اول شي راح اقول الحمد لله الحمد لله الحمد لله
على رحمتك و لطفك بنا يارب
اللهم لك الحمد و لك الشكر
بسم الله الرحمن الرحيم
السلام عليكم و رحمة الله و بركاته
بصراحة لا احب المقدمات و لا اعرف اكتبها فراح ادخل
في الموضوع على طول
القصة مكتوبة بالتفصيل الممل و في اخرها تعرفوا ليش
اليوم الصباح حطيت طبخة على النار و دخلت
غرفتي و قعدت شوية مع اخويا الصغير مسكين
تعبان من يومين و نايم معايا في الغرفة على اساس انتبه له
و انتبه لأدويتو لأني اسهر طول الليل
المهم دخلت الغرفة و قعدت اطبق الغسيل على اساس
بعد شوية اروح و اشيك على الطبخة لأن القدر صغير
و ماراح تاخد وقت
شوية ويصحى اخويا و يبدأ البكا و الدلع الزايد كل ما ابغى
اخرج من الغرفة عشان اودي الغسيل لغرف اخواتي
او كل ما خرجت عشان اشتغللي شغلة يبكي و
ما يسكت فاضطريت اقعد معاه عشان لا يصحي البيت كلو
احنا بيتنا دورين صغار يعني فوق 3 غرف مع
حمامين الله يكرمكم و تحت نفس الشي زائد مطبخ
فوق في غرفتين نوم و غرفة الجلسة و تحت غرفة
نوم الوالد و الوالدة و صالونين
اخواتي و اخواني كلهم نايمين فوق والوالد ما عندو
شغل اجازة فصلى الفجر و قعد في المسجد و امي
نايمة في غرفتها و معاها اخويا اللي عمرو 10 سنين
المهم الطبخة حطيتها على النار الساعة 7 و نسيتها تماما
مع الغسيل و بكا اخويا و انشغلت شوية في الغرفة
بس و الساعة 9 الا ربع اخيرا نام اخويا الصغير قمت
قلت خليني استغل الفرصة و انزل اكنس الدور اللي تحت و امسح الغبار
خرجت من غرفتي شميت ريحة شي ينحرق و يدوب
وقفت فوق الدرج و اشوف سحابة دخان تحت ما جا في
بالي اني ناسية شي في المطبخ انفجعت احسب في حريقة
و اجري على غرفة امي ابغا اصحيها هي و اخويا عشان لا ينخنقو
بريحة الدخان او ينحرقو لسمح الله
و الله قلبي طاح من الفجعة قلت خلاص اتكتمو من
الدخان و في نفس الوقت خفت النار تكون في غرفتهم
لأني جريت عشان اوصلهم بس ما شفت نار في البيت بس دخان
المهم قلت يارب رحمتك بأمي و اخويا سميت بالله و
فتحت باب الغرفة الا ماشاء الله مافي لا ريحة و لا دخان
في الغرفة اللهم لك الحمد و الشكر سبحان الله عشان أمي
ساكة باب الغرفة و كمان دايما تعلق عبايتها ورا الباب و
العباية طايحة و سادة الباب من تحت فالحمد لله رب العالمين
ماصا رشي و ما دخلهم الدخان
بسرعة فتحت النور و صحيت امي و اخويا قلتلهم يقومو
بسرعة في حريقة في البيت و انا بتكلم جريت على دولاب
الملابس و خرجت بلوزتين اعطيتهم هي يحطوها على فمهم و انفهم
والله يا بنات الدخان كان يقتل كنت حاسة بدبابيس
حارة نتغز في حلقي و بس اكح و مو قادرة اتنفس بس
ما اهتميت المهم اغطي فم و انف امي و اخويا و اطلعهم
من الدور و في حريقة عليا انا مو مهم المهم اهلي
المهم خرجو من الغرفة بسرعة و بأطلعهم
الدور اللي فوق <<< مسوية بطلة
الا الاقي اختي واقفة قدامي و اتقول المطبخ المطبخ
اطالع في المطبخ و الاقي القدر على الغاز و اشوف دخان
اسود يطلع منو والمطبخ و البيت كلو دخان بالقوة شايفين
يا الله كأنو انكب عليا سطل موية بارد من الصدمة
على طول قلت لأختي تاخد اخويا و اتويده غرفتي و
تجلس معاه و ما يخرجو منها و دخلنا المطبخ انا و امي
و سكرنا الغاز و مسكت امي
خرقة و حطت القدر في الحوض و فتحت عليه الموية
و طلعنا فتحنا الشبابيك و الابواب و المراوح و
الشفاطات عشان الريحة و الدخان يخرجو
