الجزء الثالث
==============
يوم الخميس .. كانوا مهره وميرة في الصالة إلا احمد .. ما كان في البيت وراشد حاطينه ع الكرسي
ميرة: هاهاها .. اخيرا انا وانت مع بعض وابوك مب موجود
مهره: مييروه شو بتسوين في الياهل؟
ميرة: الحين بتجوفين .. تعال انت هني .. انا من متى وخاطري اعضك واعصر خدودك بس ابوك ما يخليني اونه خايف عليك مني
مهره: ميرووه تراني بقول لأحمد شو بتسوين ف ولده
ميرة: لاااا لا تقولين له اذا قلتي له بيذبحني
مهره: انزين اتركي الولد
ميرة: مابا .. ما سويت فيه شي من يوم ما انولد
مهره: لا والله؟؟
ميرة: اتريي دقيقة بس .. ومسكت راشد اونها تحضنه وعصرت الولد وتم يصييييييح
مهره: مااااااالت عليج يبي الولد
ميره: اونه صاح .. ما سويت فيك شي حضنتك وبس
مهره: ما يحبج قومي عنه
ميره .. ترمس راشد: مااااااالت عليك وعلى ويهك .. بنجوف منو بيشيلك مرة ثانية
مهره: ما نباج اتشيلينه
ميره: بنجوف .. انتي باجر بتسيرين الجامعة بنجوف منو بيهتم فيه
مهره: الله يخلي امي
ميره: بنجووووووووف ... انا بطلع حجرتي .. وبرتب كتبي شوي.. (( وهي طالعه لعبت بشعر راشد وسحبته شوي((
مهره: ميروووه يالخايسة .. صيحتي الولد
شوي ودش احمد وقال: شو بلاه ولدي؟؟ ليش يصيح؟؟
ميرة: انا بسير حجرتي
احمد: تعااااااااالي شو سويتي فيه؟؟
ميرة: ماشي .. ولدك دلوع .. حضنته صاح .. لعبت بشعره صاح
احمد: لا والله؟؟ .. انا اعرف دفاشتج
ميرة: حراااام عليك .. حليلي احب اليهال
احمد: وااضح .. سيري حجرتج احسن
ميرة: ما بسير .. بتم هني .. يبوني اتم بروحي .. وهم يتسولفون مابا
احمد: خلاص يلسي هني واذا طلعت فوق بضربج
ميرة: بتجوف بخبر ابوي
احمد: اففف .. خلااااااص .. سوي إلي تبينه
مهره: ههههههههه .. شو سويت اليوم؟
احمد: ماشي كنت عند سعيد
ميرة: تقصد عند حرمتك
احمد: بتسكتين ولا شو؟؟
ميرة: خلاااص خلااص بسكت
مهره: هييه .. احسن لك عشان ما تتضايج او تمل
احمد: هيه صح .... عطيني راشد ما جفته اليوم .. وتم يلاعبه
شوي ويت ام احمد ...
ام احمد: حمود شحالك؟؟
احمد: تمااام
ام احمد: حمود اباك في موضوع
ميره: يعني نسير حجرنا؟
ام احمد: هيه
مهره: طردة يعني
ام احمد: هيييه طرده يالله بسرعة
مهره: احمد اشيل راشد وياي؟؟
احمد: لا ما عليه خليه عندي
ميرة: مهرووو يالله خلنا نسير .. ما يبونا نسمع السالفة
مهره: ما عليج ..يا خبر اليوم بفلوس بكره ببلاش
احمد: هههههههههه .. سيروا يالله
ام احمد: تموا في حجركم لين ما ازقركم
مهره + ميره: ان شاء الله .... وساروا اثنيناتهم حجرة مهره
ميرة: مهرووو
مهره: خييير
ميرة: شو السالفة؟
مهره: اي سالفة؟
ميرة: إلي امي تقولها لأحمد
مهره: ما اعرف
ميره: انزين فكري وياي شوي
مهره: والله ما اعرف بس امي في هاليومين كله تمدح في بنت خالتج مزنة
ميره: اعععععععععععععععععععععععع .. لوعتي جبدي ليش ذكرتي اسمها
مهره: هههههههه مب انتي تبين تعرفين السالفة
ميره: انزين شو يخصها هي؟؟
مهره: ما تعرفين يمكن امج تبا تخطبها حق احمد
ميرة: والله اذبح اخوي اذا سواها
مهره: هههههه وانا بعد .. ما بخليه يفكر في السالفة
ميره: تبط جبدي
مهره: وانا بعد .. بس امج مستانسه عليها
ميره: هيه واايد
مهره: تعرفين ..
ميره: لا ما اعرف شو؟
مهره: امج كانت تبا تخطبها حق احمد اخوي من زماااان بس هو رفض .. وتزوج شيخة
ميره: صج؟؟؟؟؟ .. والحين تبا تخطبها حق احمد مرة ثانية؟
مهره: الظاهر .. بس ما اعتقد انه بيوافق
ميره: ان شاء الله .

