وأنا ألف لف ف النت لقيت حلا لشيف اسمها غادة التلي ودخلت المطبخ وطبقت مع بعض التغييرات البسيطه وبصراحة النتيجة كانت رائعه والطعم واااايد لذيذ أنصحكم يا بنات تجربونه
المقادير
1 كيك شكولاته جاهز ( انا سويت كيك بتي كروكر بالشكولاته وفتته بيدي )
1 كوب كريمه سائله ( انا استخدمت كريمة الخفق المراعي اللي عليه صورة كيك )
4 اظرف دريم ويب
6 حبات كيري
1 علبة حليب مبخر اللي نستخدمه للشاي أبو قوس و بوني وهالشله
10 حبات بسكوت دايجستيف
ماي دافئ نذوب فيه شوية نسكافه ونخليه يبرد ( قالت نقدر نستبدله بعصير أو حليب شكولاته )
الطريقه
نقطع الكيك ونضعه في صينية تنفتح من الجوانب ( انا فتت نص كمية الكيك وحطيته ف الصينية وضغطته بيدي )
نسقي الكيك بالنسكافه
نضع باقي المقادير في وعاء ونخفقهم بخلاط الكيك إلى أن يغلظ القوام ثم نضع الدايجستيف المطحون ونخفقه لدقيقه أخرى انا بعد ماخفقت كل المقادير ماعدا الدايجستيف كسرت البسكوت بيدي وضفته للوعاء وحركته بملعقة عشان تكون الكريمة فيه قرمشه )
نضع الخليط على الكيك و نزينه بمالتيزرز
وندخله الثلاجة وكل ما طول كان ألذ
واعذروني خواتي على رداءة الصورة لاني اول مره اكتب موضوع بس ما حبيت ابخل عليكم برغم تواضع موضوعي
لكم مني كل الحب والتقدير
