تكفون بنات الكويت,,,بروح سوق السمك!!!بس ما اعرف شي؟؟

اطباق عالم حواء

مرحبا

شلونكم ان شاءالله تمام

ومبارك عليكم الشهر

حبيباتي باجر بروح سوق السمج


بس مشكلتي ما اعرف بالسمج شي بس اعرف الزبيدي والهامور والحلوة

يعني الانواع الثانية لسمج ما اعرفها

عفيه بنات ساعدوني واللي تساعدني وربي ما انساها بدعائي على سفرة الفطور


ياليت يابنات تكتبون نوع السمج وعندها لو فكرة بسيطة لطبخه او الطبخات اللي يدخل فيها:cook:

همتكم يابنات الديرة


ماراح انساكم بدعاء الطيب


حب لاخيك المسلم ماتحبه لنفسك


ملاحظة:زوجي يحب السمج وايد"........>مابي اخيب ظنه:06:
6
1K

يلزم عليك تسجيل الدخول أولًا لكتابة تعليق.

تسجيل دخول

بنت القطان
بنت القطان
مرحبا الاميره ساره

اولا عندك الشعم وينفع مطبق

والشعري بنفع مرق

والنويبي يقدم مقلي مع الارز بالزعفران

الجنعد ويقطع حلقات ويقلى طبعا بعد التتبيل ويقدم مع الارز او الخبز

الدويلمي نفس طريقة الجنعد

النقرور بنفع شوي او مطبق او مرق

الصبور شوي بس انتبهي ملئ بالعظم ( شوك السمك )

الفسكر نفس طريقة الشعم وينفع مرق وشوي

وحر ينفع مرق

البياح مقلي العندك مقلي


اتمنى اني افدتك واي سؤال حاضرين
الاميره***ســــــــــاره
مشكورة وماقصرتي يابنت القطان

والله يفوقج دنيا واخرة

وفيتي وكفيتي


بس الانواع هذي رخيصة ولا غالية نفس الزبيدي؟؟؟؟؟؟؟؟؟؟
بنت القطان
بنت القطان
الله يعافيك وفي اي وقت اسعارها مختلفه

بس ارخص من الزبيدي وعلى حسب الموسم والسماجه يعرفون الموسم

الدويلمي والجنعد والنويبي والصبور والفسكر اسعارهم معقوله

واذا اخذهم بالكود ارخص يطلع بس لازم الرجل الي يشتريه لان يكون نفس الحراج

يعني كلهم من الرجال وصعبه المراه تذهب لحراج السمك

واحسن وقت للحراج الفجر يكون طازج واحسن
الاميره***ســــــــــاره
مشكورة بنت القطان

واذا معليج امر

ادري ما انعطى وجه

ابي وصفه سنعه حق الشوي

وثاني حق القلي

بس تكون غريبة ولذيذة

تعرفين احنا البدو ما نعرف لسمج كثركم

انتم خبرة بالشغلات هذي

ولج مني احلى وررررررررررررررررررردة:26:
بنت القطان
بنت القطان
السلام عليكم

حاضرين للطيبين


بالنسبه للشوي تغسلين السمك دون ان تزيلي القشور يعني ما اصفطينه

وخلطي كركم وملح وقليل من الطحين الاسمر وضعيه في داخل السمكه لمدة ساعة على الاقل وبعدين تغسلينه وضعي داخله قليل من عصير الليمون وتمر هندي منقوع ( الصبار )

طبعا تزيلين البذور بعد ذلك تضعين البهارات ليمون اسود وهيل وبهارات السمك المخلوطه

وبعدين تضعين الحشو وهو عباره عن ثوم مطحون مع كزبره خضر وبصل مفروم خشن
وفلفل اخضر حار حسب الرغبه مطحون طبعا

احمس مع قليل من الزيت البصل قليلا ثم ضعي عليه الثوم والكزبره وطماطم مفرومه وارفعيها من على النار مباشره وضيفي عليه قليل من عصير الليمون حسب الرغبه

وعد ذلك ادهني السمكه من الخارج بتمر منقوع اخذي الصلصه التمر وادهني السمكه من الامام والخلف وضعيها بالفرن من الاسفل ثم من العلى حتى تتحمر

بالنسبه للتمر نضعه لكي يتحمر


السمك المقلي اذا كان الجنعد والدويلمي يعني الحلقات او الشرائح بعد ما نغسله ونملحه

بالكركم والملح والطحين وبعد ساعه على الاقل يغسل ثم نضعه بعصير الليمن ربع ساعه على الاقل ويقلى وممكن وضعه بالطحين مخلوط معه فلفل احمر حار ودارسن ناعم وفلفل اسود وقليل من الكمون

ثم البيض ثم البقصمات ويقلى

اما اذا سمك الكامل نفس طريقة الشوي بس بدون الصبار والتمر والحشو عباره عن بصل مفروم خشن مع الخضره السابقه بس بدون طماطم ونضيف الهيل والكركم والملح وقليل من
الليمون الاسود

ملاحظه استخدمي زيت قلي السمك في اعداد الارز يعطي نكه للارز وهو ان تحمسي البصل والثوم والكزبر وعود دارسين في الزيت وقليل من البهارات وضعي عليه ماء الارز واتركيه يغلي لمدة ربع ساعه او اقل ثم ضعي فيه الارز



وبالعافيه واي خدمه انا حاضره اذا كنت اعرفه