و اول شي قلتو بعد ما طفينا القدر
هو اللهم لك الحمد و لك الشكرو قعدنا نكررها انا و امي
و الله الدخان يا بنات يقتل انتبهو
تحسي في ابر و دبابيس و اشياء حارة في حلقك و
صدرك و ما تقدري تتنفسي بس الحمد لله رب
العالمين عدت على خير و دفع الله ماكان اعظم
سبحان رحمة ربي
هادا عشان انا و امي و ابويا الله يحفظهم و يطول في اعمارهم
مداومين على اذكار الصباح و صلاة الفجر في وقتها و
على الاستغفار و الصدقة كل يوم فسبحان الله انا متأكدة
انو ربنا دفع عننا البلاء و رحمنا بسبب هالشي و خاصة
انو كلنا نعرف انو ذكر الله و الاستغفار و الصدقة
يدفعوا البلاء و يطفوا غضب الرب
سبحان الله قبلها بأسبوع اكتشفت ذكر اللي هو
((للهم أنت ربى لا إله إلا أنت، عليك توكلت وأنت رب العرش العظيم
ماشاء الله كان وما لم يشأ لم يكن ولا حول ولا قوة إلا بالله
العلي العظيم، أعلم أن الله على كل شيء قدير وأن الله قد
أحاط بكل شيء علما، اللهم إني أعوذ بك من شر نفسي
ومن شر كل دابة أنت آخذ بناصيتها، إن ربي على صراط مستقيم.))
هادا الذكر من فوائدو (من قالها أول النهار لم تصبه
مصيبة حتى يمسي ومن قالها آخر النهار لم تصبه
مصيبة حتى يصبح)
سبحان الله ليا اسبوع متعلمتو اقولوا مع اذكار الصباح و المساء
و كمان طول الوقت و كل شوية و كل ما خرجت انا
او اي احد من البيت و حتى لو كان بضنا في دور و البعض
التاني في الدور التاني لازم اقول:
(اللهم اني استودعك نفسي و امي و ابي و اخوتي و اهلي و احبتي
و بيوتنا و اموالنا و ارزاقنا و كل ما نملك و جميع ما انعمت به
علينا فاحرسنا بعينك التي لا تنام يامن لا تضيع ودائعه)
هادا غير الصدقات اللي نطلعها كل يوم انا و امي
و ابويا في الصباح انا و امي نعطي ابويا اما مبلغ بسيط
لو ريالين لو خمسة عشرة مو مهم
او نعطيه قارورتين موية او ساندوتشات أي شي ممكن
يعتبر صدقة و هو طبعا يزيد عليهم شي و على حسب
ايش هو الشي اللي طلعناه احنا التلاته يعطيه لأحد
ان شالله حتى عمال النظافة لما يوقف على الإشارة
و انا يوميا قبل لا اصلي الفجر احط قليل رز مطبوخ او عادي
مو مهم ياكلو كل شي ماشاء الله ههههههه و شوية عدس حب و
اذا فيه خبز بايت ما احد يبغاه اخدو
و انشفو و اكسرو قطع صغيرة و اخلطهم سوا و احطهم على
شباك غرفتي و انوي في قلبي انها صدقة عني و عن امي
و ابويا و الاهل و المسلمين كلهم الأحياء و الاموات و
ادعي ربي يتقبل مننا و يدفع عننا البلا و المصايب و
يشفي الوالد و كل مرضى المسلمين
يعني هادا ابسط انواع الصدقة و ايسرها و اسهلها
الرز البايت اللي ماحد يبغاه احطو في كيس و اخليه في الفريزر
و يوميا اطلع منو للعصافير و الحمام و احطو على شباك الغرفة
عندك معجنات او خبز ماحد يبغاه بايت او زاد عن احد جيبيه
و نشفيه و كسريه قطع صغيرة و حطيه في كيس و كل يوم
طلعي شوية و حطيها على الشباك و خلي الطيور تاكل منو
هادي صدقة سهلة و بيسطة و ماتكلف و تحميكي انتي و اهلك ان شالله
هادي الحركة كل يوم اسويها
فاليوم قلت سبحان الله رب العالمين الرحمن الرحيم
اعمالنا الصالحة فادتنا في الدنيا زي ما راح تفيدنا فيا الآخرة
و دفعت عننا بلاء عظيم زي ماربنا و رسول الله صلى الله عليه
و سلم وعدونا
الخلاصة و ليش انا ذكرت القصة بالتفاصيل المملة؟
(اولا) عشان ابين لكم فوائد الاكثار من الاستغفار و ذكر الله و
الصدقات و الأعمال الصالحة
