوها

لان اخو صديقتها يوفر الوصلات من سوق الجمله وهي تصرفها

طبعا له عمولته واذا احد احتاج توصيل هو يوصلها وله حق المشوار قدرت تطلع بشهرين 3000

ريال. طبعاً عرفو اهلها بعد ماعرفو الفكره شجعوها وايدوها

والله يرزقها ويزيدها من فضله


،،،،،،،،،،،،،،،،،،،،،،،،،،،،


صاحبة المخلالات

هذي البنت كان ابوها مديون وراهن البيت وسبحان من يرسل لهم رزق بطريقه ميسره

فكانت تبي تسلف او تطلب يد العون من اجل تفك الرهن فنصحتها وحده ليه ماتشتغلين من البيت

فقالت لها وش اشتغل فيه قالت لها في اي شي تحبينه وتستمتعين فيه بعد تفكد بفتره

من الوقت انا احب اجهز المخلال (طرشي) فحكت الموضوع لبنات جيرانها فكانو ثنتين منهم معلمات

فساعدوها في نشر ودعايه لمنتجها فسبحان من سخر لها عباده قدرت تفك الرهن وترجع بيتهم

وكله من رزق الحلال

ختاماً القصص كثيره ورزق الحلال موجود

لكن يبي له طموح وعزيمه واصرار

صدقوني صاحب التجاره انه يدخل رزق ومكسب أفضل من صاحب الوظيفه الحكوميه

شمرو وعزمو وابدو صدقوني مايبي لها مبلغ كبير ولا يبي لها طاقه عاليه

كلها طموح واراده ورزق بكل مكان حتى لو كان هذا شي بسيط مثل علب البيبسي الفاضيه

نجمعها وتطلع ملايين لاتحتقرون هذا شي مكسبه موهل

سامحوني اذا اخطيت او طولت عليكم

ستودعكم الله الذي لاتضيع ودائعه

متجر هنو فاشن

Hino_fashion