مبارك عليكم الشهر الكريم
ربنا يتقبل منا ومنكم صالح الاعمال باذن الله
النهاردة انا جبت لكم تجربتي الشخصية لازالة الشعر اللي تحت الجلد
وطريقتي الروعة في السويت وان شاء الله لما تجربي هاتعديلي
اولا :قبل السويت علي طول
بجيب طبق واحط فيه معلقتين سدر مطحون وعليهم معلقتين او اكتر خل تفاح
(المهم تبقي عجينة متماسكة مش سايلة ولا ناشفة)
وده بيبقي الشكل بتاعها
ده السدر المطحون
وده شكل الخلطة اللي انا بقول عليها
وبحط خلطة السدر علي رجلي وافرك كويس جدااااااا
لحد مااحس الخلطة اتفركت كلها من علي رجلي
وهاتلاقي رجلك ناعمة جدا
وكل الشعر اللي تحت الجلد باذن الله هايطلع
اشطفي بقي رجلك كويس جدا
الخطوة التانية :السويت
قبل السويت تجيبي معلقة عسل وتحطي عليها 5 او 6 نقط عصير ليمون
ويدوبك بس تلزقي المكان اللي هاتشيلي منه بالسويت
مش تدهنيه كمية لا بس يدوبك تلزيق(الخطوة دي بتخلي السويت
تلزق ع الجلد وتشيل الشعر الصغنن)
وتجيبي السويت بتاعتك بقي وابداي في ازالة الشعر
وملحوظة مهمة تشيلي عكس اتجاه الشعر و مع اتجاه الشعر
وده بيساعد في ازالة الشعر الصغير واللي تحت الجلد
الخطوة التالتة:مابعد السويت
انا بقي اول مااشطف رجلي ادهنها زيت الجليسرين واحط عليها
المقشر الرهيب بتاعي تحفة بمعني الكلمة
وده شكله
واسمه لو مش باين هوBio skin care
حلو جدا وبيقشر من قلب وهو صناعة انجليزية
المهم بقي بعد ماادهن الجليسرين احط المقشر وافرك كويس كويس
واهم حاجة الفرك بذمة بس من غير ماتجرحي نفسك
ودي وظيفة الجليسرين بيمنع احتكاك الجلد بالمقشر بقوة
وقومي بقي ياجميل اشطفي رجلك ورطبيها كويس وده اهم شئ
وطبعا ياريت التقشير والترطيب كل اسبوع مرة
وشوفي رجلك ولمعتها وجمالها ووداعا للشعر تحت الجلد هاتنسيه باذن الله
وادعيلي بقي ساعتها ان ربنا يرزقني بالذرية الصالحة
ومنتظرة تجاربكم ياقمرات حواء