زوجي تزوج علي 7 مرات ماذا افعل؟

السلام عليكم

اولا احب انوه اني استعرت هذا الحساب من بنتي علشان انزل مشكلتي لان ما عندي حساب خاص، ثانيا انا مشكلتي مستعصية ومتشعبة ورح احاول اختصرها قدر المستطاع وكل ما اطلبه منكم اخواتي انكم تساعدوني بنصيحة او استشارة او حتى بدعوة صادقة، مالي بعد الله غيركم


انا لي متزوجة 28 سنة وعندي 4 بنات وولد اصغرهم في 12سنة، اغلب حياتي مع زوجي هم وشقا وجروح وذكريات مريرة، جرحني واذاني زوجي واهله من بداية زواجنا في امور كثير بس كنت اتغاضى عشان بناتي وخوفي عليهم، ما قصرت في حقه ولا حق عياله، ولا بخلت عليهم بريال لاني انا موظفة تقاعدت قبل سنتين، احط فلوسي في بيته واجيب واشتري ولا اخلي قاصر، لين ما عاد معاي ريال واحد ممكن اامن مستقبلي، ولا املك الا راتبي التقاعدي الي نصه رايح ديون وتقسيط، كنت حافظته وحافظه عياله خصوصا ان من بداية زواجنا وهو حاب يكمل دراسته وكان يسافر عشان يدرس وانا اقعد في البيت اربي العيال واثث البيت واشتري من كل زين واحط له وازين له عشان لما يرجع يلقى كل شي جديد، كان يسافر تقرييا 15 يوم ويرجع لي لين خذا الماجستير والدكتوراه، صحيح من بداية زواجنا وهو مبهذلني ومقصر في حقي ويجرحني بس كان دايما يرجع لي ويعوضني بأشياء ثانية، لين قبل 4 سنين تقريبا تغير الرجال علي كليا وصار يعاملني معاملة زفت وراكني على الرف ما كأني له زوجة، وكان يبخل علي وعلى عياله ولا يمدنا الا ب 50 ريال ولا 100 ريال، ودايما يقولنا مزنوق ولا عنده فلوس ولازم نخفف طلباتنا، يا كثر ما طلبوه عياله يسفرهم ولا يوديهم، وياكثر ما طلبته يغير اثاث البيت او يحط بلاط في الحوش، كان دايما يتعذر ان ما معاه فلوس لا لسفر ولا لاثاث ولا لاي شي، ولازم نقتصد في كل شي ونحرم نفسنا من كل شي، هذا طبعا غير المعاملة السيئة، كان يلعنا ويسبنا كل ما طلع وخرج، ويقول انتي وعيالك فاشلين، وقبل تقريبا شهرين قال بيودينا دبي بر يعني على السيارة لان ما فيه فلوس للطيارة، يبغى يسكت عياله لانهم ناشبين فيه من 3 سنين يبغون يسافرون، ولما رحنا كان ينافخ في السيارة، وبعد وصولنا بساعات اكتشفت بنتي رسالة جت على جواله بعد 15 اتصال، كانت الرسالة تقول( ليه تودي عيالك وتخليني، وليه ما قلت لي انك رح تسافر يوم كنا مسافرين تركيا)، طبعا طلعت هذي زوجته متزوجها من سنة ونص، ومن وقت ما شفنا الرسالة وعرفنا انه متزوج بدأت علومه تظهر، وعرفنا عنه بلاوي انه قد تزوج علي 7 حريم من بينهم xxxxx، واغلبهم ارامل او مطلقات، ووxxxxxx الي تزوجها كان مقعدها معي انا وبناتي وفاتح لها مشغل ونآكل معها ونشرب ونسولف  وانا ما كنت ادري انها زوجته على اساس انها زوجة صديقه، يعني فلوسه كانت تروح على المهور وعلى تأثيث الشقق وعلى شهور العسل وعلى الحريم ومصاريفهم، اثث الدور الي سكن فيه زوجته الاخيرة ب80 الف ريال غير سفرة تركيا والمصاريف الثانية، وانا وعيالي كنا نطلب حتى 100 ريال يطلعها بقرف كأنه يتصدق علينا!، يعني حتى لو تزوج ما عدل بينا ولا انصف، طبعا يقول انه طلقهم كلهم ولا باقي على ذمته الا هذي الاخيرة الي اثث بيتها ب80 الف، وبعد ما ضغطوا عليه عياله طلقها شفهي بس لما كلمتها انا تحلف انه ما طلقها وفهمت انها متعلقة فيه ولارح تتركه في حاله، ترسله من ذي الرسايل الرومانسية عشان تشده لها، وانا الى الحين مدري هو طلقها اصلا ولا ما طلقها، وانا كيف اتصرف؟ كيف اقعد له في البيت بعد كل هالجروح الي سواها، كيف اتحمله واعيش معه كزوجه ونفسي عافته ولا صرت متقبلته، ماقعدت معه الا عشان بناتي كانوا رح يروحون من بين ايديني، وحدة منهم انشل لسانها من القهر، وانا والله ماني قاعدة الا عشانهم، بس وانا مين يحس فيني؟ انا كل يوم اموت مية موتة وانطعن الف طعنة كل ما اشوفه قدامي واتذكر الي سواه فيني، وكيف عذبني، وكيف فضل علي الارامل والمطلقات!!، وكيف كان يتكلم علي قدامهم ويسبني ويسب عيالي، ياليت تشورون علي جزاكم الله خير لاني اتعذب