رايكم في الزواج بعد علاقه ، ممنوع دخول النفسيات>>اكتفي من الردود

السلام عليكم ياحلواتي

بقولكم الموضوع من طقطق لسلام عليكم

انا وحدة مطلقه وطبعا بعد طلاقي مستحيل افكر أعيد تجربه زواجي مرا ثانيه
كلنا عارفين انو فيه فترة خطوبه بس كلها كلام فاضي وخرابيط الوحدة بعد ماتتزوج تكتشف قناع وانزاح وكلو كان كذب وتمثيل ويطلع الوجه الثاني

المهم
انا سبق واتواصلت مع شاب يكبرني ب ٤ سنوات مع العلم طليقي كان اكبر مني ب ١٠ سنوات

كانت مجرد علاقه عمل وكان بيننا تواصل كتابي فقط لاتجي وحدة تقولي حرام ومدري ايش انا عقلي في راسي واعرف الصح من الغلط
لحد الان مافي بيننا اي تواصل هاتف اوشي من هذا القبيل


طبعا الحديث معاه مايخلو من بعض المنقاشات
بس انا حسيت ان تصرفاته معايا مو طبيعيه
يعني مثلا يحكيني كل شي عن يومه وعن اسماء اخواتو وأمه وعماته وخالته كل العيله عرفت اسمائهم واطباعهم حتى شجرة العائلة رسلها ليا
وعارفه اسمو بالكامل
حسيت وإحساس الأنثى مايخونها انه يعزني ومتعلق فيا

طبعا انتهت علاقه العمل وصار لازم اقطع تواصلي معاه

وهو عارف قصه زواجي وطلاقي وكل شي قد سئلني حكيت له

المهم يابنات هو يقول معجب في تفكيري ومستغرب من طليقي كيف تركني
وطلب مني الارتباط بصراحة كان صدمه بالنسبه ليا انو حبني
وحلف لي إيمان انه راح يتقدم ليا ويتزوجني بس حاليا بسبب دراستي ودراستو

ويبغاني انتظره لحد مايتخرج ويتقدم لي وانا وياه راح نتخرج في سنه وحدة

وانا بصراحة حاسه نفسي واقفه في النص
مني عارفه اروح يمين او شمال

هو كشخص تفكيرو منفتح وأفكارنا متوافقة في كل شي مع انه من منطقه غير منطقتي واهلها معروفين بالإنغلاق بس هو قالي انا من زمان ضد الزواجات التقليديه ومستحيل اتزوج إنسانه ما اعرفها واعرف شخصيتها

وانا بصراحة ابغى تعطوني التصرف الصح دحين كيف أتصرف
وانا إنسانه لقيت فيه الشخص الي أتمناه والكفو وما ابغى اخسرو يعني لاتجي وحدة وتقولي اقطعي العلاقه فيه

ومن ناحية صدقوا اقسملي برب موسى وهارون انه يعشقني ويبغاني
بس العايق الوحيد الوظيفه ويبغى استناه سنتين لحد مايتخرج يعني راح تستمر علاقتي معاه سنتين وهذا الشي الي خايفه منو

انا فكرت اطلب منو يملك عليا لحد مايتخرج ويتم الزواج

بس مني عارفه كيف آفاتحو بالموضوع اخاف ابين عنده اني ماصدقت او ميته ع الزواج
قولولي كيف أتصرف



انا عارفه بيجوني بنات وهجوم وسب وقذف فيا
بس انا ابغى اجوبه من عضوات فاهمة وحكيمة بليييز