في الصاله ..
ام احمد: حمود شرايك في مزنة؟؟
احمد: من اي ناحية؟
ام احمد: من كل النواحي
احمد: كيف يعني؟
ام احمد: اقصد رايك فيها كأم لراشد
احمد: فاشلة
ام احمد: ويي ليش؟؟
احمد: بس جيه
ام احمد: عطني سبب مقنع
احمد: يمه انا رفضتها قبل .. ورافضها الحين ما بوافق عليها ابدا
ام احمد: عطني سبب مقنع .. سبب واحد وبس
احمد: يمه صدقيني ما تصلح انها تكون ام لراشد
ام احمد: ما اقصد انها تكون ام لراشد .. انت ليش رافضها هي
احمد: يمه.. انا ما بقول شي .. انتي جوفي كل شي بنفسج وقارني بينها وبين شيخة الله يرحمها .. اقل شي يعني يوم تطلع .. مظهرها مب مظهره وحدة محترمه .. وانا مستحيل اني اوافق عليها
ام احمد: افففف منك
احمد: يمه كلمي خالتي وفهميها اني مستحيييل مستحيييل اوافق على بنتها
ام احمد: خلاص بس انت شرايك بالفكرة؟
احمد: اي فكرة؟
ام احمد: انك تتزوج مرة ثانية .. حمود انت بعدك صغير عمرك 23 سنة .. بعدك ما وصلت ال30
احمد: يمه حرام عليج.. شيخة توفت قبل ثلاث اشهر بس .. انا بعدني اجوفها بعدني احس بوجودها .. يمه شيخة حرمتي وما اقدر انساها .. وما اتخيل اني بتزوج غيرها
ام احمد: يعني بتم جيه؟؟ منو بيعتني في راشد؟
احمد: انا بربيه انا بعتني فيه .. انا بسوي له كل شي .. انا بحقق رغبة امه وبخليه يستوي دكتور .. انا بتحمل كل شي بس عشان احقق هالشي
ام احمد: ما عليه .. انا بخليك الحين وبعدين يصير خير
احمد: يمه .. انا ما بتزوج مرة ثانية
ام احمد: كيفك .. بس بتريا اليوم إلي انت بتقول لي فيه انك بتتزوج مرة ثانية
احمد: ما اعرف شو اقولج يمه
ام احمد: لا تقول شي
احمد: تصبحين على خير
ام احمد: شو بترقد الحين؟ ما تعشيت
احمد: راسي يعورني وااايد .. انا تعشيت عند سعيد
ام احمد: خلاص عيل وانت من اهل الخير
طلع احمد حجرته وهو متضايج وااااااااااااااايد .. يقول في نفسه .. شو هالحالة .. قبل لا يدش حجرته طلعت له مهره وقالت له: حمووود صح ما قلت لك
احمد: خير؟
مهره: انا باجر بسير الجامعة
احمد: صج؟ وبتردين؟
مهره: طبعا برد
احمد: اقصد بتردين نفس اليوم؟
مهره: لا برد يوم الاربعاء
احمد: لا والله؟؟ ومنو بيهتم في راشد يوم ما اكون في البيت؟
مهره: هههه ميرة
احمد: لااا الله يخليج إلا هذي
طلعت ميرة من الحجرة وقالت: شو بلاها ميرة الحلوة؟
احمد: انتي مصدقه عمرج وايد
ميرة: طبعا .. شو بلاكم؟ شو تقولون
مهره: ماشي اقوله اني بسير الجامعة باجر وانج بتعتنين في راشد
ميره: انا؟؟ صج؟؟
احمد: لا طبعا انا مب مستغني عن ولدي
ميره: ما عليه ما عليه بنجوف
احمد: هههه انزين سيري وارقدي الحين
ميره: ما ايني رقاد
احمد: افهمي وفارجينا ابي اقول شي حق اختج
ميره: افففففف .. انزين انزين
وسارت حجرتها وقفلت الباب
مهره: حرام عليك زعلت
احمد: لا تخافين ما تزعل .. تعالي بقولج شي ... ودشوا الحجرة
مهره: بتقول لي شو قالت لك امي؟
احمد: شدراج؟
مهره: اعرف .. خير قول؟
احمد: تباني اتزوج مزنه
مهره: توقعت .. انت شرايك؟
احمد: مستحيل اني اوافق
مهره: احسن لك .. هههه ميروه تقول انها بتذبحك اذا فكرت في هالشي
احمد: ميروه شدراها؟
مهره: ماشي كنت نفكر بالسالفة وقالت لي هالكلام
احمد: هييه .. الحين انتي بتسير باجر ؟
مهره: هييه .. باجر
احمد: اهاا .. اوكي خلاص .. منو بيوديج؟
مهره: ابوي
احمد: هييه .. ما تبيني اوديج؟
مهره: عادي .. بس اخاف انك مشغول
احمد: لا مب مشغول
مهره: حمود فيك شي؟
احمد: لا ماشي بس راسي يعورني
مهره: خلاص عيل ارقد الحين وارتاح .. وان شاء الله يروح عنك الصداع
احمد: ان شاء الله
مهره: احط راشد في سريره؟
احمد: لا خليه عدالي
مهره: اوووكي .. تصبح على خير
احمد: وانتي من اهل الخير
طلعت مهره من الحجرة وسارت عند ميرة
مهره: ميرووه زعلتي؟
ميرة: لأ
مهره: شو بلاج تقولينها بدون نفس
ميره: ماشي
مهره: يالله عاد قول لي شو بلاج؟
ميره: ماشي ماشي
مهره: هييه عرفت الحين شو بلاج
ميره: شو ؟
مهره: حزينه لأني باجر بسير .. لا تخافين كل يوم بدق عليج
ميره: ههههههه .. لا صج بشتاااق لج وااايد
مهره: اعرف
ميره: صدقت عمرها .. ما بشتاق لج بفتك منج
مهره: هههه انزين خلاص .. بس لا تزعلين من احمد تعرفين انه متغير من وفاة شيخة
ميره: لا ما زعلت .. انا اعرف هالشي
مهره: هيه صح .. السالفة مثل ما توقعنا
ميره: صج؟ وشو قال؟ بذبحه اذا وافق
مهره: لا تخافين رافض بالثلاث
ميره: اشوووه ريحتيني
مهره: ههههه خلاص عيل .. انا بسير حجرتي
ميره: تصبحين على خير مقدما
مهره: وانتي من اهل الخير

ثاني يوم عقب صلاة الجمعة ..
احمد: مهرووو .. يالله ورانا درب
مهره: نازله .. خلاص خلصت .. شو بتشيل راشد وياك؟؟
احمد: هيه اباه يتمشى
مهره: لاحق
احمد: هههه اباه وياي ما بتركه بروحه
مهره: اووكي براحتك
احمد: يالله خلنا نسير
مهره: لحظة بسلم على امي وابوي وميره
احمد: بسرعة لا تتأخرين انا اترياج في السيارة
مهره: اوووووكي
سارت مهره وسلمت على اهلها وطلعت
في السيارة ..
مهره: احمد شو بلاك؟
احمد: انا ماشي
مهره: امبلا .. احيدك ما تحب توديني الجامعة
احمد: هههه لا خلاص تغيرنا
مهره: شو بلاااك؟ قول لي
احمد: لا ماشي بس طفرت من البيت .. احتمال اسير بيت ثاني بروحي
مهره: ينيت؟
احمد: ليش؟
مهره: وراشد؟ .. يوم انت تسير الدوام منو بيجوفه؟
احمد: هذا هو .. انا ما اقدر اسوي شي
مهره: ما عليك يا ريال .. انت متضايج من كلام امي.. لا تخاف ما بتفتح وياك هالسالفة
احمد: متأكده؟؟
مهره: هيه .. ما بتفتحها إلا عقب 10 سنوات
احمد: يعني بتفتحها مرة ثانية
مهره: ما عليك هي بتمل من هالشي وبعدين مزنه بتنخطب جريب حق ولد عمها
احمد: مب شرط مزنه .. يمكن وحدة ثانية
مهره: حموود .. شو هالكلام؟؟ .. تعرف تذكرني بعمري
احمد: هههه .. ليش؟
مهره: تعرف اني ما ابي اعرس واني اسوي هالحركات عشان ما اعرس
احمد: ههههههه .. شو سوي .. طفرت من هالسالفة
مهره: ما عليك .. ما بيستوي هالشي دامك ما تباه
احمد: ان شاء الله .. يالله شدي حيلج يالدكتورة
مهره: ان شاااااااا الله ولا يهمك

