هو للاخت غالية عاد انا غرامي سويسرا
وعجبني تقريرها كثير ماشاء الله عليها وقلت انقله لكم يارب يعجبكم مثل ما عجبني هو طويل جدا يمكن ياخذ 20صفحة بس راااااااااائع
~ ~ هُنَا يَفِيضُ الإِحْسَاس وَ تُشْبَعُ الحَوَاسْ ~ ~
(الجزء الأول)..
بسم الله الرحمن الرحيم ،،
دائماً كان هذا المنتدى المرجع الغني والمميز لجميع محبي السفر والرحلات ،
وكثيراً ما نستعين به لإيجاد المعلومات والتجارب والخبرات ،
أحببت فيه تعاون الاعضاء وسرعتهم في المساعدة و الاجابه عن التساؤلات ،
ولا يسعني هنا إلا أن أقدم شكري وامتناني إلى منتدانا أفضل المنتديات ..
في هذا الصيف كانت رحلتي مميزة والحمدلله والفضل يعود لله ثم لمساعداتكم
وأحببت أن تشاركوني أجمل اللحظات من خلال صوري وتقريري هذا
أتمنى أن يحوز على إعجابكم ...
اخترت له هذا الاسم لأن حواسك ستجد هنا ماتبحث عنه ،
عندما ترى الجبال الخضراء والاكواخ الصغيرة على مد نظرك ..
وتسمع خرير مياه النهر وانت على سريرك ..
وتشم رائحة الخبز في الصباح والورود المتفتحة لاستقبال يوم جديد ..
وتذوق مالذ وطاب من الفاكهة والشوكولاته الفريدة ..
وتلمس كل هذا بيديك وتتحسسه أمامك ..
فقط أقول
~ ~ هُنَا يَفِيضُ الإِحْسَاس وَ تُشْبَعُ الحَوَاسْ ~ ~
اسمحولي اتكلم بالعاميه لبساطتها في سرد التفاصيل .
في البداية حبيت أعطيكم بعض المعلومات العامة عن الرحلة :
بداية الرحلة :15-7-2010
نهاية الرحلة : 1-8-2010
عدد المسافرون : 6 كبار + 1 طفل (8 سنوات)
خط السير :
الرياض >> باريس >> انترلاكن >>زيورخ >>روست >>باريس >>الرياض
الطيران : الخطوط الجوية العربية السعودية
ساعة الإقلاع :11 ص - يوم الخميس
~ ~ هُنَا يَفِيضُ الإِحْسَاس وَ تُشْبَعُ الحَوَاسْ ~ ~
اليوم الأول - الخميس (15-7) ..
صحينا الصباح بدري عالساعة 7 تجهزنا وأخذنا شنطنا وتوجهنا للمطار،
كانت رحلتنا تقلع الساعة 11 تقريباً
من مطار الملك خالد الدولي في الرياض إلى مطار شارلي ديغول في باريس،
مدة الرحلة كانت 6 ساعات تقريباً، وهذي بعض الصور من الطائرة ..
عند وصولنا مطار باريس وبعد استلام الشنط أخذنا تاكسي فان إلى الفندق بقيمة 70 يورو
وكان صاحب التاكسي عربي من الجنسية المصرية ..
صور من المدينة المحبوبة باريس خلال طريقنا إلى الفندق ..
محل GOCCI
الحمدلله وصلنا الفندق ..
اسم الفندق: concorde montparnasse
تم الحجز عن طريق موقع : yeego.com
سعر الغرفة مع الافطار : 104 يورو
وانصح كثير بهذا الموقع لانه يوفر اسعار اقل لبعض الفنادق
وايضا يجمعلك نقاط تستفيد منها عن طريق خصم في الحجوزات القادمة ..
الفندق مرتب ونظيف وصغير حتى الغرف صغيرة لكن يميزه موقعه الهادئ
بعيد عن الإزعاج والتجمعات وأخذناه ليلة واحدة ..
بعدما ريحنا شوي بالفندق وصلينا طلعنا علشان نشتري تذاكر القطار لليوم الثاني،
طيب نوقف شوي عند (تذاكر القطار) <<<
فيه سالفه لازم الكل ينتبه لها ويرتبها من بدري وهي (استئجار السيارة) + (نافيقيشن)
((قبل السفر بكم يوم))
اتصلنا على يوروب كار علشان نستأجر سيارة ل7 أشخاص
وكنا ناوين نستلمها من باريس ونسلمها في باريس عند العودة
لكن موظف الشركة قال لايوجد سيارة متوفره في باريس
يا ابن الحلال دور من هنا من هنا قال مافيه
قلنا طيب خلها من انترلاكن قال برضو مافيه
وبحثنا في شركات غيرها وعن طريق النت ونفس الكلام
طيب والحل!!
كل خطتنا مرتبه على اساس بيكون معنا سيارة !!
جلست أفكر بعدين فتحت قوقل ايرث وصرت ابحث عن أي مدينة تكون على طريقنا الى انترلاكن
لقيت مدينة اسمها باسل (basel) وهي مدينة سويسرية قريبه من الحدود الفرنسية
ولما سألت يوروب كار عن توفر سيارة في هالمدينة قال موجود آخر سياره تكفي ل7 أشخاص
يوووووه الحمدلله بس احجزها لو سمحت ..
رقم اليوروب كار : 920000153
نرجع الحين (لتذاكر القطار) <<<
حجزنا القطار المتوجه من باريس الى باسل (basel) في الصباح ،،
الوقت لسا بدري على النوم فقرننا ناخذ الميترو ونروح نتمشى شوي في شارع الشانزليزيه ونتعشى هناك ،
وبعدها رجعنا للفندق وجهزنا أغراضنا ونمنا استعداداً لرحلة القطار الصباحية ..