هااااهي مشكلتي بين ايديكممم >> تم الرد عليه

الأسرة والمجتمع

السلام عليكم ورحمت الله وبركاته
قبل ان ابدا بمشكلتي انا ذكر ولست انثى
يعني انا رجااااااال
استعرت معرف شقيقتي
لأكتب هذه المشكله التي اتعبتني واريد حل من صاحبات الرأي السديد
يمكن تكرهون وجودي لكن لم أأتي لاتطفل عليكن
لا والله لم ولن ادخل غير موضوعي هذا
بل لكي لا اهدم بيتي
او اتخذ قرار ومايكون صائب
كتبت مشكلتي في منتدا اخر ولكن لم اجد الحل
لعلي اجد ضالتي عندكم
ونذرآ علي ان لا ادخل هنا غير موضوعي
ورجائي من المشرفين على هذا المنتدى ان لا يحذفو موضوعي حتى اطلع على الحلول
بالبدايه انا عمري 29 متزوج وزوجتي اصغر مني ب 3 سنوات وعندي بنت عمرها 9 شهور > حفظها الله لي
زوجتي وحيدة امها وابوها
وما انجبوها الا بعد عقم دام 15 سنه ولم ينجبو غيرها
وهذي اساس مشكلتي انا
ام زوجتي تعشق بنتها بجنون بحكم انها وحيدتها
قبل ما اخطب كانت ام زوجتي ترد الخطاب الي يجون و يخطبون بنتها بدون ماتشاور البنت لأنها تحبها وماتبيها تتزوج وتخليها
والبنت ماكان عندها علم بالخطاب
وانا تزوجتها عن طريق خالتي كانت زميلتها بالدراسه
وكانت دايم خالتي تسولف عنها قدامي واعجبت بأخلاقها وطلبت من خالتي تجس نبض البنت ان كان لها خاطر بالزواج عشان اتقدم رسمي
وبعد اسبوعين جاني اتصال من خالتي تقول ان البنت موافقه استبشرت خير وعطيت الوالده الاشاره الخضرا عشان تتواصل مع ام البنت وتخطبها
والوالده جزاها الله خير من بكرا دقت تخطبها وتتفاجئ برفض الأم وان بنتها رافضه الزواج >> طبعا الأم رفضت بدون علم بنتها
لا اخفيكم انصدمت من رد امها
ماكنت ادري ان الأم ماتبي تزوج بنتها
ودرت خالتي بالرفض واستغربت هي الثانيه
من بكرا سالت صديقتها ليش امها رفضت واستغربت البنت لأن امها ماشاورتها وقالت ماعندي علم
ووعدت خالتي انها تسأل امها وتناقشها
المهم مابي اطول عليكم
بعد مد وجزر واخذ وعطى وافقت الأم وهي مكرهه لكن مصير البنت تتزوج
وكنت انا ابي البنت وشاريها
وبديت اجهز لعش الزوجيه
مرت الأيام وانا انتظر يوم زواجي
وقبل زواجي بشهر جاني انتداب اجباري لجده 6 شهور
وكنت ناوي اتزوج واروح انا وزوجتي لجده الى ان ينتهي الأنتداب
ومن درت ام زوجتي بالخبر لتفاجئني بأتصالها وتطلب مني نأجل العرس الا ان يخلص الانتداب
قالت مابي بنتي تبعد عني حاولت اقنعها ووعدتها كل اسبوعين نجي لكن رفضضضت ولأني عارف انها رافضه الزواج خفت تلقاها حجه و سبب وتبطل الزواج من الاساس قلت ابطاوعها وأأجل الزواج
راحت ال 6 شهور وتزوجنا
ورحنا للفندق وامها كل ربع ساعه تتصل تتطمن
وكنت اقول لزوجتي قفلي الجوال عشان ناخذ راحتنا وكانت ترفض تقول عشان امي
نسيت اقولكم كنت ناوي شهر العسل اسبوعين بماليزيا وام زوجتي رفضت ماتبي بنتها تبعد بعيد
وطاوعتها وكنت اقول بنفسي بكرا اتزوج وتتعود ام زوجتي على بعد بنتها
مادريت وش الايام مخبيه لي
سافرنا داخل المملكه شهر العسل
ووالله من ثاني يوم تتصل تقول خلاص ارجعو
كانت متعلقه ببنتها حتى الجنون