الجزء الرابع
==========
بعد شهرين ..
احمد: يمـــه .... مهره .. مييييروووه ... وينهم محد في البيت؟
نزل احمد الصالة وجاف الشغاله وسألها: وين امي وخواتي؟
الشغالة: ماما روهي بيت ماما مريم
احمد: هييه .. اووكي خلاص .. حطي عربة راشد في سيارتي
الشغالة: انزين
احمد: رشودي حبيبي .. بتتطلع وياي اليوم وبنصيع عدل في المول
وطلع حجرته وبدل ملابس ولده وطلعوا من البيت
وفي الطريج اتصل احمد بيت اخته مريم
احمد: الوو السلام عليكم
مريم: وعليكم السلااااااام والرحمة .. شحااالك؟
احمد: تمااام .. انت شحالج وشخبارج؟
مريم: والله بخير .. الحمدلله
احمد: شو السالفة .. ميمعه الكل عندج
مريم: هههه لا ماشي بس حمود تعبان شوي ويوو يجوفونه ويتطمنون عليه
احمد: هييه .. سلامات ما يجوف شر
مريم: الشر ما اييك.. مر علينا
احمد: ان شاء الله .. بخلص حواطه وبييكم
مريم: لا والله؟؟
احمد: هههههه .. انا خلاص وصلت المول
مريم: وراشد وينه؟
احمد: عندي
مريم: بتنزله وياك؟ .. وانت بتشيله؟
احمد: ما بشيله في يدي بحطه في العربة وخلاص
مريم: بعقلك انت؟
احمد: ليش شو فيها؟
مريم: لا ماشي .. بس شو بتسوون؟
احمد: ماشي بيلس في الكوفي شوب .. وبعدين بحوط في المحلات وبشتري شي حق رشود
مريم: اب مثالي
احمد: هههههه . لازم .. اووكي مريوم انا بنزل الحين وانا راد بمر عليج
مريم: ان شاء الله
احمد: اجوفج على خير .. مع السلامة
مريم: ان شاء الله .. مع السلامة
نزل احمد وحط ولده في العربة وسار الكوفي شوب .. وكلهم يطالعونه ومستغربين منه واحمد عاادي عنده ولا جنه يجوف احد .. يلس وتم يقرى جريده .. شوي ورن تلفونه
احمد: الوو
سعيد: هلااااا بو الشباب .. شحالك وشخبارك و وينك؟
احمد: والله تمام .. انا في المول انت شحالك؟
سعيد: يسرك الحال.. صج انت في المول انت بروحك؟
احمد: لا انا وراشد
سعيد: نعم؟؟ .. انت ومنو؟
احمد: انا وراشد ولدي
سعيد: بروحكم؟
احمد: هيه بروحنا شو بلاك؟
سعيد: لا ماشي .. بس كيف يبته؟ اقصد راشد
احمد: بالسيارة .. كيف بيبه
سعيد: يعني انت شايله طول الوقت؟
احمد: لاااا شو انا مينون حاطنه في العربة وادزه
سعيد: شرات الامهات
احمد: هيه
سعيد: عادي ؟؟
احمد: سعيد شو بلاك؟؟ هيه عادي ولدي واتمشى وياه
سعيد: يعني محد يطالعك
احمد: لأ محد يطالعني
سعيد: هييه اووكي خلاص كنت بيي المول بس غيرت راي
احمد: افااا ليش؟
سعيد: خلاص غيرت رايي
احمد: ما بتيي لأن راشد وياي؟
سعيد: لااااا .. شوو .. هههه .. يا رياال .. لا ماشي عندي شغل
احمد: اووكي خلاص اخليك عيل
سعيد: اجوفك يوم السبت في الدوام
احمد: ان شاء الله .. مع السلامة
سعيد: مع السلامة
احمد: شو بلاه ؟؟ .. شي غريب ..

يوم السبت في الدوام في مكتب من المكاتب
هند: لحقوواااا ..
عاشة: شو بلاااج؟
هند: يوم الخميس جفت شي
عاشة: شو جفتي؟
هند: شو بلاج ترمسين جيه بدون نفس؟
عاشة: ماشي .. هالمدير طفرني .. ليش متأخره وليش تطلعين قبل نهاية الدوام حشرني
هند: اي مدير؟
عاشه: منو غيره؟ احمد يوسف
هند: ههههههههههههههههههههه
عاشه: ليش تضحكين انا قلت شي يضحك؟
هند: لا ماشي .. بس هذا يتحكم علينا هني .. وحرمته تتحكم عليه في بيته
عاشه: شو تقولين؟ شدراج انتي؟
هند: جفت هالشي بعيوني الثنتين
عاشه: والله؟؟
هند: هيه والله .. انا بقولج شو جفت
عاشه: قوووولي تراه باط جبدي والله
هند: ههههههه .. يوم الخميس سرت المول
عاشه: هيه وبعدين
هند: كنت ماشي وشوي وجفت مديرنا احمد يوسف .. في الكوفي شوب و وياه ياهل
عاشه: والله؟؟
هند: هيه .. كان يعتني فيه وجيه
عاشه: هيه .. وبعدين
هند: ويسوي له الحليب ويشتري له
عاشه: والله؟؟؟؟؟؟؟؟ ... اتخيل شكله .. والله طافني المنظر
هند: قلتلج تعالي وياي بس انتي ما يتي
عاشه: بس خلاص لا تقهريني
هند: هههههههههه منظر عجيب .. قلت في خاطري هذا حرمته تتحكم فيه عدل مخليته يسير ويشتري حق ولده وهي راقده في البيت
عاشه: ههههههههههههههه
شوي وجافوا احمد وهو يلف ع المكاتب ويجوف الموظفين
هند: عاشه هذا هو وصل
عاشه: ههههههههه .. والله خاطري اقوله حرمتك تتحكم فيك وانت تتحكم فينا
هند: بس عاد بيسمعج الحين
عاشه: خلاص سار
شوي ودشت وحدة من الموظفات اسمها ريم وقالت: سمعت كلامكن
هند: هههههههه صج؟
ريم: هيه
عاشه: جفتيه شو يسوي فينا
ريم: هيه بس حبيت اوضح لكم شي
هند وعاشه :قولي .. وضحي لنا
ريم: حرمة مديرنا .. توفت قبل خمس اشهر
هند: والله؟؟
ريم: هيه
عاشه: وما عرس عقبها؟
ريم: لأ
هند: وييي .. طحنا في الريال .. حليله والله
ريم: خلاص كل وحدة تكمل شغلها
عاشه: ان شاء الله
وطلعت ريم
عاشه: والله افتشلت يوم دريت
هند: هيه والله .. انا ما كنت اعرف
عاشه: وانا بعد
هند: خلاص خلصي شغلج

مرت الاشهر .. وصار عمر راشد سنة
وفي يوم كان احمد يقرى كتاب وراشد يلعب عداله ترك احمد الكتاب وتم يلعب ويا ولده ويتسولف وياه شوي وسمع ولده يقول: (( بابا )) ..
سكت احمد وما صدق إلي يسمعه وقال: رشودي قولها مرة ثانية..
ضحك راشد وقال: (( بابا((
ما عرف احمد شو يسوي .. شل ولده وتم يحضنه ويبوسه .. وطلع الصالة وقال: سمعتووه قال بابا .. انا سمعته قالي بابا .. كنت اسولف وياه قالي بابا .. انا مب مصدق .. اخيييرا قالها .. رشوودي .. انا ابوك .. قولها مرة ثانية ..ابي اسمعها منك
سكت راشد وتم يطالع ابوه .. احمد حضن ولده بقووو .. ودمعت عينه وسار حجرته وطلع صورة شيخة وقال: شيخة .. ولدنا تكلم اليوم .. قالي بابا .. اذكر قبل يوم كنت اقولج انه بيزقرني قبل لا يزقرج .. بيقول بابا قبل ماما .. واليوم تحقق هالشي .. اليوم سمعته قالي بابا .. فرحني واايد .. بصراحة كل ما يكبر يستوي شراتج .. يشبهج واايد .. يذكرني فيج .. ولدنا كبر يالغالية ..
سكت احمد وما كمل كلامه وحضن ولده والدموع في عينه وقال: كنت اتمنى لو ان امك ويانا الحين .. بس الله يرحمها ويغفر لها
رقد احمد وحلم بشيخة .. جافها مستانسه وااايد وقالت له: احمد هالله هالله في رشودي ..انا اعرف انك ما تقصر وياه بس اباك تعلمه يقول ماما .. مب بابا وبس وضحكت
نش من رقاده .. وكبرت فرحته يوم جاف حرمته في حلمه .. كان يتمنى هالشي دوووم .. وتحقق اخيير


