الله يعينك ويسهل عليك احب افيدك من تجربتي
- قبل بيوم ان شاء الله جهزي السفره اذ ا كانت ارضيه السماط مثلا والتمر وزعيه في الصحون وترامس القهوه غسليها وجهزيها والفناجيل صفيها في صياني وكاسات العصير .. والمويه اشتري العلب الكاسات اسهل لك .
- الصحون اللي بتوزعين فيها السمبوسه واللقيمات وبوادي الشوربه والملاعق طلعيها من الدواليب وغسليها وغلفيها قبل بيوم
- اللي بياخذ وقتك فعلا ولازم في نفس اليوم هي اللقيمات عشان كذ ا استبدليها بالجبنيه افرديها وقطعيها بالبياله دوائر واقليها اتصور انها اسهل من اللقيمات وتنضبط اكثر وبإمكان الشغاله تقليها
- قبل بيوم او الفجر اذ ا تسحرتي سوي بعض الاشياء مثلا اغسلي الرز ونقعيه عشان بعدين ما ياخذ وقت في الطبخ...
- تقدرين تشترين الاقماع من المخابز فاضيه وانتي احشيها لبنه ولا دجاج ... اسهل لك من خبزها
- السمبوسه والله ما يضرها سويها قبل بيومين وخليها بالفريزر وطلعيها صبح العزيمه...
- طماط لللشوربه والمكرونه واي شي تقدرين تصلحينه قبل بأيام وتخلينه في الفريزر والله ما يتغير انا اسوي طماط وبصل وثوم اطحنهم واحطهم في قدر مع شوي زيت على النار اليما يتسبك واذ ا برد احطه في كيس في الفريزر والله كل رمضان ما يتغير ..انتي سويه واذ ا جا يوم العزيمه شبي على لحمة الشوربه واذ ا جت بتستوي حطي عليها الطماط المتسبك الجاهز والكويكر ولا الجريش على حسب شوربتك
- الدجاج طبعا يتبل قبل بيوم ويجهز في نفس الصينيه وتدخل الفرن في نفس اليوم
- في نفس اليوم اي وقت تشوفين نفسك فاضيه عبي الترامس قهوه وسكريها حتى لو مبكر لانه حر فماراح تبرد
والله يعينك ويسهل عليك ولادتك يارب ولا تنسين التسبيح والاستغفار اثناء الشغل لان ربي يبارك في الوقت ويسهل الامور سبحانه :26::26::26:

جزاكم الله الف خير والله نبهتوني على شغلات ماكنت اعرفها :)

الف شكر لكل من رد وطل :)

مثل ماقالوا الاخوات
او ايش رايك اجي اساعدك
الله يعينك ويجزيك خير ف انت تفطرين صائمين

يا بعد عمري الله يعينك ليه ما في حريم بالبيت غيرك وشلون وحده تخدم 30 رجال
لازمك شغاله يا قلبي الله يعينك الله يعينك لو على الشربه والسنبوسه هين بس اصناف ومقابلة المطبخ كل الوقت جعل ربي يجعله في ميزان حسناتك ويهون حملك ويجعل مافي بطنك معافا صالحا بارا حافظا للقران