هلا بنــات شخباركم ؟
اول شي أزف لكم خبر تشريف امير العايله حبيب قلبي الله يحفظه ويخليه لي
( فــــــــــــارس )
يا بنات شعور الامومه شعور رهيب والله ماتوقعت اني بحبه زي كذا طول عمري مااطيق الاطفال
لكن سبحان الله ... اذا ولدتو ياكروشات بالسلامه راح تعرفون .. طبعا اقصد
البكريات مدري يمكن اللي جايبه من قبل بتقول ...شخباري شعور قديم هههههههه...
كله تبغين تناظرينه ... كله تبغين تلعبين بأصابيعه ... تنبسطين لما يبتسم وهو نايم
احيانا حتى لما يبكي تتأملينه وتتبسمين <<< منتي اول وحده يصير عندك طفل خخخخخ
والحين .......
زي ماوعدتكم بقول لكم تجربتي مع التخدير النصفي في مستشفى بروكير بالخبر
للي بيقلط من هنا ... هذا موضوعي الاول ...
http://forum.hawaaworld.com/showthread.php?t=1790323
بيوم السبت 27 / 6 / 2009 كان الموعد المحدد
وصلنا هناك وخلص زوجي اجراءات الدخول ورحنا نختار الغرفه اللي نبغاها
زوجي يبغى غرفه تطل على المجمع خخخخخخ مدري مين اللي بيولد والا شدعوه فيني حيل اقوم اطل .... ضحكني
والله فاضي ....
اخترنا الغرفه وصورني اخر صوره وانا بكرشتي هههههه
وشوي جت الممرضه وحطو لي الكانيولا ( ابرة المغذي ) ومشو لي المغذي
ونزلوني غرفة العمليات...والله كنت مره خايفه وانا مسويه فيها شجاعه من الصباح
وعلبالي بيرضون زوجي يدخل معي...
وبس سمعتهم يقولون لزوجي ( لا مابيصير تدخل معها ) نقزت وقلت بلييييز ابغاه معي
وما اشوف الا دميعاتي قامت تهل دمعه ورا الثانيه مو راضيين يوقفون...
وامي وزوجي يسكتون فيني خخخخخخ
سكت ودخلوني الغرفه وجتني د رنا وطمنتني وهدأتني الله يجزاها خير
والممرضات الهنديات يحليلهم ماسكين يدي ويواسوني
وجا د عهد وهم مسكين ماقصر هداني وطمني
شرح لي اللي بيصير ...
والله بصراحه كنت اتراجف مدري هي الغرفه بارده والا من الخوف بس حطو
علي زي البطانيه حاره وتطلع دفا ودفيت شوي ..
بعدين طلعو دكاترة التخدير وركبو لي قسطره بوليه وانتو بكرامه والله تعور شوي لما دخلوها
بعدها دخلو الدكاتره وجلست وانا منحنيه لقدام وسميت بسم الله وغزني د عهد ابره بظهري خفيفه
ماحسيت فيها يقول هذي ابرة بنج ... بعدها حسيت بابره ثانيه هذي هي المخدر النصفي ... ماتعور مره يابنات يعني
الم ابره عادي توقعتها افظع من كذا ...
قال لي يلا بسرعه نامي على ظهرك ... شوي الا حسيت بخدر برجليني يركب لفوق
حتى يديني حسيتها ثقيله ... حتى الوعي حسيته تخدر شوي بس بعدني صاحيه...
حطو ستاره يفصل بين الجزء العلوي من جسمي والسفلي علشان لا انا ولا دكتور التخدير يشوف
سألتني د رنا اذا احس بشي قلت لها لا ... الظاهر كانت تقرص فيني تشوف مستوى الاحساس خخخخخ
بس يابنات الشي المزعج اللي صار انو حسيت بلووووعه وابغى ارجع وانتو بكرامه
جابو لي زي الوعاء ارجع فيه ...بس ماطلع شي بس اذتني هالشغله وقالو لي طبيعي
والشي الثاني اللي صار واللي حسيت اني فعلا بموووووت لا محاله
انو وانا بهالوضعيه حسيت اني بديت افقد التركيز وبديت انادي الدكتور بالبطئ
وسمعت الدكتور ينادي ويتكلم بالانجليزي انو بسسسرعه هبط الضغط عندها ودقات
قلبها نزلت ومو منتظمه.....