الجزء الخامس
============
بعد سنتين ..
ام احمد: مييروووه ... ميرووه تعالي هني
ميره: ان شاء الله .
ام احمد: مريوم اختج بتيي عنا اليوم
ميره: آآآآه .. اووكي
ام احمد: شو بلاج تتنهدين؟
ميره: لا ماشي .. مستانسه
ام احمد: سيري وكلمي الشغالة خليها تسوي فطاير
ميره: بقول لها الحين
العصر...
مريم: السلام عليكم
ام احمد: وعليكم السلااااااااااااااااام .. شحالج وشخبارج
مريم: الحمدلله بخير .. انتوا شحالكم ؟
ام احمد: والله تمااام تولهنا عليج واايد
مريم: زييين .. لو كنت ادري جان ما ييت اليوم وييتكم باجر عسب تتولهون علي عدل
ام احمد: لا والله؟؟ ..
مريم: ههههههه
ام احمد: وينهم عيالج؟
مريم: يايين الحين .. بس انتبهوا على راشد ترى حمود فيه جدري
ام احمد: هيييه .. الله يعينج
مريم: اخاف يعديه واحمد يحشرني
ام احمد: احمد بيحشرج بيحشرج .. بس اذا يا رشود الجدري بيكون افتك منه وخلاص
مريم: هيه والله
ام احمد: يالله ما عليه المهم انتي شحالج؟
مريم: بخييير والله .. ها شو صار في ذاك الموضوع؟
ام احمد: اي موضوع؟
مريم: يمه .. موضوع احمد .. انا كلمت البنية وهي ما عندها مانع انها تاخذ واحد عنده ولد
ام احمد: لااا الله يخليج .. آخر مرة فتحت وياه هالموضوع حشرني وتم يقول انتوا ما تحسون وما تفكرون ومن هالكلام
مريم: يالله عليه .. اونه وفي
ام احمد: شسوي فيه الحين
مريم: خله برايه هو الخسران
ام احمد: يالله ما عليه
مريم: وين راشد؟؟
ام احمد: فوق عند مهره
مريم: مهرة هني؟؟
ام احمد: هيه .. عندها اجازة لأن بعد اسبوعين بتبدأ امتحاناتها
مريم: خلهم ايبون راشد
ام احمد: ولا يهمج ....
وزقرت ام احمد مهره ويابوا راشد
مريم: هلا هلا برشودي .. يمه
ام احمد: خير ..
مريم: راشد كل ما يكبر يستوي شرات امه
ام احمد: جفتي عاد .. بغيناه شرات ابوه بس بيطلع شرات امه
مهره: وشو بلاها امه؟ شو إلي كان ينقصها ؟ الله يرحمها ما قصرت
مريم: وييي نسيت محامي الدفاع هني
مهره: هيه محامي الدفاع عندج مانع؟
مريم: لا ما عندي
مهره: يبي الولد .. يبيه .. بخليه عندي احسن له بواايد
مريم: خذيه
ام احمد: شو بلاكم انتوا؟
مهره: رمسي بنتج انا بطلع فوق
مريم: سيري وادرسي لج شي افيد لج
سارت مهره حجرة ميره
مهره: اختج هذي
ميره: شو بلاها؟
مهره: طفرتني .. كل ما تجوف رشود تقول: ويي يشبه امه
ميره: ياااااااالله .. الحين عيالها إلي يشبهونها .. كل واحد طالع على ابوه يبط الجبد
مهره: هههههههه هيه والله
ميره: حليلها شيخه .. ما قصرت مع احد
مهره: هيه والله .. انا الصراحة عايبني تصرف احمد
ميره: اي تصرف؟
مهره: انه ما يبي يعرس .. صج انه بيتعب وجيه .. بس انا اجوف ان ههالشي احسن وشيخة تستاهل
ميره: هيه والله صح
مهره: انا مليت من هالكتب .. بسير العب رشود
ميره: بيي وياج
ونزلوا اثنيناتهم .. شوي ويووا عيال مريم وتموا يلعبون كلهم مع بعض
مهره: وييي حمود فيه جدري .. اخاف يعدي راشد
ميره: هيه والله خلاص طلعيه فوق .. حليله حمود .. بروحه متعذب
مهره: هيه والله انتي تمي وياهم انا بسير فوق وبحاول اني ارقده
ميره: اوووووكي
وطلعت مهره ويلست مع راشد لين ما رقد

وبعد يومين .. كان احمد راقد .. شوي وياه راشد وهو يصيح وحط راسه على بطن ابوه وتم يصيح
احمد: رشودي حبيبي شو فيك؟
راشد ( يصيح وما يرد على ابوه (
قام احمد وشل ولده ولقاه مسخن
احمد: رشودي .. انت ارقد هني انا الحين ببدل وبشيلك المستشفى
بدل احمد ملابسه وشل ولده وسار المستشفى بسرعة
احمد: خيير ... شو فيه؟
الدكتور: لا تخاف ما فيه شي ..
احمد: الولد مسخن
الدكتور: هيه لأن فيه جدري
احمد: جدري؟؟؟ .. من وين ياه؟
الدكتور: يمكن من اي شخص في البيت ولا شي
احمد: ممم خير ان شاء الله
الدكتور: انا بكتب لك دوا .. واستخدمه وبيريحه ان شاء الله
احمد: ان شاء الله .. مشكووور
الدكتور: هذا واجبنا
اخذ احمد الدوا و رد البيت
مهره: خيير سلامات شو بلاه راشد؟
احمد: ماشي جدري
مهره: ويي .. هذا اكيد من محمد
احمد: ليش محمد ولد مريم فيه جدري؟
مهره: هيه
احمد: واختج هذي يايبه ولدها هني
مهره: شدراني عنها
احمد: ما عندها سالفة
مهره: اشيله عنك؟
احمد: لا ما عليه انا بهتم فيه
مهره: خلاص عيل .. تصبح على خير
احمد: وانتي من اهل الخير

ثاني يوم
احمد: مهره انا بسير اقدم على اجازة وبرد
مهره: حمود ما يحتاي انا بتم وياه
احمد: لا عادي .. ما بطول ان شاء الله
مهره: اووكي
طلع احمد وسار الدوام .. وسار يقدم ع الاجازة
المدير: خير ان شاء الله
احمد: ولدي مريض
المدير: سلامات شو فيه؟
احمد: جدري
المدير: لا والله؟
احمد: هيه .. ولد اختي فيه وعدى ولدي
المدير: الله يعينك .. بس احمد كثرت اجازاتك
احمد: شو نسوي ..
المدير: تزوج وفكنا
احمد: ..............................
المدير: خلاص ما عليه لا تزعل .. بعطيك اجازة مدة اسبوع تكفي؟
احمد: هيه .. مشكور
المدير: العفو
طلع احمد وهو متضايج ويقول: حتى هذا حاشرني .. جني يالس على قلبه

في البيت..
احمد: مهرووو ..
مهره: انا هني تعال
احمد: خذيت اجازة مدة اسبوع
مهره: هييه زيين .. ان شاء الله يتحسن
احمد: ان شاء الله
مهره: انا عطيته الدوا وهو راقد الحين .. سير انت ارقد وارتاح ويوم ينش يصير خير
احمد: ان شاء الله .. وينه هو؟
مهره: في حجرتك
احمد: خلاص انا بسير ارقد لأني ما رقدت طول الليل
مهره: اووكي عيل اذا بغيت شي انا في الصالة
احمد: اوووووكي .. تعبتج وياي
مهره: افاا عليك انا اختك ..
احمد: الله يخليج لي
مهره: ويخليك لي ولراشد
طلع احمد حجرته .. وتلحف عسب يرقد .. شوي وسمع صوت راشد وهو يصيح
احمد: رشودي .. انت رقدت الحين؟.. تعال عندي
ورقداه عداله ..

