شو ذنبي ؟؟

بنات والله اني تعبت من اهل زوجي وادري اني مش الوحيده اللي عندها نفس المشكله بس حبيت اني اظهر اللي في خاطري
بالذات اني وصلت حدي ونفسيتي تعبت وما ادري شو اسوي

انا متزوجه من سنتين وحملت مرتين واجهضت وحملي كان بالابر المنشطه لاني كنت اعاني من ضعف التبويض والحمد لله ع كل حال ربي عوضني خير بعد حملي الثاني والحمد لله الحين اقدر احمل طبيعي بس ربي للحين مارزقني بالذريه
المشكله في اهل زوجي والله انهم طفروني وكرهوني بعيشتي وحياتي بكبرها من كثر ما يلمحون عن الحمل والله اني اضايج بس صرت اطنش بس ما اقدر اكثر تخيلوا صاروا يعقون نغزات قويه وتعور القلب يحسسوني اني السبب انه ولدهم ما عنده عيال ولا قالوا ربي ما رايد خبروني شو ذنبي وشو بيدي
تخيلوا من شوي يدته قالت ان شاء الله اخته تربي بسرعه عسب نتونس بالياهل واليهال وناسه بالبيت وتطالعني و اخته تقول انا احب اليهال ياريت عندنا يهال واللي واللي ولا فوق هذا 24 ساعه يتكلمون عن الحمل ولا يعقون نغزات قويه وكل يوم فلانه تسال حرمة ولدكم حامل ولا يعني انا من انش لين انام وسالفة الحمل والنغزات ع لسانهم وتخيلوا مره كنت يالسه عند عمتي ورحت الله يعزكم الحمام تخيلوا بعدين زوجي قال لي انه امه فكرت اني حامل تخيلوا والله بس عسب اني رحت الحمام الله يعزكم والله انهم يركزون ع اي حركه لدرجه اني لو تميت في غرفتي وما يلست عندهم بيقولون حامل وما يفكرون اني ارتب غرفتي او مشغوله بشي ع طول انا حامل والمشكله اني ساكنه عندهم في غرفه والله نفستي زفت ما ادري شو اسوي وياهم ولا تقولون اني حساسه والله من اني تعبت وانا اطنش بس لين متى بتم جذي وهم يلوموني ع شي مو بيدي وربي هو اللي كاتب لي ومثل ما هو خذه مني بيرزقني ان شاء الله وبيفرجها علي ويفرح قلبي وقلب زوجي بالذريه الصالحه



السموحه منكم غثيتكم بس والله فيني هم وضيج ما يدري فيه غير ربي وحبيت اخفف من الهم اللي فيني وافضفض شوي من اللي في قلبي يمكن ارتاح شوي

ولا تنسوني ادعولي ربي يعوضني عن اللي راحوا مني ويرزقني الذريه الصالحه وافرح قلبي وقلب زوجي بشوفة ولدنا