وهذي قصة ولادتي

وصلنا المستشفى 9وربع كذا ورحنا للطواريء قالت لهم أمي عندنا ولاده..وجتني سستر هنديه ودخلت معها بغرفه صغيره وانسدحت على السرير الأبيض اهئ اهئ اهئ .. ورفعت ثوبي وحطت على بطني جهاز تشوف فيه قوة الطلق وكم نبض البيبي

المهم فصختني من تحت وأشوفها تلبس دسوس (قفازات)..وجت تكشف علي وكانت تبي تدخل يدها قلت لاااااااااا وصرخت وقمت أبكي قالت كيف أنا مألوم كم مفتوه(مفتوح)؟ .. قلت مافي جهاز تشوفين كم مفتوح (ياحليلي متطوره)..قالت لا مافيه لازم يدخل يد..قلت كم أصبع قالت واهد بس..قلت شوي شوي قالت زين..المهم طلعت عفشه وعورتني ودفيتها برجولي بغيت ألصـّقها بالجدار وقعدت أبكي..عاد هي عصّبت قالت أنا في كلام دكتوره..
شوي الا جت الدكتوره عسسسسسسل تقول ها ياحياتي لاتخافي بس نشوف كم مفتوح ودخلت يدها وقالت ماشاءالله 5سم يله حبيبتي شوي ونوديك غرفة الولاده شاطره حبيبتي شدي حيلك..وراحت
بس وشرايكم فيها.. كلامها عسل وخففت عني

عاد يوم صارت الساعه 10 وكم دقيقه كنت مفتوحه 6سم وقالت السستر يلللللللله على غرفة الولاده..وأنا قلبي يقول طربق طربق طربق من الخوف
المهم رحت على سرير ثاني وغطتني بشرشف ودفتني ليييييييييين وصلنا غرفة الولاده:11retcher
دخلنا وعطتني قميص ألبسه وسألتني السستر تبين الحمام قلت إيه و ودتني له وبعدها جلست على سرير الولاده ..ياربي ماتخيلته كذا ضيّق حيل يعني مو عريض..لو ألتفت على يميني والا يساري أطيح..كل أسرة الولادة كذا والا شلون؟؟ ياحرام لو جتهم وحده دبه وش تسوي:dozey:
المهم الآلام صارت قويه والسستر ماهي حولي قاعده تكتب بسبوره تقول مدرسه..تكتب اسمي و وقت دخول الغرفه حقت الولاده والتاريخ هذا اللي فهمته لأنه انجليزي
وأنا أصيح سسترررررر كول دكتوره دلال وهي تقول طيب وأنادي كوووووووووول دكتوره وأصيح عطيني إبرررررره وهي تكتب بنت الذين ماهي حولي
ويوم خلصت قامت ودقت على الدكتوره وجت..قلت دكتوره عطيني إبره قالت شويه حبيبتي وأعطيك..لأنه بدري الحين..ودخلت يدها وأنا أصيح قلت كم قالت 6 سم.. وجت بتروح قلت دكتوره لاتروحين..قالت بس أبدّل ملابسي وأجيك..وطلعت ولاعاد جت
شوي دخلت سستر فلبينيه وراحت الهنديه..وياززززززززززين الفلبينيه..جلست جمبي وتمسك على يدري وأنا أتألم وهي تقول ما أليش هبيبي لازم كدا ولاده..وقالت قولي لا إله إلا أنت سبحانك إني كنت من الظالمين..قلت أنتي مسلمه قالت ايوه قلت عندك بيبي قالت ايوه قلت كم قالت 3 قلت ماشاءالله
شوي عطتني كمامة اكسجين قالت اذا فيه ألم اسحبي اكسجين
عاد خويّتكم ماصدقت على الله وهااااااااات ياشفط بهالأكسجين..صارت تقول لا ممنوع كذا..اذا فيه ألم شمّي اذا مافيه لاتشمين..والله وطنشتها وصرت أسحب اكسجين وحسيت إني دااااااااااااااايخه ومتخدره شوي والألم ما أحس فيه الا اذا كان قووووي..واذا تألمت أصييييييح كووووووووووووول دكتوره ..تقول ما اعرف الا هالكلمه هههههه
المهم جت الدكتوره أظن يوم صرت 8 سم والله مو متأكده..المهم قلت دكتوره عطيني ابره قالت طيب..وعطوني بالفخذ ابره مسكنه..وجت بتروح قلت لاتروحييييين الله يخليك قالت الحين بجيك..قلت ادري منتي بجاااايه وراحت

