حلمي المستحيل تحققه؟؟؟

على احلى واحسن اعضاااااء....
حلمن لن يتحقق >> رايحه وطي بالاملاء


اناواعوذ بالله من كلمة انا من وانا صغيرة وانا مااااش احس ان المواهب عندي شكثرها بس الموهبة اللي صدق عانيت فيها موهبة التمثيل <عارفة كلكم اتقولون هاااااااو تبي تمثل بس لاتستبقون الاحداث الركادة زينة>


كنت دايم اتوزى ورى الستاير وهات ياأدوار مره بطولة مره ثانوي ومرة ضيفة شرف ومرة كومبارس وكل شي اسوية انا أألف وامثل واخرج واصمم الديكور وانفذ الاضاءة <عشان اكون معاكم صريحة الاضاءة عندي ماتتعدى فتحة الدريشة لاأقل ولاأكثر > يعني على قولتهم بتاعة كله

تعرضت في بداياتي الفنية لهجوم عنيف من قبل الاهل لاني قلت لهم اختاروا ياأنا وفني ياأنسوا بنتكم الى الابد < مهي عاقلة على هالتحرر

وبداياتي كانت في مسرح المدارس ومسرح ملاهي الخيمة الله يذكره بالخير وذيك المخرجة المصرية اللي مصدقة نفسها ام نظارة واللي صابغة شعرها اورنج اللي كل ماذكرتها كرهت طفولتي من قلب
كنا نحس اننا فايف ستارز ولانناظر احد من الغرور محنا عاقلين يانجوم هوليوود وكنت اقول لاهلي عندي عرض بالملاهي وترى يمكن مارجعلكم <هذا من زود الغرور الله يكافيكم الشر

طبعاالتمثيل كان في مرحلة الطفولة مسيطر علي بالحييييل وماأن كبرت وترعرعت حتى قل اهتمامي بالتمثيل والله لايلومني من اللي شفته لاني قلت هالحين لوابمثل مع مين بمثل مع هالحجز قبيلة محمد حمزة ورجال بناته وعيال عياله وكل جماعته منيب لاقية لي دور معهم
مير المسلسلات الحجازية كلها نفس القصة والسيناريو الابو تاجر وعياله كثيرين واحد ياخذ بنت عمه والثاني بنت خالته والثالث مسافر يدرس برا وكل المسلسل ماصور فيه الايمكن 10 مشاهد وهذي كلها قبل المونتاج بعد والولد الرابع لازم يصير مدمن مخدرات ويسرق فلوس ابوه بعدين تشوفه امه وتتعفط خشتها ويجيها جلطة والاشلل وانتم ماشين والبنات الكبيرة سنعة وعيالها مبلشينها مايذاكرون والصغيرة دلوعة وتتميلح وتتزوج وتتطلق <باختصار هذا سيناريو مختصر لاي مسلسل حجازي

يعني بجد اغلبية المسلسلات تقهرررررررررررررر وتجيب الصمرقع المزمن مافيه شي اسمه تلقائية ووجه تلفزيوني ابد كنهم يسمعون محفوظات والعيون مفنجلة على الكاميرا يعني لو تموتون ماتحسون ان هالشي واقعي
اعطيكم مثال اخر مسلسل ولاعاده الله من مسلسل يوم اني اتابعه واللي هو مسلسل نوره <هذا كن احد مواجرني على متابعته اذا جت موسيقى التتر وخلص تجيني الصيحة من الفرحة لاني كنت اتابعه وانا افتقد شي اسمه استمتاع >
مفروض يصير اسمه عقوبة مو منورة ياربيييييييييييييه مو طبيعيين الممثلين والقصة بكبرها ترفع الضغط اصلا مافيه قصة من الاساس كأنها حصة تعبير والممثلين طلاب ونورة كنها اليوم الوطني والا الاجازة الصيفية وهات ياتعبير
نورة راحت نورة جت نورة تطلقت نورة تبي عيال نورة حنونة نورة طيبة نورة نورة نورة ااااااف كرهوني باسم نورة

شي ثاني يقهرني بمسلسلاتنا وهي اللهجة اللي عن جد ينلعب بحسبتها لعب يجيبون لي لبنانية ويخلونها غصصصصصصصصصصصب تحكي قصيمي والاشقراوي وتساتسي والا ومصرية وتحكي لها حجازي

