كل وحده تدخل موضوعي تدعي لنا الله يجزاكم الف خير

السلام عليكم
انا متابعه لكم من زمان وحبيتكم وحبيت افضفض علا وعسى ربي يفرج همنا و همكم


يا بنات والله العظيم أن تمر علينا أيام مامعنا ولا ريال ! حتى بعض الأحيان يجونا ضيوف وحنا مانملك ولا ريال زوجي يروح يتسلف راتب زوجي ٨٠٠ ريال اعذروني ماقدر اقول وش شغل زوجي !
والله الراتب اغلب الوقت يروح تسديد ديون وحنا نجلس ولا ريال يعني يخلص الغاز او الماء او حتى بعض الأحيان مافي دجاج للغداء او العشاء وحتى قهوة مافي اختي الكبيره جزاها الله خير ظروفهم احسن من ظروفنا واذا جات عندي جابت الأكل بس انا ماحب اقول لاختي أو لأهلي أننا محتاجين وابوي مايقصر اذا طلبته آخر مره طلبته في 29 رمضان واعطاني ماقصر بس راحت بملابسي وملابس بنتي وأعراض ناقصتنا من أكل وشرب
انا عندي بنت وحده عمرها شهرين الله يحفظها لي المشكلة اذا خلص حليبها أو حفايضها وانتم بكرامه والله نشيل هم وزوجي ود وده يسوي المستحيل عشان الفلوس والوظيفة غصب منحدين عليها لأسباب خاصه 😔
الحين زوجي عنده ضيوف رجال خواله اثنين والله متفشل راح يأخذ من أخوه
كثر مانطلب الناس ونتسلف منهم أحس سارو مايبغونا اذا شافونا يغيرون طريقهم واذا بغاهم زوجي يصرفونه أحس كثر ما نطلب ونتسلف طاحت قيمة زوجي عند الرجال
قبل شهرين ونص أبو زوجي توفى الله يرحمه كان نافعنا بشوي على أنه كان شوي قاسي ع ولده خاصه زوجي يسير آخر العنقود اصغرهم وأبو زوجي تزوج تقريباً 6 مرات بس يطلق عنده تقريباً 15 ولد وبنت وزوجي عنده أخ واحد من أمه وأم زوجي مطلقه وتزوجت وجابت 9 عيال وتطلقت ولا تسأل عن زوجي بس كل شوي تدق ع أخوه عشان الفلوس واخوه بعد مافيه خير ربي رازقه والله يا ناس مايرحم أخوه يركب افخم السيارات وبيته ما شاء الله كبير وفخم ع انهم كانوا زواجنا في ليلة وحده بس للاسف يصرف أخوه حتى ماتوظف من كثر الخير الي معه
أبو زوجي كان قاسي مع زوجي والله يا بنات والله العظيم أن زوجي بار في ابوووه ع أن عندي كم ولد و كبار أكبر واحد فيهم عمره 43 سنة والله كلهم ربي رازقهم وولا واحد فيهم خير الا واحد منهم هو أخوه من أبوه الله يسعده ويجزاه خير


أبو زوجي كان يفضل عياله ع زوجي لأنهم معهم فلوس ع أن أبوه نفسه معه ملايين الدنيا


ي بنات الي جلطني أن الورث توزع وأبو زوجي مااعطى زوجي ولا ريال كلهم اخذوا من الورث راح زوجي للمحكمة انهبل يبغى من حقه بس يقولون أبوك ماكتب لك شيء ي ناس والله ارحم زوجي وارحم نفسي وبنتي للعلم كان عندي ولد وتوفى قبل سنة ونص وعمره سنة غرق في المسبح ومات


والله حتى حق بنتي ما شفناه من إخوانه ولا من أمه و ع كذا يوم وفاة أبو زوجي زوجي بكاء بقهر على أبوه والله العظيم أن أخوانه مجتمعين من ثاني يوم توفى فيه ويتكلمون عن الورث ولا همهم زوجي قام من عندهم ورمى الفناجيل قام يهاوش لهدرجة تحبون الفلوس هذا وربي مغنيهم ابوهم تو مات وولا واحد بكاء فيهم بس يمثلون قدام الناس


والله ي بنات من تزوجت زوجي كان ماعنده سيارة هذا وكان عمره 23 سنة تخيلوا أبوه ما اعطاه ولا تكفل بشيء هو زوج نفسه بنفسه أخذ قرض من بنك السلفية وتززوج وأخذ ذهبي و باعه واشترى سيارة ماشي الحال
وانا مابي أهلي يدرون بشيء مابيهم يدرون هم عارفين ان ظروفنا ع قدنا ويقولون اذا محتاجين لاتستحون بس انا قدام خواتي اني ما شاءالله علي !
والله زوجي وقت المناسبات أعياد وكذا انه يدبر لنا الفلوس يبي يلبسني مايبيني أحس بالنقص وانا اصلا قدامه قويه وانا عادي أهم شيء نأكل ونشرب ومن ورا حزينه ع وضعنا
زوجي عمره 26 سنة وطلع خصل شيب في شعره 😢
ع اني أقوله ابي اشتغل نستفيد ويرفض
انا ما قهرني إلا الورث ليش كذا ي عمي ليش يسوي كذا في ولده والله لو اقولكم زوجي وش كان يسوي مع أبوه أن الصفحه ماتكفي
زوجي حلم بعد وفاة أبوه بأسبوع حلم:
كان أبوه جالس جنب قبره وكان قبره مفتوح ومعه شنط صغار ووحده كبيره جدا و كان واقفين كل عياله ويناديهم ويعطي كل واحد شنطه ونادا ع زوجي واعطاه شنطه كبيره جدا من ثقله ماقدر زوجي يشيلها وانتهى .
إن شاءالله خير يارب
والله أحيان ودي اروح ادبر فلوس لو اشحذ زوجي كبر 10 سنوات من هالدنيا الله يحسن خاتمتنا
صحيح تجينا أيام حلوه بس ناقصتنا فلوس والله موب حاله كل شوي نطلب الناس الله يغنينا ويرزقنا ولا يحدنا على أحد
بس حبيت افضفض ادعولنا ي بنات الله يجزاكم خير