وشوي إلا خلص الاكسجين خخخخخ وجابت لي انبوبه ثانيه :D

المهم يوم صرت 10سم كانت الساعه أتوقع 1ونص ودقت السستر على الدكتوره
بعد شوي السستر لبستني شراب طووويل لين الفخذ واسترتش قوي ماسك قلت ليش هذا قالت عشان الجلطه
وشوي إلا جتني دكتوره ثانيه اسمها نجوى لأن للأسف ان الدوام برمضان كان ينتهي 1ونص وكانت المناوبه على الدكتوره نجوى
المهم جت معها دكتورة اطفال اسمها منى
وعطوني ابره ثانيه..صاروا يقولون ادفعي وأنا ادفع ويقولون ماتعرفين تدفعين ادفعي بقوه..ودكتورة الاطفال تعلمني تقول اعملي هيك..وتفتح فمها وتسحب هوا وتقول كأن عندك امساك وتحاولين تخرجينه..وانا أدفع في الأخير قلت خلالالالالالالالالالالاص اشفطوه قالوا حرام عليك احنا شايفين شعره..شوي وحده(اظنها الفلبينيه) ضغطت على بطني الله يجزاها الجنه وطلع بدوري الساعه 1:47 فجر الأحد 13-9-1426هـ
والحمدلله

وانتهيت من ألم الولاده وبديت بألم الخياطه
والله اني حسيت بالابره وهي تخيطني وبالخيط لما تسحبه وصرت أصيح من قوة الألم
قاموا كبوا علي بنج سايل!!تخيلوا شلون المنطقه مجروحه من الولاده ويصبون بنج عليها وصارت تحرقني :icon33: ..وأنا أصيييييح وهي تقول يله بئه دحنا ورانا سحور!!:21:
ايييييييييييه كلن على همه سرى
المهم وهي تخيطني جابوا لي بدوري وشفته وهي شايلته وعلى طول اخذوه..بس انبسطت حييييييييل لما شفته

وهذي هي قصة ولادتي بابني البكر... بدر...الله يصلحه ويحفظه ...

وطلعوني من غرفة الولاده واشوف أمي الله يخفظها مع أخوي..وكلمني زوجي وأبوي وعمي واختي

والعصر جابوه لي أرضعه وعورني مرررره .. وأذنت باذنه

والحين أعاني من بطني مترهل شوي وصار أسمر وفيه زخارف ونقش وحركااااااات (تشققات بعيد عنكم)..وصدري صار كبيييير..وما ادري د.نجوى خيطتني زين والا كانت تخيط وبالها مع السحور؟! الله يستر لا أكون وسيعه :16:

واعتذر على الاطاله
بس وشرايكم بولادتي

والسلام عليكم

الحمد لله على سلامتك

وعلى البركه ما جبتي .. يتربى بعز والدينه .. الله يصلحه ويخليه لك ويقر عينك فيه

أول مره اسمع بحركه الشراب السترش .. ما قد سمعت عنها ولا قد احد رواها لي

انتي ولدتي بإي مستشفى ؟؟

الحمد لله على السلامه

الله يخلي لك بدر

الحمد الله على السلامه
والله يخليه لك
وان شاء الله تشوفينه معرس :)

ياالله حكايتك ممتعه>>> عشانك ماجربتي
يتربى بدر بعزكم.....
والله يحفظه ويصلحه لكم ويرزقك باخوان له.......