و الله العظيم لما قعدت افكر اليوم لقيت في اشياء كتير ما انتبهنا
لها قبل كدا هادي المواقف سبحان الله كانت راح تجينا من وراها
مصيبة يعني المصيبة وصلت لحد عندنا و ربي دفعها
عننا سبحان الله اللهم لك الحمد و الشكر اللهم لك الحمد الحمد و الشكر
(ثانيا) عشان اذا لا سمح الله صار عندكم حريق و لا شي
اهم شي تغطو فمكم و انفكم عشان لا تتنفسو من الدخان
و تنكتمو لا سمح الله
يقولوا انو اغلب الناس اللي يا لطيف يتوفو بالحرايق يكون
موتهم الله يرحمهم اختناقا بالدخان مو احتراق يالطيف الطف فينا
(ثالثا) حتى لو متأكدة مليون في المية انك ماراح تنسي أي شي
على الغاز او في الفرن برضو سوي منبه عالجوال او حتى
ساعة عادية و حطيها على وقت معين بحيث انك كل
شوية تشيكي على الطبخة او الشي اللي انتي حاطتو عشان
لا سمح الله لا يصير ظرف يخليكي تنسي انو في شيع النار
و ياما يا بنات صارت حرايق بسبب انو ربات البيوت
الله يهديني و يهديهم نسيو شي على الغاز لسبب ما
(رابعا) في جهاز اسمو جهاز انذار الدخان ينحط بشكل رئيسي في
المطبخ و ممكن طبعا و الافضل انو يتوزع في كل البيت عشان اذا
لا سمح الله صار مس او حريقة او شي هالجهاز أول
ما يحس انو في دخان يطلق صوت انذار قوي فينتبهو الناس\
و يلحقوا البيت قبل لا اتصير حريقة لسمح الله
هادا الجهاز دايما اشوفو في الافلام و المسلسلات
الأجنبية و الوالد الله يحفظو لما قلنالو عنو اليوم قال ان شاء الله
راح يركبو لما ننقل على الشقة الجديدة
هادا الجهاز مرة حلو يعني لو توقفي تحتو
و تولعي سيجارة من يوم ما يحس بدخانها يشغل الانذار
و انا انصحكم فيه.
(خامسا) طفاية الحريق لازم تكون في كل بيت و لازم كل اللي
ساكنين في البيت يتعلموا عليها عشان اذا صار في نار و حريق
لسمح الله يقدر الشخص يسيطر عليه قبل ما يكبر
.............................
سامحوني على الاطالة حبيت اذكر التجربة هادي
الله لا يعيدها عشان الواحد اكيد استفاد اشياء كتير منها
فحبيت انتو كمان تستفيدو و تتعلموا من اللي صار فينا
الله لا يبلانا و لا يبلي مسلم
اللهم ادفع عنا الهم و الغم و الحزن و الكرب و الضيق و البأساء
و الضراء و المصيبة و البلاء و فجأة البلاء
اللهم لك الحمد و لك الشكر على رحمتك بنا
اللهم لك الحمد و لك الشكر على جميع مادفعته عنا من مصائب و بلاء
اللهم لك الحمد و لك الشكر على جميع نعمك علينا التي لا تعد و لا تحصى
اللهم لك الحمد و لك الشكر على نعمة الصحة و العافية
اللهم لك الحمد و لك الشكر على نعمة الاسلام و على ان هديتنا
اللهم لك الحمد و لك الشكر كما يليق بجلال وجهك و عظيم سلطانك
اللهم لك الحمد حمدا كثيرا طيبا مباركا فيه
اللهم لك الحمد حتى ترضى ولك الحمد اذا رضيت و لك الحمد بعد الرضا
اللهم لك الحمد عدد خلقك و رضا نفسك و زنة عرشك و مداد كلماتك
...................................
هادا الموضوع كتبتو هنا و في منتديين اخرى
عشان الفائدة و عشان تشوفوا كيف رحمة ربنا
و نعم بالله
اليوم كانت راح تصير لنا مصيبة بس ربي دفعها عننا(تعالوا شوفوا كيف و ليش ربي حمانا)
24
3K
يلزم عليك تسجيل الدخول أولًا لكتابة تعليق.
بائعة البيلسان
•
الحمد لله على السلامه
لحظة مسا
•
الحمد لله على سلامتكم
الله أكبر الله أكبر الله أكبر
لاإله إلا الله
الله أكبر الله أكبر ولله الحمد
الله أكبر الله أكبر الله أكبر
لاإله إلا الله
الله أكبر الله أكبر ولله الحمد
الصفحة الأخيرة