وبعد التحيه لأغلى حوائيات
اليوم كنت ارتب صور اللاب توب فلقيت صور لاطباق كثيره مصورتها ومحتفظه فيها
قلت اشارككم بعض اطباقي
الصور مو ذاك الزود
بس ان شاء الله تعجبكم
رح ابدأ بالكوكيز
اللي هو عشقي واحترافي
مقاديره ..
ثلاث ارباع كوب سكر بني ..
وثلاث ارباع كوب سكر ابيض
2 أصبع زبده لين بدرجة حراره الغرفه تقريبا 200 جرام
وبيضتين
وفانيلا سائله
بيكربونات براس الملعقه الصغيره مو تكثرون +ملعقة طعام بيكنج باودر تكون ممسوحه +رشة ملح +كوبين طحين تنخلون المقادير الجافه مع بعض
كيس هيرشي حبيبات قليل السكر يجي مكتوب عليه بالاصفر some sweet يعني قليل الحلاوه
وممكن بندق محمص ومطحون خشن نصف كوب <<اختياري حسب الذوق
الطريقه
تخفقون السكر مع الزبده حتى يتغير اللون ويصير الطعم مثل الكريمه
وتضيفون بيضه ثم تخفقون
وتضيفون فانيلا سائله تقريبا غطاء واحد
وترجعون تخفقون وتضيفون البيضه الثانيه وتخفقون
ولما تنسجم المقادير تضيفون المقادير الجافه الطحين على دفعات
وتستمرون بالخلط فتره طويله وهذا سر ان الكوكيز يكون طري من النص لاننا نحفز الجلوتين انه يطلع عكس الكيك الكيك نطفي الخلاط بس بالكوكيز نستمر نخلط
وبعد ما ينمزج تماما
نضيف الهيرشيئ كيسز ونبقي شوي للوجه
ونحرك حتى الانسجام وممكن نضيف البندق المجروش حسب الرغبه
وبعد كذا نبدا نوزع الكميه في الصينيه بواسطه ملعقه صغيره او بواسطه مغرفه الايس كريم
شخصيا استخدم مغرفة الايس كريم لما ابي حجمه يكون كبير والملعقه لما يكون صغير واستخدم ميزان
عشان يطلعون الحبات قد بعض
مثل الصور
ونخبزه في الفرن الكهربائي من فوق وتحت على حرارة 180 مده 8 دقائق
في الغاز نفس الوقت بس يكون الفرن حامي ومن تحت فقط
الصوره الثانيه اللي فيها شوكلت بالكراميل هذي اضفتها بعد ما طلعته من الفرن غرستها في وسطه
وهذي صورة السكر الاسمر افضل سكر اسمر ممكن تستخدمينه مع الكوكيز او السينابو
وعلى سيرة السينابون
انا احبه واموت فيه
وماعندي للاسف الا هالصوره وهو بالفرن كنت اقهر بنتي الصغيره اللي هي اختي السوكره :biggrinlo
السينابون رولز
المقادير
اول شيئ نجيب قدر
نسخن فيه نصف كوب حليب المراعي +نصف كوب ماء +ثلث اصبع زبده طريه
لما يسخن الحليب بس ما يوصل للدرجه الغليان نطفي النار نتركه يفتر شوي بس ونضيف له ملعقه خميره فوريه +ثلثين الكوب سكر
ونتركها شوي وبعدين نضيف بيضه وحده ونحرك المزيج مع بعض احطه بوعاء عميق واضيف له كوبين طحين مع رشة ملح
واخلط المزيج
واتركه يختمر اول ربع ساعه
ثم اضيف كوبين طحين
واعجن حتى يصير العجين املس وناعم ومتماسك تماما بتكون شوي اقسى من عجينه الفطائر
امسح عليها بربع اصبع زبده واغطيها واتركها تتخمر مدة ساعه ونص
ثم اعجنها وافردها بدون زيت او طحين
وافرد عليها زبده مع 6 ملاعق سكر اسمر و3 ملاعق قرفه ناعمه والفها واقطعها قطع متساويه
اتركها تتخمر قبل الخبز عشرين دقيقه واخبزها عشرين دقيقه على نار 180 فوق تحت مع مروحه
لو فرنك غاز من تحت يكفي
وازينها بصوص السينابون
نصف كوب سكر ابيض +نصف كوب سكر اسمر +نصف اصبع زبده +جوز البقان +ملعقه عسل كبيره +ملعقة قرفه +علبه قشطه
اذوب السكر ثم اضيف جوز البقان وبعده العسل والزبده والقرفه واخر شيئ القشطه
وازين السينابون
هالسينابون جدا لذيذ اخذت طريقته من اليوتيوب الاجنبي من موظف في محلات سينابون
بدون اضافاتنا ماحبيته مع الدريم ويب ولا عجينه العشر دقايق
هالعجينه هي بالضبط مثل عجينتهم والطعم مميز جداااا
ان شاء الله يعجبكم
كثرة هرج تحملوني
يتبع
طبعا انا مسويته لضيوف زوجي
المقادير ..
