اخر كل اسبوع نفس الموال من 15 سنة ، درعموا حياكم الله

آيه درعموا هنا يا حريم بسمع رأيكم


واللي عندها شي زين تقوله واللي تبي تتفلسف لا تجيب لي الغثى الله يرحم والديكم


مع الحمل ما أطيق نفسي ..... المهم بدون ما اطولها وهي قصيرة




الحين لي 15 سنة متزوجة ولله الحمد والمنه


وزوجي ما عنده الا اخو واحد و14 اخت الله يبارك فيهم يارب :(


المهم قبل ساعة قلت لزوجي خلاص ناموا العيال روح الله يرحم والديك جيبلنا عشى خلنا نسهر وندردش مع بعض وننبسط طول الأسبوع وحنا مشغولين بعيالنا والمدارس ودواماتنا


وعشان تعرفوا ايش سبب الخلاف


دوامي من 6 الفجر لين 6 او من 7 الى سبع


وهو دوامه من 8 الى 3
والعيال متوسطة وابتدائي العيال والبنات أجي من دوامي يكون زوجي مقيل شبعان نوم يروح يتقهوى عند خالتي الله يطول بعمرها ويحفظها وانا اذاكر للعيال والبنات والحق على واجباتهم ، بعدها اعشيهم وتجي الساعة 10 يدخل البيت وانا خلاص مع الحمل والتعب وطول اليوم دوام أبغى انام . يصير عشرة انام وأصحى الساعة 4 ونص الفجر وهكذا طوال الأسبوع . يعني اللي عندي وعنده بس اخر الأسبوع نتقابل ونهرج وندردش. قبل ما يجي الصغير وانشغل زيادة . المهم




بعد قصة حياتي


طلبت طويل العمر عشى وجهزت الشاي والقهوة وقلت نسهر وتمنيت يصدق معي ويسهر الليله. علما انه الظهر مقيل ومآخذ راحته وانا لين الحين مصحصحة.


الا انتظر وانتظر وانتظر ويتصل ويقولي أقولك خلينا نفطر بكرة الصبح أحسن مع بعض ولد اخوي جاني 😒


أنا ما تركت كلمة ما قلتها له بالجوال وقفلت بوجهه ورحت لام زوجي وكلمتها .


واللي تبي تسال ليش زعلتي بقولكم حاجة


ولد اخو زوجي اكبر منه وله 14 سنة بالضبط كل خميس وجمعة وسبت او نهايات الأسبوع عندنا علما انه متزوج عنده أرحام وعنده عدلاء كثير ما شاء الله ، بس ما يلصق الا في عمه اللي هو زوجي ( 😡)


وازيدكم من الشعر بيت حتى أيام شهر البصل اخذنا شقة أجار عند اخو زوجي ربي يحفظه ويطول بعمره إنسان محترم ما عمري شفت منه اذيه ولا من بناته ، لكن ولده اللصقة هذا كل ليلة من ايام زواجنا كل ليلة والله من الساعة 8 او تسع المساء لين الساعة 2 او 3 الفجر .




شي يفقع المرارة ، أنا خلاص قرفت منه وأفكر من جد أكلم ابوه اللي هو اخو زوجي وأقوله قل ولدك يخفف جياته ، زوجي يستحي من ولد اخوه وما يحب يرده والمشكلة ما يتصل من بدري يسال اذا فيه خطط او لا ، لا يا قلبي


يتصل وهو موقف السيارة قدام البيت ويقول افتحوا الباب .


يعني حتى لو أنا وزوجي نبي نطلع بعد ما يناموا العيال مافي إمكانية 🤔 ، وإذا شردنا او تعذرنا منه اخر الأسبوع ، تعتقدون ينتظر لنهاية الأسبوع الجاي 🙄 لا حول ولا قوة الا بالله ، يجي ايام الدوامات ويغث قلبي .




افيدونا بآرائكم ونصائحكم