مر الاسبوع الاول واحمد على هالحال .. اما راشد تحسنت حالته وااايد .. خلصت اجازة احمد ورد لدوامه
سعيد: هلاااااااااااااااا .. نور المكتب
احمد: بوجودي
سعيد: اعرف
احمد: انت وينك؟ انا تميت اسبوع كامل في البيت وما جفتك
سعيد: انا ما ياني الجدري
احمد: لا والله؟؟؟ لا تجوف راشد تعال وجوفني حي ولا ميت
سعيد: لا انت حي .. اكيد انت بالذات ما بتموت
احمد: لا والله؟؟ ... وليش تقول جيه؟
سعيد: ادري بك ما تموت .. تموت الكل وانت ما تموت
احمد: بس عاد
سعيد: ههههههه اووكي خلاص .. تعرف كل إلي ف الشركة يتساءلون
احمد: عن؟
سعيد: عنك
احمد: ليش؟
سعيد: يبون يعرفون ليش ماخذ اجازة
احمد: هيه وشو قلت لهم؟
سعيد: ماشي قلتلهم طلع يتمشى
احمد: انت من صجك؟
سعيد: ههههههههههه لا امزح وياك .. قلتلهم ان ولدك مريض
احمد: هييه تحريت
سعيد: بس الموظفين لعبوا لعب في غيابك .. إلي يغيب وإلي يتأخر
احمد: هييه غاب القط العب يا فار
سعيد: هههههههه هيه والله
احمد: قوم يالله بطلع الف ع المكاتب
سعيد: اوووووكي

مرت السنوات ... وصار عمر راشد 4 سنوات ... وحطاه ابوه في الروضة وفي اول يوم دوام
راشد: بابا .. تعال وياي
احمد: ان شاء الله بابا
راشد: دش وياي الصف
احمد: لا تخاف بتم وياك
راشد: لا تتركني بروحي
احمد: حبيبي لازم اسير دوامي
راشد: بتسير وبتتركني بروحي؟؟
احمد: لازم تتعود على هالشي
راشد: مااااااااابااااااااا .. ما بدش داااخل .. بتتركني برووووحي ..
ويلس ع الارض تم يصيح
احمد: رشووود حبيبي .. لازم ادش .. جوف كل اليهال داخل
راشد: انا ياهل؟؟ .. مااااااباااااا ..
وكمل صياحه
احمد: حبيبي فضحتنا .. كلهم يجوفونا يالله دش بسرعة
راشد: مابا
احمد: يالله بسرعة ..
راشد: مابا
احمد: اذا ما دشيت بخليك هني وبسير دوامي
راشد: هيه .. انت ما تحبني .. بتخليني بروحي .....
وتم يصيح
احمد شل ولده وقاله: رشودي انا ماحبك؟؟
راشد: هيه ما تحبني
احمد: صج؟؟
راشد: ....................
احمد: انزين خلاص انا ماحبك يعني ما بشيلك.. (ونزلاه) راشد انا بسير دوامي صفك هناك..
ومشى لين عند الباب
راشد: بابا .. زعلت؟
احمد: لا تكلمني
راشد: بابا انت تزعل بسرعة والله .. يعني ليش جيه انا امزح ويااك .. خلاص تعال ببوسك
احمد: لا تقرب مني
راشد: زين .. بس بيي عندك ..
وسار عند ابوه وحضناه
احمد: خلاص ما نبا لحظات رومانسيه جدام الكل .. يالله تعال بوديك صفك
راشد: بابا اقعد وياي شوي .. شوي بس
احمد: شوي وبس
راشد: زيين
ودخل احمد صف ولده ويلساه في مكانه وقاله: رشودي يوم يخلص الدوام انا بيي وباخذك لا تسير مع اي واحد انت ما تعرفه انا بييك
راشد: ان شاء الله
طلع احمد وركب سيارته وقال: ماعرف شو بيسوي اليوم

في الروضة ..
كان راشد يصيح
راشد: بااااااااابااااااااااا .... اباه الحييييييييييين ...
المدرسة: راشد حبيبي
راشد: لا تقولين لي حبيبي .. ابا بابا
المدرسة: تعال بعطيك حلاوة
راشد: مابا
المدرسة: ليش؟؟ كل إلي في الصف يبون
راشد: انا ماابي كيفي .. ابا بابا
المدرسة: تعال بنلعب
راشد: مابا
حاولت مدرسته وياه لين ما هدى شوي وسكت

في الدوام
سعيد: هلااا بو راشد
احمد: اهلين
سعيد: شو بلاك؟
احمد: لا ماشي احاتي راشد
سعيد: هييييه صح اليوم دوام
احمد: هيه
سعيد: الله يعين .. بيسوي لهم مناحة
احمد: طبعا
سعيد: هو ما يبعد عنك دقيقة .. تباه يداوم؟
احمد: اعرف .. يالله خير ان شاء الله
سعيد: تبا قهوة؟
احمد: هيه ... متى بيخلص الدوام؟؟
سعيد: هههههه تونا بعدها الساعة 8 ونص
احمد: اعرف .. بس راشد ما بيطوف سالفة الروضة على خير .. ولدي واعرفه
سعيد: الله يستر .. يكفي انه ولدك
احمد: شو تقصد؟
سعيد: لا ماشي .. يعني بس دامه ولدك يعني شراتك اكيد
احمد: بس بس
سعيد: خلااص بسكت .. ما بتطلع .. تلف ع المكاتب
احمد: مب الحين
سعيد: ليش؟؟ .. هذا هو وقتك
احمد: هيه كلهم يعرفون هالشي .. بغيره اليوم
سعيد: والله انك ...
احمد: شووو ؟؟
سعيد: لا ماشي .. بس الله يعين الموظفين
احمد: هههههههه .. يستاهلون
سعيد: حمود بسألك سؤال بس لاتزعل
احمد: خلاص عيل لا تسأل
سعيد: ليش؟
احمد: تعرف اني بزعل .. لا تسأل
سعيد: بس انا ابي اعرف شي واحد .. بس انت لا تزعل
احمد: اووكي .. قول
سعيد: احمد انت ليش ما تبا تعرس؟؟ .. انت عمرك الحين 27 .. وإلي في عمرك عندهم 3 واربع
احمد: سعيد .. انت ليش ما عرست لين الحين؟
سعيد: ما ابي .. ليش قلبت السالفة؟
احمد: ما قلبتها ولا شي بس اوضح لك إني ما ابي يعني انت ما عرست .. اما انا عرست وعندي ولد .. وراضي بهالشي
سعيد: اووكي خلاص ... حمود؟
احمد: هلا ..
سعيد: زعلت من سؤالي؟
احمد: لا ولله ما ازعل منك
سعيد: الحمدلله

في مكتب الموظفات ....
هند: اف اف اففففف
عاشه: شو بلاااااج؟؟
هند: وينه هذا
عاشه: منو؟
هند: مديرج .. انا ابي اطلع الساعة 10
عاشه: ليش؟ شو عندج؟
هند: ابي اسير المول ..
عاشه: سيري العصر
هند: ماحب اسير العصر .. ابي اسير الصبح
عاشه: كيفج والله .. سيري متى ما تبين
هند: هو دومه ايي هالوقت .. شو عنده اليوم
عاشه: ما ادري
هند: بتريا لين الساعة 10 وبعدين بطلع .. برايه
عاشه: تراه اذا ما لقاج بتروحين فيها
هند: كيفه والله
عاشه: انا قلتلج
هند: اففففف .. بطلع اليوم
عاشه: انا حذرتج .. لا تسيرين الحين سيري العصر احسن لج

الجزء السادس
===========
في مكتب احمد ..
احمد: افففف .. الساعة 10 الحين .. مالي خلق اطلع والف ع المكاتب ..
سعيد: والمعنى؟؟ بتتركهم بحالهم؟
احمد: لأ طبعا .. يالله قوم

