هلا بالبنات وبالمدامات أنا من 4شهور بديت أهتم كويس اعتمد قبل كل استحمام بالصنفرة أنوع مرة أفريكا من بودي شوب ومرة خلطة الأخت فيوليت ررروعة ومرة الملح أوالسكر والزيت والليمون والصابون رغوة من نيتروجينا وأحط ماسكات للوجة متعددة ماأستغني عن صفار البيض والنسكافية من الأخت عود مبخر وأيضا الزبادي المنتهي صلاحيتة ولشعري حمامات زيت فاشكول والزيت والمايونيز هذا اللي ببالي الان أنا غير متزوجة أدعولي:26:

السلام عليكم ..
هلا حبيبتي ام فيصل .. أنا راح أقولك عن نفسي ..
يعني تقريبا زاد أهتمامي في نفسي من سنة وحدة بس ..

أول شي بالنسبة لشعري ..
قبل لا اغسل شعري احط فيه زيت ((صانسيلك سبع زيوت اللي لونه أصفر .. للشعر الجاف و المقصف)).. أخليه تقريبا ست أو سبع ساعات .. و أغسل شعري .. و من بعدها .. قبل ما يجف شعري يعني بين الرطوبة و الجفاف .. أحط فيه سيروم كريستال .. روووعة .. و ما تبين نتيجته إلا بعد يومين بالنسبة لي و يصير شعري كأنه مستشور .. و الحين صار لي سنة و أنا ما غيرت طريقتي لأني مرتاحة لها كثييير .. رغم إني جربت زيوت أنواع و اشكال أغلب الي يكتبونه البنات أجربه .. لكن ما داومت عليهم نفس صانسيلك و سيروم ..

بالنسبة لجسمي ..
أنا سمعت أكثرمن مرة إن ماي الورد مفيد للجسم .. و للبشرة .. و يخليها موردة و طبيعية و يعطيها نضارة .. فأنا خذيت ماي ورد و حطيتها في علبة منظف زجاج خالية .. و كل يوم اقعد الصباح أطش منها على وجهي و أو كل وقت إذا اشوفه جدامي .. و بالفعل مع الوقت بشرتي تغيرت كثيييييير .. و صارت صافية الحمدلله .. و بعد أحطه على جسمي عقب ما استحم يقولون زين حق الجسم ..
و نفس ما قلت لك .. ماسك الماي و النشا .. و ماسك العسل و عصير البرتقال ..
بس مازلت أعاني من الرؤوس السوداء >> عجزت منها .. رغم إني جربت كلير آند كلير الخاص بالرؤوس السوداء لكن ما فادني .. و المفروض الحل الوحيد إني أقلل من اكل الكاكو .. و هالشي مستحيل لأني مدمنة بصراحة :(.. ما اقدر يمر يوم من غير ما آكل كاكو ..

و بالنسبة لأشيل شعر إيدي و رجلي .. بس في المناسبات .. يعني في الأعياد و الحفلات .. و أنا اشيله بنفسي .. بالحلاوة .. لكن في حاجة حلوة جديدة أول مرة أشوفها و لأني احب اشيل من الجذووور فهذي الطريقة مرتاحة لها .. هي تكون الحلاوة سايلة .. و تحطينها بواسطة شي خاص نفس الملعة تجي مع الحلاوة نفسها .. و بعدين أحط عليها قطعة مستطيلة سميكة شوي تجي مع الحلاوة بعد .. و اشيلها بعكس إتجاه الشعر .. رووووعة و يبيعونها بخمسة ريال بس ..

بالنسبة للرشاقة ..
أنا ضعيفة و الحمدلله .. بس هاليومين زايدة كم كيلو .. لهالسبب أحاول أقلل .. و أخفف مع الرياضة .. و أتمنى أرجع زي أول .. كان وزني ثابت 50 لا أزيد و لااقل .. بس الحين صار 53 .. و نفس ما قلت .. لأني أكثر من الكاكو فلهذا السبب .. بس إن شاء الله أحاول آكل مرة في الأسبوع بس .. و الله يعين .. لأني إذا ما أكلت يوم واحد راسي يعورني >> إدمان الله لا يبليكم ..