حزتها بديت اتشهد بالبطئ لاني فعلا حسيت اني راح اموت
سمعته ينادي انو ( اتروبين بسسسرعه ) اتروبين هذا دوا ينشط عضلة القلب
طبعا بما اني اشتغل ضمن الكادر الطبي فأعرف هالشي ...
وحطو لي الاتروبين بالوريد والحمد لله عدت على خير ...
بعدها بديت احس انو في احد يحوس بكرشتي بس بدون الم طبعا بس احس ..
شوي الا سمعت الدكتوره تقول راح تحسين بضغط شوي بس مو ألم
على مااستوعب جملتها الا حسيت زي الضغط خفيف زي اللي احد يدفني مدري كيف اوصفه لكم
شوي الا سمعت صوت البيبي يبكي واخذوه على الهيتر اللي يحطو فيه البيبيات
اول مايطلعون علشان ينظفونه وكذا...
اذكر ان دميعاتي هلت مره ثانيه وانا اناظره عندهم بس مافيني قوه ابكي
اللي صار بعد كذا مااذكره تصدقون....الظاهر انهم حطو لي مخدر خفيف بكمام الاكسجين...
لاني اذكر بس اني ناظرت ولدي بعدين صحوني يقولون لي الحمد لله عالسلامه
راح نطلعك الغرفه....
ودوني الغرفه وانا بعدني مااحس برجليني بس صاحيه
شوي شوي الاحساس يرجع للرجلين...بعد ساعه كذا رجع الاحساس كامل ولله الحمد
يخلونك اول 12-24 ساعه منسدحه على ظهرك ولا حتى مخده..حتى مايجيك صداع...
القسطره يشلونها ثاني يوم الصباح...
بعد ساعتين شربوني مويه مرررره قليله بغطا علبة الماي ...
بالليل جابو لي جلو مع زبادي يعني بس سوفت دايت وما تقدرين تاكلين اكل عادي الا ثاني يوم عالغدا ....
اصلا ماتجوعين ..بس بصراحه عطشت مرررهـ...
اممممممم ايش بعد ؟
الحين بعلق عالمستشفى نفسه والكادر ...
- طبعا كل الغرف برايفت وهذا احسن شي
- النظافه حلوه عندهم ويجون ينظفون كل شوي
- مستوى الاكل ممتاز ويجيبون لك منيو تختارين وش تبين
- اثاث الغرفه نظيف وحلو
- الاخلاق عندهم مره تفتح النفس ... في سعوديتين هناك يهبلون ولبنانيه مره عسوله
غير الهنديات والفلبينيات حقين الحضانه كلهن صراحه يهبلون ...
- الشغلات الثانيه زي الاخصائيه الاجتماعيه ومسؤولة الممرضات ومسؤلة الخدمات
كلهن يجونك ويسألونك وش ناقصك وش تحتاجين ..اي ملاحظات تبينها تقولينها...
- د رنا مرت علي كذا مره هي او دكتوره ثانيه ( د رنا اجازه حاليا وبترجع في 9 جولاي )
- قبل ماتطلعين يمرونك الدكتوره اللي تبعك و د الاطفال ويشرحون لك ويعلمونك عالادويه
- باخر يوم تمرك بنت عسوله تشرح لك عن الرضاعه والتربيه ونصايح زي كذا مع كتيبات
وعينات من الحليب وعدة بيبي جونسون ....
- اهم شي الخياطه عندهم تجميليه يعني لا خيوط ولا دبابيس ولا خرابيط بس خط خفيف مايبين ونهايته خيط
يشيلونه بعد كم يوم ....
اما بالنسبه للتعليقات على العمليه بكبرها...