في مكتب عاشه وهند
هند: عويش .. مديرج ما بيي .. انا بطلع الحين
عاشه: شووو؟؟
هند: إلي سمعتيه
عاشه: واذا يا المدير؟ شو اقول له؟
هند: قول لي له اني طلعت .. والله مليت منه ومن قرارته هو يطلع وياخذ اجازة ونحن ممنوع
عاشه: هو عنده عذر .. حرمته متوفيه وعنده ولد يعتني فيه
هند: لا والله؟؟ .. هو متى ما يبي يطلع ونحن يحشرنا
عاشه: لا تجمعين انا محد حشرني .. قولي انه يحشرج انتي
هند: لا والله وانا ما اشتغل عند ابوه
عاشه: بس تشتغلين عنده
هند: لا والله؟؟ اجوفج تدافعين عنه واايد
عاشه: ادافع عن الحق وبس
هند: جوفي انا ما يهمني وخلي مديرج ينفعج .. لين الحين ما رقاج درجة وحدة
عاشه: هند بسج عاد
هند: لا ما بسكت .. يكفي اني متحملته .. باط جبدي
عاشه: هنـــــد .. يكفي
هند: شو بلاج؟؟
عاشه: الاستاذ احمد وراج
هند: ها؟؟ شو ؟ منو ؟ .. احم .. هلا بو راشد
احمد: هند ... تعالي مكتبي
هند: ان شاء الله بوراشد
طلع احمد وسار مكتبه
هند: عااشوووه .. هذا متى يا؟؟
عاشه: من ويوم ما قلتي .. انا ما اشتغل عند ابوه
هند: وييي .. رحت فيها خلاص
عاشه: حذرتج .. بس يالله ما عليه سيري ولا تتأخرين
هند: الله يستر
وطلعت وسارت مكتب احمد
هند: السلام عليكم
احمد: وعليكم السلام
هند: انا ......
احمد: انتي شو؟؟ ما تشتغلين عند ابوي صح؟ .. اعرف هالشي
هند: لا ما قصدت بس
احمد: بس شو؟؟
هند: ماشي
احمد: خذي هالورقة ووديها الطابق الثاني
هند: ورقة شو؟
احمد: اقريها
هند: نقل؟؟ ... بتنقلني من هني ؟
احمد: هيه تراني باط جبدج.. شيلي الورقة ونزلي تحت.. صح اقري الملاحظة الموجودة.. تراني خصمت من راتبج لمدة شهرين
هند: بس .. ليييش؟؟
احمد: لعدة اسباب.. الاول التطاول على مدير القسم .. الثاني الخروج في منتصف الدوام بدون اذن وبدون سبب .. وعل فكرة وصلتني شكاوي كثيرة عليج وانج ما تخلصين شغلج
هند: بس انا
احمد: خذي الورقة وسيري الطابق الثاني .. مع السلامة
طلعت هند من المكتب وهي معصبه وسارت عند عاشه
هند: كله منج
عاشه: انا شو سويت؟
هند: لا ماشي .. ساكته واطالعين المدير وراي ما قلتي شي
عاشه: انا حذرتج وحاولت اني المح لج بس انتي ما انتبهتي لي
هند: لا والله؟؟
عاشه: هيه .. شو قالج ؟
هند: ماشي نقلني من القسم .. وخصم علي جزء من راتبي مدة شهرين
عاشه: الله يعينج
هند: هذا إلي قدرتي عليه
عاشه: شو اسوي؟ اتم اصيح وياج؟
هند: لا تسوين شي ... وطلعت من المكتب

في مكتب احمد
سعيد: عاااااااش حموود
احمد: هههه شو بلاك؟
سعيد: ياخ انت احسن واحد في هالشركة
احمد: صج؟؟ .. ليش؟
سعيد: اخيرا فكيتنا من هاي إلي اسمها هند
احمد: ههههههههه
سعيد: باطه جبدي من زمااان
احمد: وانا بعد
سعيد: صج؟؟ .. دامها باطه جبدك .. ليش صبرت عليها كل هالفترة
احمد: ما اقدر انقلها من القسم بدون سبب .. بس سالفة اليوم تكفي انها تنطرد من الشركة
سعيد: هيه اعرف .. بس انت طيب .. عسب جيه نقلتها
احمد: ههههههه.. انا خليها تنزل تحت وهم بيطردونها .. ما ابي اصدر قرار الطرد .. خلهم هم إلي يطلعونه
سعيد: هيه صح ..وبعدين الكل بيوقفون ضدك
احمد: اعرف هالشي
سعيد: والله انك .... خبييير
احمد: هههه طبعا.. هيه صح سعيد انا بطلع الحين بسير ايب راشد وبرد باخذ لي اجازة ساعة وحدة وبس
سعيد: اووكي .. الله يحفظك
احمد: يالله مع السلامة
طلع احمد من الدوام وسار الروضة ودش داخل وسار صف راشد ولقاه يالس ومربع يده
احمد: رشودي .. يالله حبيبي بنرد البيت
راشد: ..........
احمد: رشوود .. يالله ... سار عنده
راشد: انت منو؟
احمد: نعم؟؟ .. راشد انا ابوك
راشد: انا ماعرفك
احمد: راااشد ... شو هالكلام
راشد: ماعرفك
شوي ويت مدرسة راشد وقالت: خير؟؟
احمد: لا ماشي باخذ ولدي البيت
راشد: انت منو؟ انا ماعرفك
احمد: راشد .. عن هالحركات
المدرسة: اسمحلي يا اخ .. الولد ما يعرفك
احمد: شو ما يعرفني .. انا ابوه
راشد: قرب بجوف ويهك
احمد: كل ها وما تجوف ويهي؟؟
راشد: قرب ...
قرب احمد من ولده .. مسك راشد ابوه وحضناه بقووو .. وتم يضحك
احمد: ويا ويهك .. يبالك ضرب
راشد: ههههههه بابا اشتقت لك
احمد: هيه واضح .. يالله قوم
راشد: ان شاااااالله

في السيارة
احمد: تعرف اذا عدت هالحركة مرة ثانية بتجوف شغلك
راشد: هههههه ليش؟
احمد: بس
راشد: اوكي .. بابا زعلت؟
احمد: لا مستانس
راشد: بابا انا آسف
احمد: سامحتك خلاص
راشد: بابا ما بعيدها
احمد: قول ان شاء الله
راشد: ان شاء الله
احمد: شو سويت اليوم؟؟
راشد: ماشي
احمد: تميت اتصيح؟
راشد: انا؟؟ .. انا ما اصيح
احمد: صج؟؟؟؟
راشد: لا شوي بس
احمد: هيييه .. يالله انزل وصلنا البيت .. انا برد الدوام
راشد: اووكي
احمد: ايب لك شي وانا راد؟
راشد: مممم .. بتصل فيك وبقول لك
احمد: خلاص .. سير ارقد الحين
راشد: مع السلامة بابا
احمد: مع السلامة
ورد احمد دوامه .. وهناك
سعيد: احمد انا فكرت بشي حلوو
احمد: شو هو؟
سعيد: شرايك اليوم انا وانت نسير السينما؟
احمد: انا وانت وراشد؟
سعيد: لأ انا وانت
احمد: ما ابي
سعيد: اففف .. خلاص انا وانت وراشد
احمد: خلاص موافق
سعيد: ما تتحرك بدون ولدك
احمد: طبعا
سعيد: بنسير عقب صلاة العشا
احمد: هيه احسن .. لأني ما ابي اضيع الصلاة
سعيد: هيه صح .. خلاص بنتقابل هناك
احمد: ان شاء الله

