مهمومة ؟ متضايقة ؟ ما عرفتِ تحلين مشكلتك ؟ تعالي أبقول لك وش صار لي

بسم الله الرحمن الرحيم

السلام عليكم و رحمة الله و بركاته

هلا و غلا و بنات ,, كيف الحال ^^ عساكن بخير ؟

أبدخل بالموضوع على طول ,, و لا راح أطول إن شاء الله ,,

شوفن يا بنات ,, كلنا عندنـا هموم و مشاكل و لا بد يمر يوم و يصير شي يكدّر خاطرنـا

لكن المصيبة إن حنـا ما نعرف وشلون نتعامل مع هالهموم و ضيقات الصدر ,,

أبقول لكن على شي سوويته في موقفين مروا علي ,, بعدها صرت أتبع هالشي و أسوويه دائمًا لأني موقنة إن الفرج سيطرق بابي من حيث لا أدري ,,

خلوني أقول لكن موقفين و أنتن احكمن ^^ ..

مرة كنـا جالسين على الغدآ ,, و كان أبوي و أخواني و أختي الكبيرة كلهم مجتمعين ,,

و سواليف و وناسة ع الآخر ,, و كان أبوي فديت قلبه يسولف ,, و ذكر سالفة ,, هالسالفة يا بنات طعنت قلبي

أنـا أدري إن أبوي ما يقصد ,, يا لبااااهـ بس يحبني و يموت فيني , و أصلاً ما يدري إن هالسالفة تضيق خلقي !

قال أبوي السالفة آللي قالها ,, و خنقتني العبرة ,,

بس مسكت نفسي و ابتسمت و جلست أسولف و أناقش بالسالفة بسعادة و فرح تام ,, و قلبي يفررررررر في صدري أحس أبموت من الضيقة

لما قاموا أخواني .. قمت توضّيت و صليت لي ركعتين .. لأني حسيت بضيقة ,,

أول ما خلصت صلاة ,, جلست على سريري شووي ,, و إلا يجيني أخوي الكبير ,, و يبشرني بشارة طيّرت قلبي من مكانه !

هالبشارة خلّت السالفة آللي قالها أبوي تنمسح من قلبي ,, !!

موقف ثاني ..

صار خلاف بيني و بين أخوي الكبير ,, و كنت أنـا الغلطانة ,, بس غلطتي غير مقصودة ,,

عصب أخوي الكبير علي و هاوشني ,,

تضايقت و رحت توضيت و صليت لي ركعتين ,,

بعدها جاء أخوي الكبير يسلم علي و يتسامح مني ,,

سبحان الله !!

يا بنات ما قد جربتوا إنكم لما تتضايقون تقومون تتوضّون و تصلون ركعتين ؟

صارت لك مشكلة .. قومي توضي و صلي ركعتين ,

مهمومة ,, ضايق صدرك ؟ .. قومي توضي و صلي ركعتين ,

أي شي يصير لك و يكدّر خاطرك ,, قومي توضّي و صلي ركعتين ,

أنـا ما أتوقع آللي صار لي صدفة ,,

و حتّى إذا تعرفون قصة الرجل العابد آللي اسمه ( جُريج ) .. و هذي هي نقلتها لكم :

http://www.islamweb.net/media/index....ang=A&id=15363

شفتوا أيش سوّا جريج عشان يطلع من المصيبة ؟ صلّى و لجأ إلى ربّه ! و فُتحت له أبواب الفرج من حيث لا يدري !

مهوب بس هذي القصة ,, فيه بعد قصة ثانية لأحد الصحابة رضي الله عنه ,, تعرّض إليه لصًا و أراد قتله ! و لجأ إلى ربّه بالصلاة ,, و جاءهـ الفرج من حيث لا يدري

القصة تقشعر لها الأبدان يا أخوات

اسمعوها :

http://www.safeshare.tv/w/hfElHXCsXW


سبحانك ربي ,,

شوفوا كيف الحل قدام عيوننا و أسهل و أبسط منـه ما فيه مع ذلك حنـا غافلين عنه و متكاسلين لا نقوم به ,,

جربوها يا بنات ,, جربوا الصلاة كـ حل لجميييييييييع مشاكلكم ..

و عسى ربي يفتحها بوجيهكن يا الحبيبات الطيبات

منقوووووووووووووووووول ...

دعووووووووواتكم لي ...