ظاهرة منتشرة بين الأزواج...شو رايكم

السلام عليكم ورحمة الله وبركاته

أمس كنت أتابع كالعادة برنامج جنة الدنيا على قناة قطر..كان عنوان الحلقة المشاعر والأحاسيس...وكانوا مستضيفين الداعية صاحب الأسلوب المميز والرائع الشيخ سليمان الجبيلان....

المهم حاولت إني اتصل اكثر من مرة بس للأسف ما قبظ معاي الخظ...كنت أبغي أسألهم شو رايهم بالأزواج اللي ينطلق لسانهم بالكلام الحلو ولكن للأسف مب لزوجاتهم...لساقطات وبنات الحرام الله يكفينا شرهن...بينما لزوجاتهم ما يعرفون هالكلام...والله يقهر إنهم يقولون كلام جريء جداً وفاضح لهالساقطات...

أنا ضد الراي اللي يقول والله عاداتنا وتقاليدنا ما تسمح بحكم إنا خليجيين وبيئتنا عودتنا على الجفاف...وين هالكلام يوم يكلم الواحد منهم وحده غير زوجته..أشوف العادات والتقاليد ما أثرت على لسانه...

مب حرام إن هالزوج يفرح قلب وحده ساقطة بكلام الحب والغزل والمدح في كل شي ( الله المستعان)... ويحرم زوجته منه..زوجته اللي صابره ومتحمله كل اللي يجي منه...ومهتمه في شؤونه وتربي له عياله تحفظ له عرضه...

والله غريبه هالسالفة..يعني يحللون الحرام ويحرمون الحلال...

يمكن حد منهم يقول والله هو يقول هالكلام على شان ياخذ اللي يبغيه من هالساقطة...إنزين إذا افترضنا هالكلام...ليش ما يجرب مع زوجته...والله اللي بتعطيه إياه زوجته بيعيش فيه مستانس طول حياته بيزيد اهتمامها به وحبها له وبدوم السعاده بينهم..لا بيحصل الأجر من رب العالمين...

..أما اللي بياخذه من الساقطة لحظات معدوده من اللذه الشيطانية وبعدها والله يضيق صدره أكثر من إنه يرتاح...وما بيجني غير غضب رب العالمين...

موضوع يحيرني ويقهرني أكثر...أتعجب منه كل ما يخطر على بالي....

أخواتي اطرح هالموضوع للنقاش...وأبغي نوصل لحل مع هالأزواج الله يهديهم ويصلحهم...

انتظر مشاركاتكم...