ساعدوني ما استطعم \ سؤال عن تعلم الطبخ وتم التعديل ( الاشراااف )

السلام عليكم ورحمة الله وبركاته
صباح الخير يا احلى حوائيات ،، كيفكم عساكم بخير
بعترفلكم بشي ،، انا ادش هالقسم يوميا واقعد فيه بالساعات واحفظ اطباقكم وافكاركم
مشكلتي ماعندي ثقه بنفسي وزوجي دايم يقول طبخك بايخ يامالح ياباهت
لاني بصراحه انا ما استطعم وهالمشكله مالها علاج لانها مرض وماله دوا
واستحي اقول حق زوجي اخاف مايطلعني مطاعم او يشتريلي من برا
حتى ساعات لما اروح المطعم يكون شكل الاكل حلو فاقعد امدح فيه بس هو يقول استغفر الله ع النعمه ماينبلع وكذا
حتى البهارات ما اعرف كيف طعمها ايش المفروض اكثر منه وايش المفروض احط قليل منه
ومرات اكون معزومه وابدا بالاكل مثلا فتسالني وحده السلطه فيها ثوم فيصير شكلي غلط ،، اللهم لك الحمد على كل حال
انا مدري ليش كتبت ،، يمكن فضفضه ويمكن لا
ودي اصير فنانه بالطبخ ودي الكل يمدح طبخي بس المشكله اني ما استطعم الاكل
هل تعرفون كتب يكتبون المقادير بالتفصيل الممل ،؟
او هل في وحده مثلي ولقتلها حل
ساعدوني وجزاكم الله خير