تجيبين قوالب اي شكل عندك
وتسوي خليط بيتي كرور وتعبيها للثلث تقريبا وتخبزيها في الفرن
ولما تطلع وتبرد
تجهزي الطبقه الثانيه
اول شيئ
3 اكواب حليب المراعي +ظرفين كريم كراميل تغلينهم على النار وفي هالاثناء
تخلطي في كاس الخلا
12 حبه جبن كيري مع نصف كوب حليب المراعي مع علبه قشطه
ولما ينخلط المزيج تضيفينه مع الكريم كراميل اللي يغلي على النار
بس ياخذ غلوه تطفي النار وتصبي بالتساوي على الكيك
وتبرديه في الثلاجه
الطبقه الاخيره اختياريه
ممكن تصبي صوص هيرشي الشوكلت وممكن تغطيه بالقناش
انا غطيته بالقناش
المقادير
نصف كوب شوكلت هيرشي كيسز او اي نوع شوكلت +ربع اصبع زبده +علبه قشطه وممكن استبدالها بنصف كوب قشطه خفق
تذوبي الشوكلت والزبده وتضيفي القشطه وتحركي لحد ما تتمازج معاك
وتزيني فيها القوالب والوجه فليك او بسكويت رينجو مطحون حسب رغبتك
الحلى الثاني هذا جدا سهل وسريع
اول طبقه كيك نوع سويته بكيك فانيلا ونوع بكيك شوكلاته
اثنينهم مغمسين بنسكافيه
والطبقه الثانيه توفي مع بندق محمص ومجروش وممكن لوز وممكن جوز البقان وممكن فستق حسب الرغبه
ممكن انتي تسويها او من النستله المطبوخ مدة ساعتين الذ
والطبقه الثاثه
اللي بالشةكلاته تغطيته قناش
والفانيلا قشطه خفق مع سكر قليل
يطلع خفيف
والزينه حسب الرغبه
هذا حجم القوالب
]
وهنا بليله من الليالي
اجتمعنا وخواتي وبعد الشوي والوناسه سوينا بسكويت دايجستف مع النوتيلا والمارشيملوو
تدهني البسكويت بالنوتيلا ولما يبدا المارشملو يتحمر نضغطه بالبسكويت ونسحبه مثل ما انتم شايفينه بيد ولدي
وممممم
هذي من حلويات اللي بعد الشوي يحبوها اولادي
وهذي عروسة العيد سويتها مع اختي الصغيره زمان قبل يمكن 3 سنوات وزود
جبت وعاء طاسه بالسعودي ههههه
وغلفتها بالسيلفون
ووزعت كيك بيتي كروركر عليها
وحشيتها دريم ويب مع قشطه وكيري خفقتهم مع بعض اخفقي حسب احتياجك
مثلا ظرفين دريم ويب +نص كوب حليب
وثلاث مكعبات كيري ونص علبه قشطه خفق تخفق مع بعض ونضيف طبقه كريمه وطبقه خوخ
وقفلتها بكيك وغلفتها وجمدتها
وبعدين لما جمدت قلبتها وزينتها بكريمه بيتي كرور بالفانيلا مع ملون طعام
وزينت العروسه بالكريمه
واختي وزعت المارشملو
طالعه كيوت اعجبت الاطفال الصغار
كوراسون بالنوتيلا والايس كريم
هذا ادلع نفسي فيه او زوجي لما اكون رايقه
اجيب كراوسون سفن دايز اقصه واحشيه بالنوتيلا زياده
واسخنه 10 ثواني بالمايكرويف
واضيف الايس كريم والتزيين واقدمه مع بلاك كوفي