بالنسبة للبلس ..
إحنا في البيت كله أولاد نفس ما انتي عارفة .. فملابسي كله واسعة عادةً بيجامة ناعمة أو ملابس سبورت واسعة .. و على فكرة أنا ألبس بنطولات مو مشكلة .. بس أكيد وااسعة .. و عندي كم واحد نفس الي في الصورة .. صرااحة روعة و مريحة في المشي و الحركة .. و عندي نعال أو شبشب((تكرمون)) .. ألبسها في الشتاء على السيراميك .. و هي قطنية تخليك تشعرين بالدفا .. مرتاحة عليها ..



أدري طولت هذرة .. بس انا احب هالمواضيع كثيير .. و لي رجعة إن شاء الله ..
:26: :26:

ام فيصل


موضووعك حلووووو شوي شوي علينا كل شي تبين تغيرينه فينا

جداولك في كل مدرسه <<<<<< قصدي في كل قسم

ماشاء الله عليك عيني عليك بارده


والله تبين اقولك عن نفسي


اهم شي عندي الاهتمام يعني النظافه واللبس في البيت وتسريح شعرى
وكمان لبسي يكووون مرتب وحلووو
واحب التغيير كثيير عشان اكون مرتاحه نفسيا



وطبعا اكيد العطور اهتم فيها مع اني مو متزوجه بس احب الزين
لنفسي قبل اللي حولي


وكمان اسوي اقنعه بس مو كثير مثلا اهتميت في تسمين الخدووود وكانت النتايج حلووووه طبعا استخدمت خلطة الحلبه المغليه واالخميره

واحيانا اسوي لشعري خلطة العسل +زيت زيتون + وبيظه تعطي نعومه للشعر ولمعه


وكمان انا لمى اغسل شعري بالشامبو

اسوي للشعر حمام الزيت فاشكوول بالثوم ينعم وريحته حلوووه

واحيانا بعد الاستشوار اضع سيروم كريستال يعطي لمعه طبعا هذا لمى اكون مالي خلق خلطات او زيوت قبل الشاور


واستخدمت كريم النخاع التونسي بس احس انه مومناسب لي يعني يزيت شعري زياده اتوقع يناسب الشعر الجاف

وللبشره احيانا اشرب مويه فيها ملعقة ماء ورد

واحيانا ارش من ماء الورد على وجهي يطلع جنان طبعا مع تكرار الاستخدام


وطبعا تشوفين الاهتمام صدق لمى اكون بطلع مناسبه يعني مااخلي شي مااسويه


نسيت اقووولك

فيه بنت في بالي بشرتها تجنن قلتلها انتى شوتسوين لبشرتك قالت حاجتين

الاوله خلطه بس وعطتني نفس الخلطه طبعا مااعرف مكوناتها اهي وهحده تسويها وتبيعها


المهم جربت خلطتها وماطلعت نفس النتيجه


الحاجه الثانيه انها تمسح جسمها بخل التفاح ويطلع جنان طبعا انا سويتها ماصدقت خبر وكانت النتايج حلوووه بس مااستمريت للاسف

طبعا ضروري كل اسبوع الحمام المغربي عشان ينظف ويجدد الخلايا
وطبعا لمى اكون رايقه البس ملابس سبورت ويالله في الهواء الطلق امشي وامارس رياضاتي وطبعا تاثيرها يكون على الجسم والروح وكمان نفسيا اكون مرتاحه



