احب زوجي لاكن لا اعلم لماذا يبحث عن غيري

السلام عليكم ورحمة الله وبركاته
كيفكم بنات انا مشتركة جديدة معكم وحابه تفيدوني الله يفرج همومكم وهموم جميع المسلمين
انا احب زوجي ويكن قلبي له بالمحبة والود من بداية زواجنا فانا لي12 سنة متزوجة بعيدة عن اهلي في المنطقة الجنوبية واهلي بالمنطقة الشمالية فانا وحيدة تزوجت زوجي وانا عمري17سنة
فمنذ بداية زواجنا يريد بالزواج خطب علي وانا ماكملت معه سنة تسع اشهر كنت حاملا بولدي الاول بالشهر الخامس بعدها قالي انه خطب علي وحده وقتها انقهرت تمنيت بلعتني وماصار لي كذا ووقتها باقي عروس لا وفي عمر حساس بعدها بيومين قالي بطل ورجع عاد نفس الحركة بعد زواجنا ب3 سنوات ووقتها ماكنت ادري بس امه وقفت في نحره ولادريت الا بعد 6 سنوات طفشت منه والمره الاخيرة بعدزواجي منه ب10 سنين يعني قبل سنتين وانا حامل بحملي الخامس بغيت اموت قهر حامل وتعبانه وفي الشهر الثامن وفي المستشفى ولا فكر فيه وراح خطب وعاد انا ماعاد قدرت اتحمل حركاته انفجرت وزعلت وتكلمت عليه وسبيته وماخليت عليه شي اعوذ بالله من الشيطان الرجيم وبصراحة وقتها خاف مني وحاول يراضيني وحاولت ارضى واتوصل معه لاقرب حل بس هو يبغى يسوي اللي يبغى لوحده ولايبغى احد يحاسبه فبدت بعدها المشاكل بينا طبعا سمحت له بازواج وحاولت انا اخطب له بس رفض قلت له خلاص ارضني باللي ابغى بعدها روح على كيفك فكان عنده ديون ماقدر يكمل فخربت خطبته الاولى وبعدها باشهر انخطبت خطيبته وتزوجت فزعل وصار يلومني ويحط السبب فيني وكل ماتذكر يسبني فصار بينا فجوة وكل شوي مشاكل اعوذ بالله منها وطفشت مرره الى الان بعض الاحيان يسبني ويقول انتي خربتي حياتي وانا دائما توقفين في طريق سعادتي تعبت معه علما بذلك اني ماكنت مقصرة معه تنازلت عن كل شي احبه عشان ينبسط وحتى دراستي وحتي اهلي ماكان يخليني اروح عندهم يقول مااقدر اصبر عنك ولاعن اولادي حسبي الله على من كان السبب حسبي الله ونعم الوكيل
كنت اسوي جهدي كله احرمت نفسي من اشياء احبها علشانه لكن .....الله يفرج عليه وهذا الشي شاغل بالي كثير ,,,افيدوني الله يسعدكم ياارب ويعطيكم من نعمه الظاهرة والباطنة ويفرج همومكم
وآسفة على الاطالة
((يارب ياكريم ياسميع يامجيب ياحي ياقيوم سخر لي زوجي وسخرني له وابعد عنا اولاد الحرام وبنات الحرام واجمعني معه في جنتك مثل ماجمعتني به في دنياك واستودعتك قلبه وسمعه وبصره وروحه وفؤاده ولسانه وفرجه وجوارحه وماله فاحفظهم عند ك بما تحفظ عبادك الصالحين يامن لاتضيع عندك الودائع))