كيكة الجلاش اللذيذة *** حلو شرقى سهل جديد و خفيفو على اد الايد

الحلويات الشرقية والغربية

بسم الله الرحمن الرحيم
السلام عليكم و رحمة الله و بركاته

ازيكم اخواتى فى الله يا رب تكونوا كلكم بالف خير

اللهم صل و سلم و زد و بارك على الحبيب المصطفى صل الله عليه و سلم
النهاردة باذن الرحمن هنعمل سوا كيكة الجلاش للشيف الجميلة نجلاء الشرشابى



سهلة و اقتصادية ومميزة و اللى عاجبنى فيها اكتر قلة البيض فيها عشان كدا مش هتحسى باى وجود لزفارة البيض
بصراحة اول مرة عملتها متوقعتش انها تبقى بالجمال ده و خاصة لما بتبات بتكون اطعم
نبتدى المقادير على بركة الله


كيكة الجلاش
المقادير :

نص كيلو جلاش
1/2 1 كوب لبن حليب.
1/2 كوب ذبادى.( انا حطيت علبة ذبادى 80 جم )
1 ملعقة كبيرة نشا.( حطيت معلقة بودرة كاسترد فانيليا )
1/2 كوب سمن سايح.( انا استخدمت زيت درة بدل السمنة )
1/2 كوب سكر.
1 ملعقة كبيرة بيكنج بودر.
2 بيضة.
فانيليا.
1 كوب شربات (سيرب) ( عملت كوب و نص سكر على كوب ماء و معلقة صغيرة عصير ليمون و سيبتهم يغلو لحد
ما تحصلى على القوام المظبوط ..يكون الشربات تقيل الى حد ما ( و طبعا لازم يكون بارد لما نصبه على الكيك )
يعنى تعمليه من بدرى

الطريقة :
** هنجيب صنية مدهونة زيت و الافضل نعفرها بدقيق خفيف و هنفرد اوراق الجلاش كل ورقة لوحدها م هناخد كل ورقة نكرمشها و نحطها فى الصنية ( الشيف كانت بتاخد ورقتين ورقتين تكرمشهم و تحطهم فى الصنية ...بس انا فضلت ورقة ورقة ...و نعمل كدا لحد ما نخلص كمية الجلاش كلها



**انا هنا استخدمت صنية مقاس 28 ...و بعدين هنضرب فى الخلاط (اللبن -
الزبادى - النشا - السمن - السكر - البيكنج بودر - البيض - الفانيليا).و
نصب الخليط ده و نوزعه على الجلاش فى الصنية ..خلى بالك ....( نوزعه على
صنية الجلاش )

مش نكبه كله فى حته واحدة ...و بعدين بظهر المعلقة اضغط بسيط جدا عشان اساورى ورقات الجلاش ببعضها

( انا كنت مصورة صور تفصيلية بس مش عارفة طارت راحت فين لما جيت انقلهامن الموبايل على الجهاز )

فمعلش سامحونى
** و بعدين هنحطها فى فرن على درجة حرارة 180 فى الرف اللى فى النص ...زى الكيك العادى بالظبط .لحد ما تحمر

و تختبريها بخلة من النص ...هى بتاخد فى الفرن من 30 الى 40 دقيقة على حسب فرنك

( و طبعا تكونى مشغلة فرنك من بداية شغلك فى الكيك )









و لما وشها يحمر تطلعيها و تحطى عليها الشربات البارد و تسبيها خالص لحد ما تبرد و تقطعيها .......لانك لو قطعتيها و هى سخنة هتتبهدل معاكى** و لما بتبات بتكون احلى و احلى ......و ممكن كمان تزينى وشها باى مكسرات عندك او جوز الهند









اتمنى ان موضوعى ينول رضاكم

و مش هوصيكم تدعو لاختكم ام يحيى دعوة حلوة

فى رعاية الله اخواتى فى الله
بحبكم فى الله
22
5K

يلزم عليك تسجيل الدخول أولًا لكتابة تعليق.

تسجيل دخول

أبوى تاج راسي
أبوى تاج راسي
تسلم ايديك شكلها تحفة
فتونه الحبوبه
فتونه الحبوبه
واوووووووو
جميلة جداً وفكرة جديدة ....تسلم الايادي
🌸صفاء🌸
🌸صفاء🌸
ماشاء الله تسلم ايديك وباين عليها لذيذه
جورجيو أرماني
جورجيو أرماني
يعطيك العافيه حبيبتي
عطر ومطر"
عطر ومطر"
تسلم إيدك... الفكره جديده


يعطيك ألف عافيه...