تعالي ... يلي تقولي سعرك غالي ...( اجابة عن استنكار اسعار المشغولات اليدوية )

المشاريع والافكار التجارية الشاملة


السلام عليكم ورحمة الله وبركاته

حابة اطرح موضوع يخصني انا واتوقع يخص كل تاجرة مشغولات يدوية
ولا امانع ابد في أي نقاش هادف ومفيد باذن الله

وانا ارحب بجيمع العضوات واخص حبيباتي المطلعات على مواضيعي او منتجاتي
حابة اوضح لهن شيء مهم

لان كثيرات جدا يراسلوني والحمد لله يمدحون في الافكار والنماذج الي اعرضها
وذا شرف لي لان اغلب عضوات هالمنتدى غاية في الرقي والذوق

بس مجموعة من الرسائل والاستفسارات تختمها بكلمة

((( اسعارك غالية )))

وحابة هنا اكتب اجابة وافية لكل من تقف حائرة امام تفاوت الاسعار
بين شغلنا وما يعرض في الاسواق والمعارض واقول

واسمحولي هنا ادخل بالحوار بالعامية : احس اني باتفاعل اكثر

حبيباتي انا واي تاجرة مشغولات ما نجيب الاغراض جاهزة ولا نستوردها كذا من الصين ونبيعها لكم!!

ولو باتكلم عن منتجاتي انا
( اطقم ضيافة وترامس وفناجيل وصواني واطباق تقديم )
فانا اشتري القطع من السوق بنفس السعر الي انتو تشترونها حتى وان رحت السبالة او الهنداوية ومراكز بيع الجملة ترى الاسعار ما تفرق كثير وهم يعرفون اني مجرد تاجرة بسيطة مايخفضون لي كثير لاني مهما كان اخذ منهم شي بسيط ما اخذ مثل ما ياخذ التجار يعبون الشاحنات بضايع ماشاء الله

وانا الحقيقة وللامانة احرص اني اشتري قطع ممتازة لاني اشتغل عليها وما ابي الشغل والتعب ينحط على شي رديء لا يرضيني في شغلي
ولا يرضيني ان الزبونة مسكينة تدبس في شيء ينعدم عليها ..

موضوع اواني الضيافة واسعارها معروف للكل وكيف ان الاطقم في تغير مستمر في الاسواق والاسعار تزيد كل شي ((( وما اعرف ليش ؟؟؟))) بس كل تاجر يقول لي الشركة غيرت السعر والوكيل رفع السعر >>> الخ الخ ...

هذا الي اغلب الاخوات يعرفونه

لكن الي ممكن يجهلونه اني انا في شغلي استخدم الوان .. ورسم ومحددات
وبصراحة الخامات الفنية (( وانا دارسة فن تشكيلي وممارسة للفن من 10 سنوات ))

القى الالوان والخامات الفنية في المملكة غاااااااااالية حيل لانها اصلا مو دايم متوفرة كم مكتبة وكم محل الي يوفرها
والوان الزجاج الممتازة بالذات والمحددات اتعب الين القاها
وحتى في جرير (( وهي اصلا ماتفرق سواء اخذتي واحدة ولا عشرة ماعليها لا في كوني زبونة او عميله او غيره )) مود ايم القاها

وتخيلو كل طقم اسويه كم يحتاج الوان وكم يبغاله محددات عشان كمية الكاسات وصحونها والترامس والاغراض الي يحتويه الطقم !!!

وانا اضيف سعر الالوان لسعر الاواني غير اني اضيف كرستال على القطع
وذا لحاله حوووووووسة مرة القى اللون المطلوب ومرة لا والمقاسات مودايم متوفرة .. واسعارها بعد متذبذبة

!!!!

هذا كله بس تكلفة الاغراض

نجي للشغل

بالله أي وحدة تقولي سعرك غالي تحاول بكل امانه ترسم على كاسة وحدة .!!

