بعد سنين من ضغط التنظيف اعطيكم نصائح تساعدكم

السلام عليكم ورحمة الله وبركاته

ابدء اولا بوصف معاناتي مع التنظيف وشغل البيت بحكم اني كنت قبل الزواج ما اعرف شي عن التنظيف والطبخ ولا الشغل طبعا لوجود الشغالات ماكنت اتحرك ماعندي الا دراستي المهم اتزوجت وبدات رحلة الشغل في البداية كنت استعين ببعض المساعدة لكن مع االوقت سرت احب اعتمد على نفسي تماما الحمدلله ابدء بالطرق اللي ساعدتني
1-نصيحة اللي ماعندها شغاله تشتري غسالة صحون لانه نص وقتي كان تدليك نحاس وكان يضيع علي الوقت في النحاس بالرغم من اني كنت محتاجته في الدراسة او شغل اهم
2-الفرن لاتحطي على العيون ولا على البوتجاز قصدير لانه تمسيحه بعد الطبخ من غير وجود قصدير افضل بكتير لكن حطي قصدير فقط على الزجاج العلوي للفرن لانه حساس وتلصق فيه اشياء صعب تروح ومن داخل الفرن احط على الشبك قصدير عشان اذا انكب شي او اذا حطيت عيش او غيره ماينزل على الفرن ويطلع ريحه وكمان سهل تنظيفه
3-اشتري مناديل جونسون للاطفال وخليها في المطبخ مسحي فيها الوسخ السريع يعني لاتضيعي وقتك بالمناشف
4-غسلي الحمامات يوم غسيل الملابس عشان ترتاحي
5-دولاب السفرة اللي فيه اواني الضيوف كان يتعبني جدا حاليا سرت انظفه واحط على كل رف سفرة واغطي الاواني بيه
وبالنسبة للطاولة حطيت عليها نايلو شفاف عشان ماتتغبر ولمن يجو الضيواف تنضيفه اسهل بعد الزفر والاكل
ونفس الشي لرفوف الحمامات الزجاج امسحها واحط سفرة طبعا قسم الضيوف على اساس اي احد يجي فجاة تكون نضيفه
6-المكياج قد ماتقدري لاتحطي على التسريحة اشياء تزحمك وتتغبر المناكير اجمعيه في علبه والشدو نفس الشي
فقط دي الحاجات اللي وفرت وقتي الحمدلله
اخر شي بالنسسبة لدولاب مغسلة المطبخ من الداخل اخدت الفكرة من وحدة من المنتدى نسيت مين لكن ماشاءالله ريحتني اللي هي تلبيس الدولاب كله من تحت واكواع المغسلة بالقصدير عشان تمنع الريحة ونفس الوقت سهل التنظيف
اتمنى اكون افدتكم بشي بسيط