بنات ولدت بحمد الله .. وتجربتي مع السعودي البريطاني

الحمد لله ولدت وجبت أحلى بنوته في المستشفى السعودي البريطاني ..( ولاده طبيعيه )

تجربتي معه كانت رائعه جدا وومتازه.. في البدايه دخلت قسم الطوارئ وطلبت الدكتوره (فايزه مطري) وكان وقت دوامها بعدين طلعوني لغرفة الولاده وكانت معي ممرضه لبنانيه او اردنيه مره حنونه ولا فارقتني ولا دقيقه والدكتوره كانت تجيني احيانا واحيانا الدكتوره المناوبه وكان عندي نبض الجنين يطلع وينزل يعني غير منتظم ورغم خوف الدكتوره ألا انها ما أوحت لي ولا خوفتني إلى ان حانت ساعة الصفر وجتني الولاده الحقيقيه وكانت بحضرت الدكتوره وكان نبض الجينين ينزل والدكتوره طلبت أني أساعدها بالدفع بدون ما تقول لي أن الجنين منخفض نبضه والرحم عندي بس مفتوح 8 سم وطلبت مني أدفع ولا حتى سوت لي توسيع لأن حالتي احتمال تستدعي عمليه والحمد لله حاولت أدفع الجنين والحمد لله ولدت طبيعي ..
وبعدها أخبرتني الدكتوره ان عندي مشكله وبررت انها ما خبرتني عشان ما أخاف وأرتبك ولا أقدر أساعدها بالدفع وهذا يثبت أنهمما يستعجلون على العمليه .
وبعدين طلعوني للجناح أنا طبعا حاجزه جناح أميري والحين أوصف لكم الاهتمام والعنايه .

1\ الجناح كان مره خيالي ونظافه مستمره والعامله كل شوي تدخل تنظف

2\ ألوان ديكور الغرفه كانت مره رائعه وألوانها ناريه درجات الاحمر والأورنج ..

3\ الممرضات في الخدمه أربعه وعشرين ساعه ولما تضغطين جرس النداء مايطفى عندهم ألين تجي عندي وتحط على الزر اللي عندي مغناطيس تأكد للمرضات أنها وصلتني ..

4\خلال يومين جاني خمس دكتورات يتأكدون إني ما أحتاج شي ومع قياس الضغط والسكر

5\الضيافه .. كانت عندي وصيفتين ( صباباتين ) جنسيتهم كينيه ووحده منهم اسمها مريم لا تفوتونها اذا رحتو أطلبوها .. بالاضافه انهم موفرين القهوه والشاي والفناجيل والتمر .. يعني شي رائع وفندق خمس نجوم .

6\ المسؤلات عن الجوده والنظافه والخدمات عربيات يجون كل شوي يسألون إذا عندي ملاحظه او انتقاد .

7\فيه وجبات لك وللمرافق طبعا بإختيارك من القائمه .

نجي عاد للحضانه ..

الطفل أول ما اطلبه يجي عندي وطبعا والأهم عندي بالغرفه شاشه أراقب طفلي فيها طول ماهو في الحضانه يعني إذا صاحت بنتي أقعد أتفرج عليها وإذ اجاعت بنتي يتصلون علي يسألوني إذا أبغى أرضعها طبيعي أو أقولهم يعطونها صناعي..

وأخيـــــــــــــــــرا .. تجربتي معه كانت رائعه مع أني كنت متخوفه منه من كلام البنات

وكلفتني الولاده مع الاقامه يومين في جناح أميري 7500 ريال .

دعواتكم لي ولبنتي .. وهذي تجربتي الشخصيه وحبيت اكتبها عشان أفيدكم مثل ما استفدت منكم كثير.