الساعة 4 العصر .. في بيت احمد
راشد: عمتي ميره
ميره: نعم شتبي؟
راشد: خلاص ما ابي شي
ميره: هههه .. تعال هني امزح وياك بس .. حبيب قلبي تعال
راشد: ابوي تأخر اليوم صح؟
ميره: يعني مب وايد الحين بيي
راشد: هييه
ميره: انت رقدت؟
راشد: هيه
ميره: الحين بيي لا تخاف
راشد: بترياه في الصالة
شوي و دش احمد
احمد: السلااااام عليكم .. وعلى الحلو إلي يترياني
ميره: احم احم اخجلتم تواضعنا
احمد: استغفر الله .. قلنا الحلو إلي يتريانا
راشد: ههههههه بابا يقصدني
ميره: مالت
احمد: عليييج .. وين الباجي؟
ميره: مادري
احمد: هييه صح رشوود .. اليوم انا وانت وسعيد بنسير السينما
ميره: صج؟؟ بيي وياكم
احمد: وين بتيين؟
ميره: السينما
احمد: جب جب .. ها إلي قاصر
ميره: رشود بتوديه وانا
احمد: رشود ولد
ميره: بلبس كندورة بستوي ولد
احمد: بتسكتين ولا اسكتج
ميره: خلاص بسكت
احمد: يكون احسن .. مهرووه وينها؟
ميره: .........
احمد: شو بلاج ساكته
ميره: توك قلت لي اسكتي
احمد: خلاص ارمسي
ميره: في حجرتها فوق
احمد: بقول لها تيين ويانا السينما .. ههههههه
ميره: لاااااااااااااااا .. انا حليلي من متى اقول لك
احمد: هههههههههه شو صدقتي .. لا بقول لها اني بودي راشد وياي
ميره: هيه انا حليلي من متى ابي اطلع ابي اسير مكان طول الاجازة ونحن في البيت
احمد: خلاص ولا يهمج.. وعد مني يوم الاربعاء بوديج انتي ومهره دبي وما بردكم لين ما تقولون بس خلاص ملينا ردنا البيت
ميره: صج؟
احمد: هيه والله
ميره: وبنشتري كل شي على حسابك
احمد: عطيناج اصبع خذيتي اليد كامله
ميره: هههه .. خلاص مب كل شي
احمد: ان شاء الله

عقب صلاة العشا
احمد: هلا سعيد
سعيد: وينك تأخرت
احمد: خلاص وصلت
سعيد: راشد وياك؟
احمد : طبعا
سعيد: يالله تعالوا
في البداية كان كل شي طبيعي بس في نص الفيلم ..
راشد: ورااااااااااااااااااااااااااك .. جوفه جوفه وراااااااااااك بييييييييضربك .. انتبه
احمد: رشود حبيبي فشلتنا .. كلهم يطالعونا
راشد: يا غبي .. جوفه وراااااااااااك بيضربك الحين
سعيد: مب انا قلت لك لا اتيبه
احمد: بس عاد مب وقت كلامك الحين
راشد: اضرببببببببببه ... بسرعة لف وراك
احمد: رشوودي تعال هني .. الناس بيطردونا الحين
سعيد: انا ما اعرفكم
احمد: سعيد ويا ويهك تبريت منا
سعيد: ما يخصني فيكم انت وولدك
احمد: بتجوف شغلك
واحد من إلي في السينما: ولد منو هذا؟؟
سعيد: توهقنا .. سكت ولدك
احمد: ما يبي يسكت
سعيد: انزين بتجوفون
احمد: شو بتسوي؟
سعيد: ولد منو هذا؟؟؟ حشرنا
احمد: سعيد .... صج انك ما تستحي
سعيد: نبا نجوف الفيلم بهدووء
راشد: اخييييييييييييرا انتبهت كان بيذبحك اضربه
سعيد: شكلنا ما بنخلص
احمد: تقصد شكلنا بننطرد الحين
سعيد: هيه صح يالله شل ولدك ويالله خل نطلع بكرامتنا
احمد: راشد .. يالله خلنا نرد البيت
راشد: مابا ابي اجوف الباقي
احمد: حبيبي بيب لك الفيلم .. بنجوفه في البيت
راشد: بجوفه هني ..
احمد: الحين بيطردونا
راشد: لااااااااااااااااا والله؟؟ ليش؟؟
احمد: بس لا تزاعج فضحتنا .. بيطردونا لأن صوتك واطي ومحد يسمعه
راشد: مااااااابااااااا ابي اجوف الفيلم
احمد: راشد يالله بسرعة باجر عندك دوام
راشد: ماااااااابااااااا .. وبدأ يصيح
سعيد: كله منك قلتلك لا اتيبه .. وانت ما طعتني
احمد: زين .. خلاص بنطلع الحين
وراشد يصارخ ما يبي يطلع يبي يجوف الفيلم .. واحمد شل ولده وطلعوا برع
سعيد: اففف اخييرا
احمد: هيه والله
راشد يصيح: ابا ارد داخل
احمد: انت شغلك في البيت
سعيد: هيه لازم تقسى عليه
احمد: وانت بعد .. تبريت منا على طول
سعيد: احم لا ما قصدت
احمد: بتجوف شغلك ... الحين بنرد البيت
راشد: زيين
وردوا البيت ....

الجزء السابع
===============
ثاني يوم العصر .. كانوا ام احمد ومهره في الصالة .. ام احمد ترمس بالتلفون ومهره تدرس
ام احمد: افااا عليج .. اكيد بتوافق .. لا تحاتين .. تركي السالفة علي .. ان شاء الله .. برد لج خبر .. هيه .. في اي وقت.. هههههه .. طبعا .. خلااص .. مع السلامة

في حجرة احمد..
احمد: هلا سعيد
سعيد: اهلين
احمد: شحالك؟
سعيد: بخير
احمد: شو بلاك؟؟
سعيد: احمد تقدر تيي عندي الحين؟؟ اباك في موضوع مهم
احمد: خير؟؟
سعيد: يوم تيي بقول لك
احمد: اووكي خلاص ربع ساعة واكون عنك
سعيد: خلاص عيل اترياك
احمد: يالله عيل مع السلامة
سعيد: مع السلامة

