احكمى بنفسك على درجة نضافتك... منقول للامانة والفائدة

احكمى بنفسك على درجة نضافتك...

جاوبى ع الاسئله دى..

انتى يا ست البيت الوحيده اللى عارفه درجة نضافته

بدليل ممكن الكل يقولك ده فل وانتى ف نفسك تقولى مش اوى

نبدأ بقا... كل واحدة تجاوب ع الاسئله اللى جايه و احسبى درجتك وف الاخر تعرفى مستوى النضافه الحقيقى

وتشجيعا منى ليكى بقولك

كل سؤال تجاوبى عليه غلط حطى لنفسك غرامه ...مثلا جنيه لكل سؤال
او عشرة جنيه
او ميت جنيه
وكل برغوت على اد دمه
وجمعى مجموع الغرامات كلها
وتصدقى بيها
وانوى تدخلى الموضوع تانى وتجاوبى تانى وتالت لحد مييجى يوم وميبقاش عليكى غرامات خالص

وساعتها لما تجاوبى كله صح...عندى ليكى مكافأه كبيييييييره

تصدقى تانى شكرا لله على نعمة النضافه

مش ديننا بيقول ...النظافه من الايمان

يبقا لما نضافتنا تتحسن كاننا حسننا جزء من ايماننا..صح؟

يلا نبدأ الاسئله....

1*بتنامى ومطبخك فله ولا بتاجلى حاجه لتانى يوم؟؟

2*بتغسلى المواعين اول باول ولا بتستنى لما تجمعى كميه تستاهل الوقفه؟

3*لما بتخلصى طبيخ لو اتبقا حاجه لتانى يوم بتفضيها ف اناء اخر او علبه ولا بتحطيها ف التلاجه بحلتها؟

4*بتسيبى اكل مكشوف ولا دايما بتغطيه؟

5*لو اضطريتى تاجلى المواعين بتشيلى منها بواقى الاكل ولا بتسيبيها لحد متيجى تغسلى؟

6*لو حد شرب شاى ومش هتغسلى الكوبايه دلوقتى بتسيبى فيها التفل ولا بتديها شطفه ع الماشى؟

7*بتغسلى البوتاجاز بعد نهاية يومك ف الطبخ ولا كل متحسى انه اتوسخ وكفايه عليه كده؟

8*لما بتخلصى يومك بتمسحى ارضية المطبخ ولا مش شرط كل يوم؟

9*لما بتمسحى المطبخ بتنضفى تحت البوتاجاز وف الاركان ولا الكلام ده ف المواسم بس؟

10*كيس الزباله بينقط كتير ولا بتعملى حسابك وتحطى مثلا كيس ف قلب كيس؟

11*لما بتفضى جردل الزباله بتغسليه ولا مش بيخطر على بالك؟

12*بتغسلى التلاجه اول باول ولا لما تحسى انها هتنطق من قلة النضافه؟

13* لما بتشترى خضار مثلا بتشيليه ف التلاجه بكيسه ولا بتشيليه من كيسه الاول؟

14*بترتبى ضلفة الخزين وتنضفيها اول باول ولا ف الاعياد؟

15* لما بتغرفى الاكل بتساوى حرف الطبق ولا بتسيبيه ملحوس وتقدميه كده؟

16*بتغسلى كل المواعين بسلكه او ليفة واحده ولا مصنفاها حسب الزفاره مثلا والدهون؟

17*شفاط المطبخ بتغسليه لما يغمق جدا ولا اول باول؟

18*فوط المطبخ متلخبطه على بعض ولا مثلا اللى بتنضفى بيها غير اللى بتمسكى بيها غير اللى بتنشفى ايدك فيها؟

19*بتغسلى فوط المطبخ بانتظام ولا كل فين وفين؟

20*لو صاحبتك او جارتك جت فجاه مطبخك يشرف ولا لأولا نص نص؟
ودى كانت اسئلة المطبخ

انتظروا باقى اجزاء الشقه

عندك 20سؤال...كل سؤال ب 5درجات

لو اجابتك كامله ادى نفسك 5من5

ولو معاكس تماما ادى نفسك صفر من خمسه

ولو حاسه انك بين البينين ادى نفسك 2.5 من خمسه

وف الخر هتلاقى مجموع درجتك من 100

وعلى اساسها تتقدمى خطوه لادام وتشوفى اللى محتاج تظبيط

وتفضلى ترجعى للموضوع كل فتره لحد ماتاخدى 100من100

وانا زيكو هحاول احسن درجتى اصلها مش حلوة..

اهم حاجه ايا كانت درجتك تصممى انك تحسنيها