مسائكم \صباحكم معطر بذكر الرحمن
موضوعي عباره عن بطاقتين بمناسبه نجاح عمليه الملك عسى الله يجيبه لنا سالم
وسبب عملي لهالبطاقتين اليوم بنتي جات من المدرسه وفي مسابقه عن افضل بطاقه
ولازم تسلمها لهم بكره
عاد انا جلست احوس واحوس واحوس بصراحه ماشفت شي عجبني بالنت بالمره ..
كل اللي في لمناسبات عامه مالقيت لمناسبه وطنيه ..
عاد طقطقت منا ومنا لين طلعت بهالثنتين.. وحده لبنتي ووحده لبنت اختي ان شاء الله يعجبونكم
(1)
الادوات المستخدمه :
1\ورق مقوى لون اخضر
2\جوخ ابيض
3\باترون على شكل قلب
4\ورق بحث للكتابه عليه
5\جوخ اخضر يقص مثل الشرائط
صوره للملك من جريده اليوم :)
الطريقه :
اخذت ورق المقوى الاخضر وصفطته من النص حطيت شكل القلب ورسمت بالقلم الرصاص وقصيت بحيث خليت راس القلب متماسك ماقصيته ..
خذيت الجوخ الابيض وقصيته على شكل قلب اصغر من الاخضر وقصيت بداخله قلب صغير بحيث يكون مفرغ ..
صمغت صوره (ابو متعب طويل العمر ) وبعدها القلب الابيض على القلب الاخضر خذيت جوخ اخضر وقصيته شرايط وصمغته بحدود القلب الابيض..
خذت ورق البحث وقصيته على شكل قلب اصغر من القلب الاخضر بشوي ولصقته داخل وكتبت عليه ..
وبس
(2)
الادوات المستخدمة :
1\ورق مقوى ابيض
2\بروش علم المملكه
3\ازرار خضرا
4\ورق بحث
صوره الملك
طريقة العمل :
اخذت الورقه البيضا وصفطتها وسويت منها كرت مستطيل ..
خذت المسطره وقست 2 سم وقصيته بالطول
صمغت البروش بالزوايه وسكرت البطاقه وخذت مقاس البروش وقصيت على شكل دائره ..
صمغت صوره ابو متعب ووزعت الازرار وصمغتهم ..
خذت ورق البحث وقصيته بالمقاس المناسب وكتبت العباره وانتهيت :)
اتمنى الشرح واضح وان شاء الله البطاقات تعجبكم
ما شاء الله عليك
تسلم الايادي عزيزتي