لمجرد التجربة

والله انا رغم موهبتي الي وهبني الله ورغم دراستي للفن التشكيلي واخذت دورة خاصة في فن الرسم على الزجاج
والله اعاني من صعوبة الرسم على الكاسات لانها منحنيه ومستديرة
وذا يحوس لان طبيعة الوان الزجاج سائلة وتحوس الي يستخدمها :09:

وانا كل يوم اخذ من وقتي واتعب واركز في شغلي لكل طقم 12 كاسة و12 فنجان و12 صحن :angry:
كل قطعة تحتاج حرص ومهارة


وذا كله من وقتي وووقت اسرتي يعني المفروض القى مقابل لها الوقت وهالجهد ..
. وشيء طبيعي ..(( ومو منطقي اشتري الاغراض والالوان واسويها ولا اربح غير 20 ريال ))
يعني على الاقل مبلغ يستاهل التعب والجهد نوعا ما ...!!!

و اكيد ملاحظين ان الرسم على درازن الكاسات والفناجيل غير الترامس والصواني لو كان في طلبيات بيكون متعب وكثير

يعني احتاج مساعدات وانا والحمد لله عندي مساعدتين
بس ما يساعدوني عشان سواد عيوني (( لان محد يشتغل لاحد ببلاش ))

اكيد راح ياخذون اجرهم ونسبتهم ..

النتيجة ياغاليات شيء طبيعي تلاقون في فرق بين سعر مشغولاتي وسعر الاغراض المعروضة بالاسواق

لاني ازود عليها سعر هالامور
سعر القطع من السوق + سعر الالوان والكرستال والمحددات + اجر المساعدات

غير امور اخرى ما حسبناها وهو المجهود في البحث والتصميم واللفلفة بالاسواق عشان نكمل كل الخامات

وغير اننا نوفر لك شيء ممييييييييز ما في منه في السوق يعني ماراح تلقنينها في المحلات ابدن

!!!!

فوق هذا كله تقولون ليش اسعارك كذا ؟؟؟

اتمنى من الاخوات ما يتضايقوا من كلامي :icon33:

وانا اطرح هالطرح فيه مثال لشغلي

لكن متاكدة اغلب تاجرات المشغولات في وضع مشابه
لان الاعمال الفنية اليدوية صحيح حلوة وممتعة لكن والله العظيم مكلفة جدا يا جماعة ومتعبة حيييييييل

اعتذر عن الاطالة وبارك الله فيكم جميعا


اختكم

سمر الفن :)
55
5K

يلزم عليك تسجيل الدخول أولًا لكتابة تعليق.

تسجيل دخول

الكلمه الطيبه صدقه
الله يوفقك السعر ميعوض تعبك والام ظهرك وعيونك الله يوسع للجميع بالرزق الحلال
بنت بتوووت
بنت بتوووت
الله يوسع رزقك ويقويك

انا احب الاواني تكون ناااعمه ولاعليها رسومات

لكني معك ان الشغل فيها متعب خصوصا مع وجود مسؤوليات ثانيه
وايضا واضح ماشاءالله الاتقان في شغلك

اهم شي حبيبتي خلي بالك من ظهرك ودايما اجلسي جلسات ماتؤذيه
لانه ولا اي مكسب يعوض الآم ومشاكل الظهر لاسمح الله
متجر شمس
متجر شمس
شغلك روعه والله يوفقك
*سما الفن*
*سما الفن*
تسلمون لي ياغاليات

وطول عمر الفنون تتبع الموضة والذوق العام

والي خلاني افكر في شغلات الضيافة والرسم عليها
كونها موضة حالية وملاحظين حتى محلات الاواني الفاخرة الحين توفر قطع مرسومة ومشتغل عليها



وبالنسبة لظهري والله شسوي .... من يوم درست فنون وانا اعاني

بس شسوي احب الفن والاشغال حيل

الله كريم


واكرر شكري على ردوركم بارك الله فيكم
روز رد
روز رد
صادقه وربي يوفقك والي تبي الزين تدفع