لا تخافون يابنات سهاله بإذن الله ماراح اقول لكم وش حسيت وكيف الألم بعد العمليه ... يعني اكيد الالم موجود
بس اهم شي خلك شجاعه وقويه ولا تتمادين مع آلامك تغلبي عليها....
والشي الثاني المهم ...
انك بعد العمليه لازم تمشين ..تتحركين .. يعني هم بيحاولون يخلونك تتحركين وتقومين ... راح تحسين بصعوبه
بس لا تستسلمين ... واذا حسيتي بدوخه اول ماتقومين تراه شي طبيعي ... رجعي جلسي عالسرير ورفعي
رجلينك .... ارتاحي شوي ....لاتشدين على نفسك كل شي يجي شوي شوي ....
نصيييييييييييحه ...
بالبدايه جو لي الممرضات يبغون يساعدوني اقوم وامشي اقلها اروح دورة المياه وانتو بكرامه ...
راح يحاولون يشجعونك ويساعدونك .... انا بالنسبه لي أكرهـ شي عندي لما احد يوقف فوق راسي انو ( يلا يلا
شطوره ومدري ايش ) حتى لو كان بأسلوب حلو بس مااعرف اسوي شي و أحد فوق راسي ....
دخت كذا مره عليهم وماقدرت اقوم ...
لما راحو وحسيت اني خلاص لازم اتحرك قلت اعتمد على نفسي ... انا شوي شوي خذت راحتي بالقومه
اخذت الوقت اللي ابغاه ... لأني انا بس اللي اعرف مقدار الالم ومقدار استطاعتي على القومه ...
رفعت راس السرير وشوي شوي نزلت رجليني وظليت جالسه ولما حسيت اني مستعده قمت بشويش
صحيح يمكن ظليت ربع ساعه وانا احاول ليما قمت بس اقلها مافي احد يحن ...
اممممم ايش كمان ؟
بس
وأي سؤال ياحلوات لا تترددون
الله يوفقكم ويقومكم بالسلامه ويسهل عليكم ....
بنات بس ابغى دعوهـ حلوهـ .....
موفقييييييييييييين
دبدوبه وغنوجه @dbdobh_oghnogh
عضوة جديدة
يلزم عليك تسجيل الدخول أولًا لكتابة تعليق.
الحمد لله على السلامه و مبروك ماجبتي
عقبالي وكل الكروشات بس ماقلت لنا ليه عمليه مو طبيعي؟؟
عقبالي وكل الكروشات بس ماقلت لنا ليه عمليه مو طبيعي؟؟
هفف
•
لا يمكنك مشاهدة هذا التعليق لانتهاكه شروط الاستخدام.
الحمد الله على السلامه ويتربى بعزكم
بس حبيت اسأل يعني حالتك نفس حالت انا عندي قلبي دقاته غير منتضمه يعني انتي زي ولا شي تاني
وانا ابغي اولد طبيعي ماأ بي عمليه ادا دقات غير منتضمه يعني لازم عمليه والله خوفتيني الله يشافينايارب ويشفي جميع مرضا المؤمنين
بس حبيت اسأل يعني حالتك نفس حالت انا عندي قلبي دقاته غير منتضمه يعني انتي زي ولا شي تاني
وانا ابغي اولد طبيعي ماأ بي عمليه ادا دقات غير منتضمه يعني لازم عمليه والله خوفتيني الله يشافينايارب ويشفي جميع مرضا المؤمنين
الحمدلله على سلامتك حسيت بالبرد و انت تحكي الحكايه كأني كنت في غرفة العمليات :) انا اختي ولدت طبيعي بس حست نفس الشي الدوخه الي قلتي عليها لان جاها فقر دم لانها نزفت شوي....و جلست تبكي بعد ما طلعت من المستشفى تحسب انها بتضل تعبانه على طول لكن بعد اقل من اسبوع صارت زي الفل و تضحك وتتحرك و نست كل شي الظاهر هي الولاده كده سواء طبيعي او عمليه.
الصفحة الأخيرة
ماقلتي لنا كم تكلف الولاده عندهم