طريقة عمل المعمول الفلسطيني

السلام عليكم ورحمة الله وبركاته
انا كل الوقت ما كان يزبط معي المعمول مع انني دايما اسال عن العيارات واجرب لحد ما كنت مرة عند سلفتي الله يذكرها بالخير وقدمت معمول وكان طيب كتير سالتها عن العيار وعملته على طريقتها وزبط من يومها اعتمدت هالطريقه
كيلو سميد
كوب طحين
2مرجرين مذوب وبارد وناخد بس الزيت المي اللي من تحت نتركها
1باكيت زبده صغير250
5حبات مستكه
رشة محلب
شوية مزهر
رشة فانيل
كوب ونصف ماء فاتر
ناخد كمية السميد ونضيف المرجرين والزبده ونعجنهم منيح بيصير عندنا عجينة مفتته نتركها شوي ونرجع نعمل نفس اللعمليه مع الدعك ليومين كل ما دعكتي العجينه بتحسيها صارت ناعمه وهذا السر انه السميد ما يفتت بعد يومين نضيف الطحين مستكه مطحونه محلب مزهر فانيل والماء اافاتر نضيفه شوي شوي حتى يصير عندنا عجينه متماسكه اذا شفتيها بحاجه لرشة طحين ممكن ترشي شوي
للحشوه ممكن نص كيلو عجوة مع ربع كيلو جوز مفروم تزيدي رشة قرفه قرنفل وشوية زيت ذره نعجنهم مع بعض تعملي طابات صغيرة تحفريها حطي شوية من العجوة سكريها واطبعيها بالقالب الخاص بالمعمول
وفيه حشوة تانيه جوز مطحون مع قرفة وسكر
وكمان فستق حلبي مع مزهر وسكر
نخبز المعمول في فرن متوسط الحراره بس تحسي الحبه نشفت مش ضروري تاخد لون بتكوني محضره سكر بودره وبعد ما يبرد نرش على الحبات
وكل عام وانتم بخير