Ooo قصة ولادتي بمستشفى الحمادي بتاريخ 1432/8/28هـooO

السلام عليكم ورحمة الله وبركاته

الحمد لله ولدت بالسلامة في مستشفى الحمادي
والتسهيل اولا واخيرا من الله سبحانه
لكن هذي اسباب جعلها الله لنا
وقبل كل شي
اتمنى انكم تدعون ان الله يشفيني من اثار العمليه
لاني اكتب لكم الان وانا على الفراش ما اقدر اتحرك بسهوله
وتعبانه حتى بنتي ما اقدر اقوم بها


اكتب لكم لاني كنت محتاجة احد يفيدني عن الحمادي وما حصلت راح اكتب تجربتي مع الحمادي
عشان يستفيدون منها البنات
انا ولدت الحمدلله من 5 ايام بتاريخ 1432/8/28
في البداية كنت اراجع عند طبيبة في عيادة نساء وولادة 
وقالت لي انها تولد بالحمادي والبريطاني ودار الشفاء والهلال الاخضر والمبارك
طبعا انا كنت محتارة بين الحمادي والبريطاني
وسبق ولدتني الطبيبة هذي في الحمادي ولادة طبيعية من 5 سنوات
بس 5 سنوات اكيد تغير المستشفى 
قلت لها ابغى البريطاني 
قالت مانصحك لان البريطاني يغلب عليه الفندقة اكثر من الخدمات الطبيه
تقول لو احتجنا لاقدر الله تخصصات ثانية مثل مسالك او اطفال او نقل دم مو مثل ااحمادي بقوتهم وكفاءتهم وخبرتهم

وتوكلت على الله اخترت الحمادي

في اخر مراجعتين عند طبيبتي قررت لي قيصريه لان البيبي مرتفع والرحم مقفل

يوم الخميس بدت معي علامات الولادة

وكلمت الطبيبة قالت راح نروح للمستشفى بعد الساعه 12 بالليل  لان لو دخلنا قبل راح يحسب عليك يوم ومادام انك عمليه ولا اشتدت المويات معك نصبر
توكلت على الله وجهزت اغراضي لما جت الساعه 11 ونص  بالليل طلعت من البيت ورحت للمستشفى 
دخلنا عند الاستقبال الساعه 12 وربع
صلحت اوراقي وملفي
واخذتني الممرضه لقسم التوليد ومن هنا بدا الجد
دخلوني غرفة التخطيط ولبسوني ملابس الولادة وبدوا يخططون ويحوسون 
تركيب مغذي وقسطرة بول وانتم بكرامة 
والطبيبة مابعد جت كانت مواعدتني انها الساعه وحدة تبدا في العمليه
لكن تأخرت وماجت الا الساعه 2 الا ربع بسبب انه كان عندها حالة اجهاض في مستشفى دار الشفاء الله يعوض على الام
بس كانت الطبيبة تتابع مع الممرضات بالجوال وتوجهم لتجهيز غرفة العمليات
لانها دخلت علي وعلى طول ونقلوني لغرفه العمليات الساعه 2 الاخمس
عشر دقايق وخدروني تخدير كامل وصلحوا لي العمليه وخيطوني
وولدت الحمد لله ببنتي
بدت الافاقة عندي الساعه 4 الفجر الحمدلله والشكر له
وجلست في غرفة الافاقه الى 5 الفجر
تأخروا في نقلي للسويت الخاص  بسبب تعطل اصانصير نقل الاسرة
نقلوني للسويت رقم 2204
اللي استغربته ان الاثاث مثل ماهو ماتغير صحيح انه قوي ومتين ومو مبين انه من 10 سنوات بس استغربت عدم التجديد
لكن للامانه كان السويت مرتب ونظيف 

نجي للخدمات صراحة طاقم التمريض والحضانه كان طاقم رائع جدا
التمريض مايمديني اضغط زر الاستدعاء الا على طول واقفين بجنبي مايتأخرون عن دقيقة وبالكثير دقيقتين

الحضانه حريصين جدا على البيبي ويجبونه لك وتوقعين على رضعاته الصناعية والطبيعه
وتوقعين على دخوله وخروجه من الحضانه

بس كنت اتمنى على هالخدمة الحلوة يكون موجود عندهم كاميرا على الحضانه زي مستشفى الحبيب اقدر اتابع البيبي عندهم
بس ان شاء الله يوفرونها << ترى علي فكرة كتبتها في الاقتراحات

عاملة النظافه تجي تنظف السويت اربع مرات في اليوم مرة وحدة منها تنظيف شامل والباقي تنظيف للقمامة في السويت والحمام
العصر يمرون عليك بالشاي والقهوة وللمرافق معك او الزائر

وجباتهم حلوة ولو حبيتي يسخنون لك المطعم وجبتك يجون ياخذونها ويسخنونها
هذا في حالة جاك ضيوف وبردت الوجبة


الممرضات يجون كل 6 ساعات يقوسون الضغط وياخذون الحرارة
الطبيبات المناوبات يمرون عليك مرتين في اليوم
الاخصائية الاجتماعية تمر عليك مرة باليوم
اخصائية تغذية الاطفال تمر مرة باليوم
طبيب الاطفال يكلمك كل يوم الصبح ويشرح لك حالة البيبي
رئيسة الممرضات تمر عليك كل يوم وتسأل عن تعامل الممرضات معك
رئيسة التنظيف تمر عليك كل يوم وتسألك عن مدى رضاك عن النظافة

متوفرة عندهم خدمة الواي فاي  وتفعلينها كل 24 ساعه عن طريق الطلب من الممرضات


وهذا كل اللي اقدر افيدكم به من خلال تجربتي مع الحمادي


اتمنى انكم تدعون ان الله يشفيني من العمليه
ويصلح بنيتي واخوانها
ويجعلهم هداة مهتدين
لاني اكتب لكم الان وانا على الفراش ما اقدر اتحرك بسهوله
والحمدلله على كل حال