جلسنا 5 ايام وعشان امها رجعنا
طبعا كل يوم تبي بنتها تجيها
وفرضت علي الخميس والجمعه لازم تنام زوجتي عند اهلها
وزوجتي شخصيتها ضعيفه جدآ جدآ جدآ
تخيلو بعض الأحيان اكون طفشان الخميس اتصل على زوجتي عشان ترجع معي البيت
هي ودها ترجع بس ترفض عشان تخاف من امها
وتترجاني عشان ما اضغط عليها
حاولت اتسامح واتغاضى واقول بنفسي فتره وتعدي
لكن الازمه كل مالها تزود
@ ام زوجتي طيبه معي جدآ عشان كذا كنت احاول اكسبها وما اعاند @
ومرت الايام واي مكان بتروحله ام زوجتي لازم تاخذ زوجتي معها لو بتروح مراجعه في مستشفى
لازم تمر زوجتي ولو ارفض تقول انا عطيتك بنتي اغلى من روحي
وما اغليتها عليك
انا صرت اتضايق ولو ارفض يضيق صدر زوجتي وتجلس تبكي وتترجاني عشان امها ماتزعل وصارت زوجتي بين نارين ماتدري من ترضي
وانا والله صرت اطفش
تطلع الصبح وتطلع العصر وخميس وجمعه تنام عند امها
صرت ما اصدق نجلس يوم لحالنا
حملت زوجتي وتوحمت وترجتني ام زوجتي ان بنتها تجلس عندها فتره ووافقت توقعت تجلس اسبوع او اسبوعين
لكن طالت المده ل 3 شهور
وكل ما اتصل على زوجتي اقولها خلاض بمرك تقول مدري اسأل امي
ادق على ام زوجتي اقولها خلاص بمر زوجتي تقول لا حرام عليك تعبانه وخطر عليها واخاف تشيل شي او تتعب نفسها خلها عندي الين تولد
قلت لا ياخاله معليش انا ماتزوجت عشان تجلس زوجتي عندك
قالت هي بنتي ومايصير تحرمني منها
قلت انا ما حرمتك بس كل شي بحدود وانا ابي زوجتي وووو واقنعتها وجبت زوجتي وارسلت امها معاها شغاله عشان ترتاح زوجتي
مع ان زوجتي حملها طبيعي وماعندها مشاكل بس امها تحتاط
ومن السابع صارت تحن على بنتها تجي عندها عشان تخاف تجيها ولاده
وصبرتها لنص الثامن وراحت وخلصت التاسع وجابت بنتي الله يقر عيني بصلاحها
وخلصت نفاس وانا كنت اتحرا طلعتها لأنها من الثامن وانا عزوبي
خلصت الاربعين
كلمت زوجتي ع اساس اتفق معها متى اخذها قالت امي عيت تقول توك لازم تجلسين الين تكملين شهرين من الولاده
انا جن جنوني خلاص نفذ صبري وتهاوشت مع زوجتي وطلعت حرتي فيها وسكرت الخط بوجهها وصارت تتصل ما ارد وترسل وانا ساحب وقلبي يتقطع وكانو زملائي بيسافرون اسبوعين اخذت اجازه وسافرت وماخبرتها كنت ابيها تنشغل وتحاتي وقفلت جوالي ورحت وانا والله بالي مشغول معاها بس قلت خلها يمكن تحس فيني
بعد اسبوع فتحت جوالي لقيت اتصالات ورسايل بالهبل منها
طبعا كانت خايفه علي
قلت خلاص بترك جوالي مفتوح وان اتصلت برد
بعد ساعتين اتصلت ورديت وانا زعلان >>والله كان قلبي يتقطع عليها بس لازم اكون جاد عشان تحس فيني
قالت وينك قلت وش تبين
قالت بس احاتيك
قلت مالك دخل إذا خلصتي الشهرين جيتك
قالت حرام عليك انا تعبانه ومدري ايش وبنتي لي اسبوع مدري عنها من الهم
احسب فيك شي
قلت بخير ومبسوط ومتى ماسمحت امك انك ترجعين اتصلي علي
قعدت تتعذر وانها تحبني بس تخاف من زعل امها
عدت االايام وجت لبيتها وكنت متلهف ومليت من الوحده
كنت مخطط نسافر عقب الحمل والتعب بس قالت بسأل امي
قلت اجل مدام بتسألين امك هونت قالت بكيفك