والضحية في الاخير احنا يالجماهير

والانجي للمسلسلات المصرية كان ودي امثل لومرة وحده مع يوسف شعبان واعرف بس شي واحد ليه في كل مسلسل الحلقة 14 او 28 لازم يموت<يمديكم على الدقة
والا ميمي جمال ورجاء الجداوي ليه مايصيرون فقيرات كل ادوارهم انهم غنيات مرررره
غير انه فيه سالفة اللعب بالعقول اللي عن جد مش طبيعية مادري يحسبونا مخفات مانعرف مانفهم والا وش القصة
اجل ذاك اليوم مسلسل مصري البطلة بوسي والبطل محمد رياض للحين اوكي مش مشكلة القهر انهم مخلينها طالبة بسنة ثالثة حقوق ويتعرف عليها محمد رياض ويخطبها وش اسوي بنفسي اناااااااا مهابيل احنا مانفهم
يعني قلت الخشش الجديدة يوم انهم يحطونلي بوسي طالبة بالجامعة لي متى هالاستخفاف ترى لنا عيووووون وربي
وظاهرة هنيدي هذا البايخ هو وافلامه اللي زي وجهه والناس طايرين فيه قال ايش كوميديان اهو بوادي والكوميديا بوادي احسن مافيه يومن انه يسوي دور بومبا

والاالمسلسلات الكويتية هذولي عاد احس انهم ونااااااااسة عيال المنصور وطقتهم ودي اني امثل معهم بس عشان بيوتهم تفتح النفس وعلشان ابرد حرتي ومن اول حلقة ابدا اكمخ واسطر واكفخ في خلق الله والا يصير مره انزل مع الدرج واصير تعبانة على جريف يتحرون لي وامسط من عند الدربزين ويجون لمي ويودوني لم مستشفى دار الشفاء <قاهرها هالمستشفى في كل مسلسل كويتي يجبونه كن ماعندهم الاهو

والظاهر ان السيناريست الكويتين مايفرحون بالحلقة الاخيرة الاوهم مصفين الممثلين 6يموتون و4على جريف اللي مدمن واللي يعالج واللي في العناية واللي فيه بلاوجلا والباقين عاد يرقلون
ومن اكثر مايلفت انتباهي اثناء عرض المسلسلات الكويتية غداهم الاجوا يتغدون سعابيلي تقاطر احس ان غداهم طعم يمي يمممممممممممممممي <ايه باين ناقدة فنية وانتي جالسة تقزين غداهم

والاالمسلسلات السورية الضيعة والضيعة والمختار راح والمختار بيجي وكرمال هالشوارب وتئبرني ودخيلك وبدنا نروح ع فرانسا والعثمانيين ومابعرف شو والشنبات عندهم شئ انا للحين مانسى مسلسل ايام شامية يوم عباس النوري حوم كبودنا علشان شعرتين شواربه راهنهم من كثر ماهم غالين عليه <فضاوه

والا تكفون نجدت انزور ذا ودي اشوفه بس اطلع شوي من حرتي عليه حوم تسبودنا له حول سبع سنين في كل رمضان مبلشنا بمسلسلاته يجيب لي اسعد فضة ويخم له شلة سوارية ويلبسهم خلاقين ويقطع خرق ويخلي هالدخاخين تعجعج وسيوف وخيام وواحد يحب له وحده وسأنتقم ولن ادعك تنال العرش وويحك ومن هالحتسي المصفصف ويسمي روحه المخرج المبدع ابد مايغير شي ابد دخان ويخم له قطع قماش من هالخياطين ويتنقى له اسم حركة ياجوارح يابواسل يافوراس ويقول السنة الجاية بيسوي مسلسل الملحطين


والالطيفة المجرن هذي بلحالها شي مستقل
نفسي اعرف هي لها بيت وعيال ورجل والالا شكلها ساكنة باستدوديو مدري وينها تنام فيه اظنهاا ماتنام ابد مافيه ولامسلسل كويتي والابحريني والاماراتي والاقطري والاعماني والاسعودي <قولي خليجي وافتكي الاوهي رازة خشتها فيه
ذاك اليوم اتابع مسلسل مكسيكي في L.B.C والمح جدتهم فيها بوهه من لطيفة المجرن بس ماتأكدت بالحيل هي اياها والالا بس تسويها بنت المجرن لوالقاها مع روبرت دي نيرو ماستغرب

عشان كذا احب اقول للجماهير ان عودتي للفن تعتبر شبه مستحيلة انا اعتزلت الى الابد دام ان الاوضاع الفنية كذا < خذوها على قد عقلها انواع الثقة


بس اشوى اني عقلت ولاصرت ممثلة عارفين ليه؟

كان الحين تلقوني منتحرة في عمارة من عماير البطحاء <~~~~~~تحتك في سعاد حسني

تشاو


على لسان اختي وحبيبتي:13: ..........