طبعا عندي السير بس قليل استخدمه احب امشي برا مو جوا البيت يعني في الغرف لا








شكلي دوختك معاي

بس والله ترا ني فاضيه مرررره ومدري شسوي بعمري

وفليت عليك الشريط

الغاليه ام فيصل موضوعك حلو وحبيت اشارككم
انا احب النعومه بكل شي
ملابسي ناعمه وخفيفه مااهنم بالموضه بس اكشخ بالبيت باللي يريحني البس بنطلونات وكل شي بس البس روب عليهم امام الشغاله واغطي شعري اذا مسرحته عنها ما احب تشوف كشختي
للنوم بيجاماتي نعومه قطنيه او من اللي خبركم:17:
احب اظهر شبابي الله يحفظني ويخليني ويحرسني لشبابي:27: البس السبورت واحيانا تكفخ براسي والبس سواريه بالبيت لاني من مقاطعة الاعراس والحفلات ما احب اروح الله يستر علي
مكياجي ناعم بودره خفيفه واحمر خدود وكلوس وكحل اثمد ما استغني عنه
وضحكه حلوه بغمازاتي وتكمل الكشخه!
اهم شي النعومه بكل شي لكي تظهر النواحي الجماليه اللي خلقها الله لكل وحده فينا وما في داعي للمكياج الصارخ اللي يخفي الجمال الرباني
شعري ازيته 2الى 3 بالشهر بزيوت منها الآس او الزيتون او النخاع كل مره نوع علشان شعري ما يتعود على نوع معين واستخدم شامبو الهيملاياالطبيعي فظيع للشعر واحيانا شامبو بالعسل ما اذكر اسمه الحين
لبشرتي ما الزم نفسي ببرنامج معين
يوم اغطيه بزيت الزيتون واغسله
يوم بالعسل وهو افظع شي للبشره منعش ولذيذ!احط منه على شفايفي بعد ولما اغسل وجهي تتقشر الطبقه الجافه اللي عالشفايف ويصير ملمسها نننننناعم
يوميا تقريبا وباي وقت امسح وجهي بقطنه مبلله بماء الورد منعش كثير ويشد البشره
جسمي استخدم له صابون الغار او صابون الجلسرين بالفواكه في منه توت ومانجا وكيوي وريحته جنان
اقشر جسمي بمقشر طبيعي من لايف ستايل مره بالشهر وهو بعد طبيعي
وارطب جسمي بلوشن بيزلين
يداي ادلكهم باليمون متى ما تذكرت وارطبهم بالبيزلين بعد
قدمي اقشرها بمقشر الجسم السابق وادهنها بعد بالبيزلين قبل النوم لاااازم
اقشرها مره بالشهر كفايه
للعرق استخدم بيزلين للعرق ورول ايفا بماء الورد وهو طبيعي وعطر جدا ومنعش
واحينا اضع المسك الحجر للعرق ناعم ولطيف
اتعطر اذا ما بطلع اكيد بالمسك روز عجيب ودهن العود الاصلي ما في عليه
واحب عطر اورا من لووي ناعم وثابت وما غيرته من 8 سنوات!
احب الاشياء اللي ارتاح لها بكل شي والتغيير نادر في الاشياء التجميليه اللي استخدمها لان بشرتي حساسه وما احب اعبث ببشرتي واجرب
المهم والاهم اهتم بنفسي وببشرتي باغلى شي وهو غطاء وجهي اللي التزم فيه وربنا ما امرنا فيه عبث لا
فيه عفاف للمراه وبعد حفاظ للبشره من الشمس والتجاعيد والامراض الجلديه
وعبايتي الراس اللي تستر جسمي اللي تعبت وانا اعتني فيه لزوجي وبس
واخيرا وليس اخرا الحياء اللي هو شعبه من الدين اجمل عنايه بالمراه
اتمنى اني ما طولت والله يوفق الجميع:27:

ماشاء الله روعة كذا روعة
بس فين البقية يالله بنات الهمه نبغى نستفيد ----- بسرعة ترى ما فيني صبر

ام فيصل حبيتي يازينك انتي وموضوعك اللي يهبل وله فايدة كبيره على الكل ان شاء الله جربي مقشر الخميره ولا تخافي من الريحة راح تكون في الحمام بس وانتبهي لاتزلقين خخخخخ انا ما اغسل جسمي بعدها بصابون بس بماء واتعطر ومافيه اي ريحة للخميرة

الله يسعدكم يا بنات ذكرتوني بماء الورد من زمان نسيته كنت اخلي قاروره في الحمام والتانية على التسريحة لكني رااااااااااجعتله وبقوة
ملاك الأمل طريقة ماء الورد في المرش اعجبتني مررررررره وراح انفذها ان شاء الله :26: :27: