عاملين ايه فى البرد ده؟
انا بقى بمناسبة البرد ده عملت كيكة دسمة وعملتلها صوص شوكولاته قلت يمكن تدفينا شوية
مقادير الكيكة
5 بيضات كبار
م ص فانيليا
2 كوب دقيق هننقص منه معلقتين كبار
2 م ك كاكاو خام
كوب ونصف زبدة سايحة بس مش سخنة
م ك بيكنج بودر
كوب سكر
الطريقة
هنحط البيض والفانيليا لوحدهم فى بولا
وهنضربهم بالمضرب
ونضيفلهم الزبدة السايحة والسكر
ونضربهم بالمضرب
ونضيفلهم الدقيق والكاكاو والبيكنج بودر
ونضربهم بالمضرب ونحطهم فى القالب بعد مانبطنه بالسمنة والدقيق
خبزتها فى فرن حرارته هادية وده شكلها لما استوت
قلبتها على طبق التقديم وسبتها تبرد خالص وبدأت اعمل صوص الشوكولاته
قبل مادخل على صوص الشوكولاته عايزة اقول ملحوظة بالنسبة
للبيكنج بودر انا بستخدم نوع كويس جدا تونسى اسمه فنواز موجود فى السوبر
ماركت واحسن من كيك شيف بكتيييييييييييييييير اوى اقل شوية منه بترفع
الكيكة كويس اوى زى مانتو شايفين هنا الكيكة بتاعتى ارتفعت ازاى كمان
بستخدم منه الفانيليا والخميرة الفورية وبصراحة مش بستخدم غير النوع ده فى
كل حاجة
صوص الشوكولاته المعتمد بتاعى واللى مقاديره
كوب الا ربع كاكاو خام
كوب الا ربع سكر
كوب الا ربع مياه وممكن استبدالها بلبن
قطعة كبيرة زبدة
2 ملعقة صغيرة جيلاتين بودرة متدوبين فى مياه باردة من الحنفية
والطريقة
هنحط الزبدة والسكر والكاكاو فى حلة على النار
ونحط عليهم الميه
وندوب الجيلاتين فى ميه بارده وده شكله
ونحط الجيلاتين على الصوص ونسيبهم يغلو مع التقليب وبعد كده نطفى النار
ونسيبه يبرد خالص ويتماسك
وده شكل الكيكة بعد مازينتها بالصوص اللى عملته وحطيت عليهم الملبس الفضى الى بنحطه على الغريبة
وده شكلها من فوق
وهنا لما قطعتها
وطعمها طلع رائع وهشة جدا وطرية
اتمنى موضوعى البسيط ده يكون عجبكم