اذا مات الحب والاحترام بين الزوجين ممكن يرجع يصحى مره ثانيه؟

السلام عليكم
ضربني زوجي للمره الخامسه
بعد 3 سنين زواج
رحت بيت اهلي
وطلبت الطلاق
جاء زوجي واعتذر لابوي واخواني
وهم قالوا لي الرجال شاريك
قلت يصير خير
وطلبت اسبوع نقاهه ببيت اهلي 
بعدها برجع له
وهذي اخر فرصه لي وله

المشكله الحين.. حياتنا جافه لها فتره
كنت مندلقه على زوجي.. وحقرني
تغيرت 180درجه..
صرت مركزه بشغلي وتطوير نفسي
وهو كان يبين لي اعجابه بهالشي
لكن لما اختلفنا صار يقول احمدي ربك
اني بالع تغيرك وعدم اهتمامك فيني
وصار يقول اني انانيه
ودايما يوصفني بالعنيده
ومع كل خلاف يتوعدني انه بيكسر راسي

الشي اللي انا واثقه منه الحين
انا ماعدت احبه ابد
وحتى صورته قدام اهلي ماعادت تفرق معي
صرت بس اتذكر وجهه وهو يسب ويطق
واخوي قال لي زوجك عصبي وعنيد
ولو بيطلقك فلازم هو اللي يقرر مو انتي
يعني مدري اذا هذا سبب رفضه


انا مو سعيده معه
لاسباب كثيره.. اولها انه يوعد ويخلف
واعدني يسفرني.. وله سنتين يماطل
واعدني يجيب شغاله وسحب علي
طبعا كل وعوده وقت زعلي
اذا رقت سحب سحبه جااامده
واذا ذكرته بشي عصب وقال بلا زن
او قال ترى زنك بيخليني اعاند
وانا يشهد الله مو مقصره معه بشي
وعلاقتي باهله ممتازه ماشاءالله
واشوف خواتي وصديقاتي من ديره لديره
وانا ماكله تبن وساكته وجوازي قرب ينتهي
لاتقولون لي طالعي اللي اقل منك
انا الحمدلله ما اتسخط..
وبنفس الوقت انا مو اقل منهم الحمدلله
وهو لو عامل لي قدر وحشيمه ماسوى كذا

اللي زايد الطين بله
انه فوق تقصيره.. مايحترمني..
اذا عصب لسانه يفلت.. واحيانا يده..
ويقول دايما احمدي ربك انا اجيب المقاضي
واقضي مشاوريك باللي اقدر عليه
ودايم جالس عندك بالبيت
علما باني انا اللي اتضايق من جلسته
ودايم اقول له اطلع رح باخذ راحتي شوي
وعلى فكره بنات
اول ماتزوجنا ماكان كذا.. كان راعي سهر برا
لاني كتت ادقدق عليه ووينك ومتى تجي
بعدين صرت اطنششششه 
قام تغير وصار من نفسه يرجع بدري



اللي بقوله
اني برجع ومو مقتنعه ارجع
وهو باخر مره كلمني
قال يافلانه ترى صار بينا شرخ جامد
قلت له ايه ادري.. بسبه تصرفاتك
هو طبعا يقصد لاني كبرت السالفه ووصلتها لاهلي


انا تعبانه
تعبانه
تعبانه
مو لاقيه راحتي عند هالرجال
حتى علاقتنا الخاصة صايره اكرهها واتحاشاها
لانه مو مقنعني كرجل..
حسيتني من تزوجته وهو كاتم على انفاسي
حتى صديقاتي ومعارفي صاروا يلمحون بكذا
احسه كاسر عيني عندهم
وانا اللي اول كنت روحات وجيات
وصولات وجولات ومطارات واسواق 
وجمعات بنات وحفلات الخ الخ الخ
الحين تحولت لمجرد شغاله ومربيه اطفال
ماعندي اعتراض
بس فوق كذا حرمان من امور كثيره
فوق كذا طوله لسان وطوله يد
حتى شكلي تغير وكبرت 10سنين

ارجوكم لحد يقول لي لاتقارنين قبل الزواج
الوحده تتزوج عشان تعيش حياه افضل
مو عشان ترجع الف خطوه وراء
وش حادني على كل ذا؟
العيال؟ اللي خلقهم مو ناسيهم
وانا وهو زواجنا تقليدي مافيه حب
ولو كان فيه.. هو موته بتصرفاته الغبيه
فوق كذا يدخن 24 ساعه
مايصلي بالمسجد الا الجمعه والباقي بالبيت
يسمع اغاني 24 ساعه
ويقول انه يحبني
وانا اقول له اللي يحب يدلل
اللي يحب يخلي زوجته برنسيسه
لكن ماحولكم احد..


والادهى والامر انه انسان بدون طموح
يعني مكتفي بهالوظيفه وايجار عماره له وبس
بينما انا طموووووحه
وحاليا جالسه اعمل دراسه جدوى لمشروع
بعد ماطلبت قرض تمويلي..
وكل شهر اخذ دوره شكل
مره لغه مره تجميل مره اتكيت مره تنسيق ورد
وموظفه بوظيفه حليوه حاليا
ماشاء الله تبارك الله..



كنت اتكلم مع امي اليوم..
قالت انتي طيب تحبينه؟ قلت مدري..
قالت لو تحبينه صبرتي وسلكتي..
طيب حتى لو ما احبه..
ياما حريم عايشات بدون حب 
لكن لاقيات تعويض مادي ومعنوي
وياما حريم عايشات بذل واهانه
لكن صابرت عشان الحب 

انا لاطلت سما ولا ارض
عمري جالس يروح وصرت اكره اشوف الناس

ومقتنعه لو بنفصل مو جايني احسن منه
وكرهت الرجال اصلا وسيره الزواج
وانا اللي كانوا يقولون يابختك بفلان
لان زوجي غني واموره الماديه تمام ومو بخيل
لكن يحاول دايما يعاند رغباتي
وايش قيمه الفلوس اذا مادلعت صاحبها

فوق كذا اسلوبه بالتعامل سيء معي
للاسف فاهم الزوجه على انها اسفنجه لمص الغضب


انا الحين مو عارفه كيف برجع بيتي
كارهته وكارهه البيت وكارهه نفسي
وهو بعد عنده مشاعر سلبيه
منقهر هو لاني فضحته عند اهلي
ولاني طلبت الطلاق



اللي نمر فيه مرحله صعبه عالاثنين
واللي عندها رد يفيدني ياليت تقوله
بدون كلام جارح يابنات
مثل تستاهلين ومدري ايش
والله مو ناقصه تجريح.. محتاجه الكلمه الطيبة..