تصدقون بعد ماولدت زوجتي
زادت الحاله عند ام زوجتي وصارت تتعلث ببنتي وانها توله عليها
وصارت من العصر الى الليل عند امها يوميا
وان رفضت اتفاجى بأم زوجتي تتصل تترجاني وخانقتها العبره شكيت لواحد من اخوياي قال لي خلك شديد وصارم وقلها غير الخميس والجمعه مافيه تروحين
وقلتها كذا وصارت تقولي امي بتزعل علي قلت مالي دخل وزعل امك مو في محله
وحرمتها فعلا بس زعلت امها عليها وصارت زوجتي كئيبه وحزينه وما استفدت شي ومن تحط راسها على مخدتها يبدا موال الدموع للامانه ماكانت تشتكي بس صارت حزينه
وصارت ام زوجتي تتصل تترجاني انا وحيده انا مالي غير هالبنت انا عطيتك روحي مع بنتي وكانت تخنقها العبره ورحمتها ورجعنا على موالنا الأول تروح لأمها يوميآ او امها تمرها ويطلعون اي مشوار
بس انا اطفش ماعندي طلعات الا الأحد والثلاثاء باقي الاسبوع اكون فاضي
صرت احس بفراغ واحس ماني متزوج وان اشتيك لربعي قالو تزوج وانا ما افكر بالزواج احبها وما احسه حل وزوجتي قلبها طيب
قبل اسبوع كانت ام زوجتي بيسافرون الشرقيه وطبعا لازم تبي بنتها تروح معاها
واتصلت علي قالت ابي بنتي تروح معي
قلت لا انتم روحو وانا اجيبها>> وماكنت ناوي اوديها لأن بنتي تعبانه والشرقيه برد واكيد بيطلعون يتمشون وبنتي بيزيد تعبها
راحو 3 ايام وكانت تتصل على زوجتي زعلانه ليش ماجيتوا وكانت زوجتي تتعذر اني تعبان وما اقدر اسوق سيارتي
وارسلت لي ام زوجتي وقالت انت وعدتني تجيب بنتي لي بالشرقيه ليش تخلف الوعد
قلتلها بنتي صغيره و تعبانه واخاف عليها
قالت انت تحرمني من بنتي ياليتك تطلقها
عقب كل التضحيات صرت انا الي احرمها
سفهتها مارديت عليها
ورجعو ورحت يوم السبت الدوام
وبأذان الظهر تتصل علي زوجتي تصيح قالت ان امي جت الصباح وجلست تضف ملابس زوجتي عشان تروح معها
وقالت اني جلست اترجاها
وانها قالت ان ماجيتي معي فقلبي غضبان عليك ليوم الدين
وراحت زوجتي بعد ماشالت كل اغراضها عشان ترضي امها
انا انصدمت وتهاوشت معاها ورحت لبيت ام زوجتي وابليس يمشي معي كنت ناوي اطلع حرت ال 3 سنوات
دخلت البيت وصارت مشاده بيني انا وام زوجتي
وزوجتي واقفه تبكي ومحتاره وكانت ام زوجتي تبيي اطلق زوجتي
تقول ما اتحمل فراقها
تقول انت ربي بيرزقك بزوجه غيرها
بس انا ماعندي غير هالبنت وربي ماعطاني غيرها
وكانت زوجتي تناظرني وتأشر تقول مابي الطلاق
وصرت احاول اتفاهم انا وامها
بس امها الا تطلقها التفت لزوجتي وقلتلها اختاري يا أنا يا أمك والقرار لك يازوجتي
قالت اصبرو نتفاهم
قلت ياتجين معي الحين والا خلاص بدور غيرك وجلست تصيح قالت مقدر ازعل امي
رحت واخذت بنتي الصغيره من القهر وقلت خلي امك تنفعك
صارت تلحقني الين الباب تصيح وتترجا >> والله كان قلبي ينزف بس نفذ صبري وكنت ابيها تفكر ببنتها
واخذت البنت ورجعنا نمنا وانا اخذت اجازه الاسبوع اللي طاف عشان مقدر اخلي بنتي وهي ترسل تترجاني عشان البنت
وانا بودي البنت لها بعد شوي لأن بنتي حرام تنحرم من امها ومالها ذنب بمشاكلنا
انا احب زوجتي ومابي اطلقها

