ولادتي بحلوتي...

السلام عليكم

جايتكم اليوم بقصة ولادتي ..طبعا وأكيد تنتظرون الأكشن فيها
هذا يامال العافية الاربعاء 15/2 الساعة 11 قبل الظهر حسيت بألم خفيف يجي ويروح قلت اكيد من التعب لان الليلة الي قبلها مانمت وجالسة مع ولدي وزوجي
قمت وافطرت وصليت الظهر والالم يجي ويروح
وامشي بالبيت شاكة انه طلق لانه خفيف ومالكم بالطويلة جوالي جنبي احسب الوقت الا هو كل ربع ساعة
قال لي زوجي يالله قلت : معصي ===> تخاف من المستشفيات
من الخرعة قلت ماعندي ولادة راح الالم
وجلست ع هالحالة الى العصر ويجيني ذاك النووووم واقول لابو الشباب خلاص اذا تبي تروح مكة ( عنده شغل ) روح مافي ولادة ===> دكتورة نفسي
ويروح الضعيف واحاول انام وطار النوم ورجع الالم اقوى واتصل به وينك ( زعلانة) نسيت اني قلت له روح ===> مضيعة وخايفة
بس وصل المغرب قلت له راح الالم

قام عصب قال بتروحين ولا بأولدك بالبيت( هو بروحه خايف اجيب العيد واولد بالبيت) وامي طالعة نازلة مع الدرج روحي روحي يابنتي وانا اقول باقي
الى العشاء وانا شغالة ع ساعتي وقبلها رحت تحممت واتسدح بالحمام ساعة ع دش دافي واحس الالم مستمر ويقوى وكل شوي زوجي يناديني يقول ولدتي ولا باقي اقول له ايه بس استنى احممها( النونو)===> مسوية دمها خفيف الاخت
والله والبس ملابسي واتذكر ان وحده هنا بالمنتدى ربي يجزاها بالخير قالت استخدموا زيت الزيتون عشان الكشف الي مسوي قصة رعب بالنسبة لي
لان ولدي الاول بهذلوني بهالكشف جلست 4 ايام عندهم وولدت به بالسابع
واتصل بامي واقولها باروح خلاص قالت لو ماكنت بتروحي جيت ضربتك ===> طفشت امها
قالت اروح معك ؛ قلت لا يكفي ابو الشباب===> مادرت انه ماله رفقة
ونمشي ع مستشفى الجامعة الخاص طبعا اول شي تروحي الطواري وهم يحولونك ع الخاص
وقبلها ارسل رسالة لدكتورتي ماترد لان االالم زاااااد وصار كل 10 دقايق ونوصل هناك وزحمة ومافي سرير بالطواري وناس براس خشمها تتكلم كانه من جيبها وبالعافية سريرر وتجي تعبي الفايل الممرضة ونسأل عن د نوال السناني ( دكتورتي) قالوا ماندري بس المناوب دكتور!!
قلت معصي وابكي خرعة وحياء والم
واقول لزوجي يالله طلعنا وماسكة بيده تقول عسكري ضابط له حرامي
واصيح لاجا الطلق وهو يقول اسكتي طيب ===> طفش وده يكفخها مو كفاية متأخرة بالبيت
ونطلع ع سيارتنا وهنا جاك الام اشد واشد وتجي رسالة من الدكتورة تقول انا ببخش عندي ولادة واقول لها باجي وابكي اقول لزوجي ابي امي ؛ رد معصب: بدري الحين راحت الشجاعة
قلت له بسرعة كلمها ويتصل بها وتمشي من البيت ميمتي وبابي ربي يخليهم لي وامي تهاوش وتقول قايلة لها بس هي عنيدة لو الحين معها وريتك فيها===> من قهرها مني
وننطلق مع الزحمة الى بخش وزوجي مضيع الطريق ويقول ركزي معي===> وش تركيزه يابن الحلال
واشد حيلي واوصف له الطريق ونلقى الطرق مقفلة وانا اصيح وهو ارتبك وجلس يقول لو ماخذ امك معنا مو احسن ==> اختبص
ومالك بالطويلة ونوصل لفلسطين ومويه وزحمة وبالعافية نرجع وع الطواري نزلني وراح يوقف السيارة بدال ماروح يم الباب رحت لباب ثاني ولقيت 4 حريم ربي يجزاهم بالجنة يجيبون كرسي لي ويدعون لي قال وحده انت بروحك من الالم قلت ايه بعدين تذكرت ان ابو الشباب معي
واشوفه جاي مضيعني وأشر له انا هنا ويجي ع باله شاردة مكان ==> تسويها الخوافة
وادخل ع طول الولادة وتجي مصرية تكشف 5 سم واصارخ بامووووت الحقوني وتجي نوال وتبوس راسي وتسكتني وتقول انت دلوعة باقي ماشفتي الالم
ودقايق وتفقع المويه المصرية ==> نفسها براس خشمها
وتركوني حتى زوجي راح يخلص الاوراق ويزيييييييد الالم واصااااااااااارخ والا ذيك الدفعة القوية من البنت حسيت الله يكرمكم من اسفل بينفجر وشوفوا حنان الام حتى في لحظة حسيت اني باموت فيها
ااقول طلعت طلعت ( خايفة تطلع وماانتبهوا لها) ويصير فيها شي
ع دخلت زوجي سمعني وراح يركض ع الاستراحة ونادى نوال لان عندي ممرضة وحده جلست تجهز الاغراض ويوم فجعتها ماعرفت تتصرف قامت ارسلت زوجي
ودخلت امي والدكتورة سوا وبسرعة بنج ووو ووو وانا اقول لهم حراااااام عليكم بموت
وهي ترد علي مابتموتي ةانا احلف لها والله باموت ==> شافت الويل : تستاهلين مارحتي بدري
وتطلعالعروسةة وتخيط الدكتورة واحس به واجلس ساعتين والم ببطني فظيع واطلع غرفتي والخلق تنام وانا مانمت الا 11 الصبح وساعتين واصحى وبالليل اطلع ولله الحمد
وسميتها ميادة مودي قلبي لتنضم الى شقيقها نواف الي موريني النجوم بعز الظهر
وسهر الليالي والتعب ربي يعين عليه
وهذه قصتي وان اهملت جزئيات هذا من الحلوة الي تبكي ..
واي سؤال انا حاضرة