زوجي مو مالي عيني

انا اتزوجت رجل اقل مني دراسيا لكن متفوق بعمله لكن مسأله انه مو جامعي مررره مضيقه صدري
انا وبنت خالتي اتزوجنا بسنه وحده وصاروا اقاربي يقارنوا بيننا من ناحية كل حاجه
بنت خالتي شهر العسل في ماليزيا
اما انا في جده وكانت ايام معدوده
بنت خالتي كل سنه تسافر وكان زوجها شايلها من ع الارض اما زوجي الله يسامحه كل ماقلت له ابي اسافر انا وانت ابي نغير جو يمد بوزه ويقول ماتسافري الا خواتي قبلك وصارت سفراتي مع خواته وانا كني طرطوره بينهم مايتكلم معاي ولا يعبرني
لكن بالبيت انسان اخر طيب معاي وحنون الا من ناحية السفر والفلوس فهو مقصر
طبعا اقاربي يشوفوا اني مسكينه بالنسبه لبنت خالتي دائما يقارنوا حياتي فيها
هي الحين زوجها دكتور وانا زوجي ع حاله صارت هي اللي لها الكلمه بحكم منصب زوجها وانا نظرتهم لي غير بحكم ان زوجي مادرس ع قولتهم
مع كثر التصرفات اللي تغث من زوجي ونظرات اقاربي لي صرت اكرهه واحتقره ومهما تكلم احسه يتفلسف ويحاول انه يعدل النقص اللي فيه صابتني الغيره غصب علي وودي اتخلص منها لكن مدري كيف دائما ادعي ربي انه يرزقني القناعه والرضى وانا خايفه ع حياتي خايفه
عجزت اشيل هالشعور مني دائما مخليني اقل من غيري باساليبه لهذا السبب وصلت لهالمرحله