سبق اني قلت لزوجتي صيري زوري امك الصباح
يعني وانا طالع لدوام اوديها
وارجع الظهر نتغدا مع امها سوا
و باذان العصر نرجع بيتنا
وبكذا تكونين زرتي امك كل يوم
وبنفس الوقت اكون مافقدتك
ومشينا فتره على هالموال
لكن اول ما ادخل بيتي
وعلى بال ما اصلي العصر و اغير ملابسي
ما ادري الا ام زوجتي متصله عليها
تقولها اجهزي بمرك بنروح المكان الفلاني
وان عييت قالت طول عمري بنتي ما اروح مكان الا هي معي
انت بتحرمني من بنتي
وما احب اروح لاي مكان الا بنتي معي
وتطلع مع امها وماترجع الا بالليل
بعض الاخوات ردو وقالو حرام عليك
هذي وحيدها ومن هالكلام
وانا ادري
بس امها تبي بنتها عندها بالاشهر
حتى الزياره يوميا ماعاد تكفيها

بس تعبت كأني عزوبي
وانا اهلي بمدينه ثانيه
ودي اعرف من الغلطان فينا
لاتستغربون وجودي هنا
ابي اعرف رأي المرأه في مشكلتي لأن اشتكيك لربعي احد يقولي طلقها واحد يقولي تزوج عليها وانا مابي اظلمها
لو سمحتوا ابي اراء وحلول
مابي تعليقات وتريقه
انا داخل هنا ابي حل
مادخلت عشان اوسع صدري

لا اله الا الله
اللهم صلي على محمد
340
39K

هذا الموضوع مغلق.

علامو علامو
علامو علامو
للرفع
صمت الرح ــيل
صمت الرح ــيل
الله يكون في عونك اخوي بصراحه هذي حياة لاتطااق
انا من رأيي تتزوج وتترك زوجتك عند امهاااا وتزور بنتك بين فتره والثانيه
افضل لك من هذا العذاب .. والله يكون في عونك اخوي ويفرج همك بأذن الله
تقبل مروري..
worda
worda
الله يعينك ويصبرك بس الصراحة موقف زوجتك صعببببببب مرررررره وانت من البداية كنت عارف انا امها ماعندها غيرها يعني يبغالك تتحلى بالصبر أكثثثثثر وربي بيفرجها عليك أنا أدري أن امها غلطانه بس زوجتك مسكينة وهي تبغاك طالما هي تبغااااك أنت تمسك فيها اكثثثثثر علشااااان تعلرفوا تواجه الحياه.. كم عمر زوجتك الحين؟؟؟؟؟؟
jonon89
jonon89
انا من راي يا اخي انك تحاول مع زوجتك عشان تقوي شخصيتها و تواجه امها و الله معاك
مروج الموج
مروج الموج
اخوي عذرا عشان اعطيك حل ابي اعرف ابو زوجتك وينه؟ هل هو عايش او متوفى؟ واذا هو عايش وش شخصيته بالضبط؟