استشارة ..حطي حالك مكاني شو بتعملي

السلام عليكم

خواتي انا راح اعرض المشكلة مباشرة وكل وحدة تحكيلي لو هي مكاني شو بتعمل

انا زوجي الحمد لله رب العالمين ما بدخن ولا بشيش واكتر من مرة سالتو واحنا خاطبين وحكالي هو ضد هاي الشغلة نهائيا وكتير انعرض عليه وهو رفض وانا كان شرطي وشرط اهلي يكون العريس لا بدخن وبصلي وبعد ما تزوجنا نفس الاشي كتير بطلع مع اصحابو الشباب واحيانا برجع ريحتو سجاير بسالو شو كاين ادخن بحكيلي كنت بقهوة وكل الحولي بدخنو اكيد راح تكون هيك ريحتي ولما بحكي ما كنت انتبه لريحة دخان طالعة من نفسو نهائيا

والقصة قبل ست شهور صاحب زوجي نسي علبة السجاير بالسيارة وكان فيها ست حبات ومرت الايام وقبل شهر وانا برتب لقيت العلبة موجودة بدرج زوجي وفيها الست حبات يعني من هديك المدة عندو بالبيت بس ما استخدم اشي منها بعد اسبوعين فتحت العلبة لقيت فيها 3 حبات ووالبارحة فتحتها لقيت فيها حبتين انا كتييييييير انصدمت يعني معقول زوجي بدخن؟؟؟ يعني انا متاكدة مية بالمية عمرو ما دخن يعني اذا صار يدخن راح يكون بدا هدا الشهر

انا محتارة كتير مو عارفة شو اعمل احنا ظروفنا شوي صعبة وكنت كاتبه عن وضعي قبل فترة وزوجي متفنش من الشغل يعني اعد بطال بالبيت وانا طول الوقت مشغولة عنو

خواتي حطو حالكم مكاني شو بتعملو؟ انا خايفة اسالو احكيلو بدخن؟ يروح يحكيلي اها بدخن ويسير يدخن ادامي عادي اذا كان بدخن بالسر يسير بالعلن ويسير يفكر اني براقبو ووقتها حتى لو زعلت او حردت زوجي عندي يعني ماراح تفرق عندو وخايفة اسكت يسير عندو عادة ويتعود على السجاير يعني اذا كانت تجربة بتكون على سيجارة بس مش 4 وكل وحدة على فترة انا كتييييييييير خايفة ياخد طريق غلط من الوضع والضغط الي هو فيه وتكون البداية الدخان وبنفس الوقت مو قادرة اسكت بدي اعرف ما بحب احس حالي غبية المي بتمشي من تحت رجلي وانا مش حاسة

يعني واحد 30 سنة ما دخن فجاة يسير يبلش سيجارة سيجارة احكولي شو اعمل؟