تكفون ساعدوني،،

السلام عليكم ورحمة الله وبركاته
اللي يذكرني،، وظعي زي ماهو ماتغير شي ولازلت اسكن في غرفه عند اهل زوجي انا واطفالي
الموضوع هذا مسبب لي ظغط مو طبيعي،،خاصةً ان معي اطفال،،، وباالتالي انعكس على نفسيتي وتعاملنا انا وزوجي مع بعض
زوجي من النوع اللي بار في اهله لدرجه انه ممكن يقدم راحتهم ورضاهم على راحتي انا وعيالي
مرات اجيب له صور عقارات للبيع ويكون متحمس مره ،، بعدين يلتغي الحماس كلياً وماكنت اعرف السبب،، لحد مااكتشفت انه كذا عقار طلعته له، ياخذ امه معه تشوفه، ويجيني مطلع الف عيب وعيب باالبيت،،مره صغير ومره كبير ومره غالي،، وانا عارفه ومتأكده ان هاذي افكار امه مو افكاره، لانها تردد علي نفس الكلام لما اجلس معاها، تقول الواحد ليش يدور الغالي،،ولا ليش يدور الفخم، رغم انها لو كانت وحده من بناتها بنفس وظعي مارظت عليها،، انا طبعاً ساكته وصابره واملي بربي كبير،، المشكله اللي صارت مؤخراً بيني انا وزوجي صارت بسببها،، وانتو احكمو انا غلطانه ولا لا،، قبل يومين اتفقت مع زوجي انه يطلعنا نلعب الاطفال ونتعشى برا،، قبل المغرب كانت جالسه مع زوجي وانا رحت غرفتي البس عيالي،، جاني ولدي قالي بعد الصلاه بابا يقول تجهزوا،، لبستهم وجهزتهم، بعد عشر دقايق جاء زوجي،، قال نزلي ملابسهم مافي طلعه الا مع اهلي، وانا بطلعكم الممشى ،، انقهرت بشكل مو طبيعي،، من جيت بيت اهله لي 8 شهور ماطلعنا مع بعض الا مره وحده بس،، تنرفزت وماقدرت اسكت،، قلت ليه ،انا عارفه اصلاً من غير رايك،،واهلك كل يوم طالعين،، من حقي انبسط انا وعيالي لحالنا،، رد بنرفزه قال بعدين اطلعكم،، شدينا باالكلام واخذ عياله واهله وتركني لحالي باالبيت،، طبعاً ماخلا كلمه ماقالها وانه تعب مني ومن المشاكل، وكلام كثيييير يقهر، رغم ان المشاكل منه، هو اللي دايم يكبرها،، وهو اللي ترك مجال لاهله يتدخلون بحياتنا،، الحين له 3 ايام مايكلمني ابد،، وينام برا الغرفه،،مرات اقول باالطقاق خليه يولي،،ومرات اطفش لحالي واقول ليت المشكله ماصارت،، لكن امه السبب،، بتقولون هاذي امه ومالك حق،، والله العظيم انها تطلع معه يومياً يمشيها وترفض انه ياخذ العيال معه بعد،، ويوم بغينا نطلع استكثرت فينا الوناسه،، هي تزعل وتغار بشكل مو طبيعي،، لكن زوجي الوحيد اللي تارك لها المجال تتدخل،، كل شي يقوله لها،، الحين قولولي كيف اتصرف مع زوجي وهل انا غلطانه،، طبعا نسيت اقولكم انه بعد مارجعو من الممشى جاني معصب واخذ مني المصروف اللي كان معطيني اياه وسوا حظر باالواتس،، كل مايزعل يروح يحظرني،،كأنه بزر