اللى بيحب ياكل تورته خفيفه يتفضل..........يا هلا بيه

فيه تورته خفيفه قوى بيحبوها الأطفال وبيحبوها الكبار وصدقونى مش بتاخد وقت
بس سامحونى مفيش كاميرا علشان أحط الصورة ولو فيه أى سؤال أنا تحت أمركم

تورته الجيلى بالموز

مقادير الكيكه

8 بيضات
كوب و ربع دقيق
كوب سكر
باكو فانيليا
باكو بيكنج بودر

الجيلى3
3 باكو جيلى فراوله (أنا بستخدم كوكس )
حوالى 1/2 كيلو موز

أولا يتم تحضير صنيتين مقاسهم زى بعض (يفضل مقاس 28)
الصينيه الأولى يتم وضع طبقة من الجيلى فيها وتركها بالتلاجه

تحضير طبقة الجيلى
يتم أخذ كيس ونصف من الجيلى مع 2 كوب ماء وندوبه جيدا ثم نضعه على النار واول ما يغلى نطفى عليه
نصب المقدار فى الصينيه ونتركه ليبرد
نقطع الموز حلقات بالورب حتى تعطى شكل جيد ونبدأ فى رصها بداخل صينيه الجيلى على شكل دائره من الخارج إلى الداخل حتى ننتهى فى المنتصف فيكون شكل الموز حلقات
وندخلها إلى الثلاجه

طريقه عمل الكيكه
يتم ضرب البيض لمده خمس دقائق ثم يضاف اليه السكر ونستمر فى الضرب بالمضرب الكهربائى لمدة نصف ساعه ثم نضيف الفانيليا وفى أثناء الضرب يتم تشغيل الفرن ليكون ساخن عند ادخال الصينيه
نوقف المضرب
يتم نخل الدقيق مع البيكنج بودر ويتم إضافته إلى خليط البيض والسكر بخفه شديده مع التقليب فى شكر دائرى حتى لا يخرج منه الهواء

نبطن الصينيه بطبقه بسيطه جدا من السمن ثم الدقيق ونزيل الدقيق الزائد بالتخبيط على الصينيه
يتم صب الخليط بالصينيه وندخلها إلى الفرن هادى وليس عالى الحراره حتى لا تحترق الكيكه من الخارج وتظل نيه من الداخل
الفرن الحامى يتم التسويه به حوالى 30 دقيقه أما إذا كان بطئ فيكون 45 دقيقه ولا يتم الفتح على الكيكه قبل مرور 30 دقيقه حتى لا تهبط
ونعلم انها استوت عندما تترك الكيكه جناب الصينيه نخرجها على منخل سلك حتى تبرد

فى أثناء ذلك يتم عمل الجزء التانى من الجيلى
الكيس ونصف المتبقى مع 3 كوب وماء ويدوب على البارد ثم يوضع على النار وأول ما يغلى نطفئ ونتركه حتى تبرد

نخرج الصينيه الموجود بها الجيلى من الثلاجه ونضع فوقها الكيكه البارده وبملعقه نبدأ نسقى الكيكه بالجيلى المخفف بعد ان برد ونسيقها جيدا واحده واحده حتى نتأكد أن الكيك تشرب كله بالجيلى ثم نعيد الصينيه إلى الثلاجه ونتركها لتتماسك جيدا

عند التقديم نأخذ الصينيه ونلفها بخفه على شعلة البوتجاز ونهز الصينيه عندما احس انها فكت من الصينيه نقلبها فى طبق التقديم فتكون الكيكه فوقها الجيلى الأحمر بحلقات الموز
يفضل عملها من المساء لتانى يوم
مع مراعاه عند تجهيزها للتقديم لا نضع الصينيه على النار ونستخدم النار بحذر حتى لا يسيح الجيلى مره أخرى

ممكن استخدام خليط من الموز والتفاح أو البرتقال المقشر أو اى نوع فاكهه محببه ولكن يكون لها لون مختلف عن الأحمر حتى تعطى شكل جميل

صدقونى الأطفال هيحبوها قوى وهى خفيفه ليس بها دهون وسكرها قليل
انا حاولت اكتب الطريقة بالتفصيل الممل أعذرونى هى بسيطه وسهله فى العمايل بس علشان اتاكد من الشرح

يارب تعجبكم وبالهناااااااااااااا والشفااااااااااااااااا
ياريت تقولولى النتيجه