في الصالة ..
مهره: يمه .. منو هاي؟
ام احمد: عمتج
مهره: اي وحدة؟؟
ام احمد: عمتج حصة .. ام خالد
مهره: هيييييييه
ام احمد: ما تبين تعرفين شو تبا؟
مهره: له .. مايخصني فيها
ام احمد: مهرووه إلي ترمسين عنها عمتج
مهره: انزيين
ام احمد: مهره
مهره: خير يمه
ام احمد: شرايج في خالد؟
مهره: منو خالد؟
ام احمد: مهرووه عن الاستهبال .. خالد ولد عتمج حصة
مهره: هيه شو بلاه؟
ام احمد: شرايج فيه؟
مهره: من اي ناحيه يعني؟
ام احمد: من كل النواحي
مهره: ممم .. ياهل .. جاهل .. فاشل ..
ام احمد: بس بس بس .. هذا ولد عمتج شو هالكلام إلي اسمعه منج؟
مهره: هذا رايي وبس
ام احمد: مهرووه جاوبيني شرايج في خالد؟
مهره: قلتلج .. انا ما ادانيه ولا اطيقه ولا ابي اجوف ويهه .. خقاق ورافع خشمه على شو مادري راسب وما عنده شهادة ثانوية .. وفوق كل هذا ما يشتغل
ام احمد: سمعيني .. عمتج دقت علي توها وتقول ان الولد يبي يخطبج
مهره: في عينه .. يحلم هذا
ام احمد: انتي إلي تحلمين انا عطيت عمتج كلمه وخلاص
مهره: لا والله؟؟ منو إلي بيتزوجه انا ولا ..
ام احمد: ولا منو؟؟ تقصديني انا يالدكتورة؟؟
مهره: لا يمه انا ماقصدت جيه .. بس خله يجوف وحدة ثانية
ام احمد: يبي ياخذ وحدة من العيلة
مهره: يا كثرهن بنات عيلتنا
ام احمد: بس هو يباج انتي
مهره: انا ما اباه
ام احمد: مب ع كيفج
مهره: يمه بس ها مب لعبه .. انا ما ادانيه
ام احمد: السالفة انتهت خلاص .. انا موافقه
مهره: انا مب موافقه
ام احمد: كيفج
مهره: ابوي يعرف؟
ام احمد: اليوم برمسه
مهره: واحمد؟
ام احمد: شو بلاه؟
مهره: يعرف؟
ام احمد: لأ
مهره ودموعها في عينها : انا بسير حجرتي
ام احمد: زهبي عمرج .. تراهم باجر بيون عنا
طلعت مهره وع الدري جافت احمد اخوها
احمد: مهروووه شو بلاج؟؟ ليش تصيحين؟
ما رديت عليه وسارت حجرتها بسرعة
نزل احمد بسرعة وسار عند امه وسألها
احمد: يمه مهره شو بلاها؟؟
ام احمد: ماشي
احمد: جفتها تصيح .. كتبها هني .. ما شلتهم وياها
ام احمد: قلتلك ماشي .. بس خالد ولد عمتك حصة يبي يخطبها وانا وافقت
احمد: منو؟؟؟؟؟؟؟ خالد؟؟؟؟ هالخبل خالد؟؟ يفكر في مهرووه ؟؟ ههههههههههههههههه
ام احمد: حمود .. شو هالكلام؟؟ شو بلاكم انتوا ع الريال
احمد: يمه ما لقيتوا غير خالد؟؟ هذا اخبل عنه ماشي
ام احمد: بس عاد.. السالفة انتهت وباجر بيون وكل شي بيتم
احمد: ومهره موافقه؟
ام احمد: رايها مب مهم
احمد: شوو؟؟ رايها هو اهم رايي لازم هي توافق وبعدين نحن
ام احمد: يالله عليكم يالمتخرجين.. ها تفكيركم؟؟ .. خالد ولد عمتها ولازم توافق عليه شو بيقولون عنا الناس
احمد: هذا إلي هامنكم .. كلام الناس؟.. ما تهمكم حياة بنتكم؟ بتعيش مع واحد جاااهل وما يعرف شي .. رااسب ومب فاهم شي
ام احمد: هذا إلي همكم ناجح وراسب
احمد: هيه طبعا .. يعني مهروه السنة الياية بتتخرج من كلية الطب يعني دكتورة وخالد هذا لين الحين ما يشتغل بالعقل يعني هذا ما ينفع لمهره
ام احمد: السالفة انتهت خلاص
احمد: لا مانتهت .. ابوي يعرف؟
ام احمد: يوم بينش من رقاده بقول له
احمد: هيييه .. انا بطلع وبجوف اختي
طلع احمد واخذ كتب مهره وياه .. وسار حجرة مهره دق الباب
احمد: مهره فجي انا احمد
فجت مهره الباب .. والدموع تارسه عينها
احمد: مهروووه .. ما تسوى عليج خلهم برايهم
مهره: شو برايهم؟؟ .. انت تعرف شو بيسون؟
احمد: هيه اعرف بس لا تخافين ما بيستوي شي
مهره: شو ظمنك؟
احمد: تركي السالفة علي وخلاص
مهره: امي قالت انهم بيون باجر ... مابي مب ع كيفهم .. هذي حياتي انا
احمد: ما عليج .. قلتلج تركي السالفة علي .. ولا انتي ما تثقين فيني؟
مهره: امبلا اثق فيك
احمد: خلاص عيل .. غسلي ويهج .. وهذا هي كتبج .. انا بسير الحين .. هيه صح راشد عنده واجب انا تميت وياه وخلص نصه .. تمي وياه شوي لا تخلينه يطلع ويلعب لين ما يخلص كل إلي عليه
مهره: ان شاء الله ... انت وين بتسير؟
احمد: سعيد داق علي .. يباني في سالفة مهمه
مهره: سالفة مهمه؟؟ وسعيد؟؟ .. عرفت
احمد: هههههههه .. شو عرفتي؟
مهره: يباك تسير وياه مكان وتحاوطون .. ماعنده سالفة
احمد: شدراج؟
مهره: اعرفه
احمد: هههههههههههه زيين .. يالله تآمريني بشي؟
مهره: سلامتك ..
احمد: هيه صح اذا ابوي نش دقي علي
مهره: ان شاء الله
طلع احمد وفي الطريج تم يفكر ويقول: غريبة اول مرة سعيد يرمسني بهالطريقة .. السالفة اهم من طلعه وحواطه .. اكيد يبي شي

في بيت سعيد
سعيد: وينك تأخرت قلت لي ربع ساعة .. مرت ساعة إلا ربع
احمد: ما عليه اسمح لي بس استوت سالفة
سعيد: خيير؟؟
احمد: لا ماشي
سعيد: لا قوول .. راشد فيه شي؟
احمد: لا ماشي .. راشد ما يخصه في السالفة
سعيد: عيل؟؟
احمد: مهره
سعيد: مهره ؟؟ شو بلاها؟؟
احمد: شو فيك؟؟؟ ... مافيها شي
سعيد: توك تقول مهره
احمد: ماشي .. امي تقول لها لازم توافقين على خالد ولد عمتي
سعيد: خالد؟؟ .. هذا ال.....
احمد: هيه ال.....
سعيد: يبي يخطب مهره؟؟ .. هذا يحلم؟؟
احمد: هههههه الظاهر
سعيد: ومهره موافقه؟
احمد: لا مسويه لنا مناحة في البيت.. امي تقول لها لازم توافقين عليه وهو ولد عمتج ومن هالكلام .. وهم بيون باجر .. عسب يعلنون الخطوبة
سعيد: بهالسرعة؟؟
احمد: جفت عاد .. خططوا وكل شي والحين قالوا لنا
سعيد: هيييه
احمد: خير ان شاء الله .. هيه صح كنت تباني في موضوع مهم
سعيد: لا ماشي
احمد: سعيد؟؟ .. يبتني من بيتنا وتقول سالفة مهمه والحين ماشي؟؟
سعيد: هيه ماشي يعني السالفة مب مهمه وايد .. كنت بقول لك اني بسير دبي تيي وياي؟
احمد: ههههههههههههههههههههههههه
سعيد: ليش تضحك؟؟
احمد: ههههه.. لا ماشي.. بس يوم قلت لمهره ان سعيد يباني في موضوع مهم قالت لي اكيد يباك تطلع وياه وتحوطون
سعيد: هههههههههههههه هيييه
احمد: انا ماقدر ايي وياك باجر
سعيد: هيه .. عسب جيه قلت لك ماشي خلاص
احمد: المرة الياية ان شاء الله .. بس قول لي اذا كانت السالفة فيها حواطه ولا شي
سعيد: هههههه ان شاء الله
احمد: الظاهر ان ابوي نش من الرقاد
سعيد: شدراك؟
احمد: مهره اتصلت
سعيد: هييه
احمد: انا برد البيت .. اجوفك باجر في الدوام
سعيد: ان شاء الله
احمد: يالله مع السلامة
سعيد: مع السلامة
طلع احمد من بيت سعيد .. وتم سعيد في حجرته يفكر بكلام احمد ويقول: دامه ولد عمتها خطبها خلاص بيخلونها توافق .. بنسى السالفة خلاص .. بنسى مهره ... بنساها

وصل احمد البيت ولقى راشد يلعب
احمد: رشود خلصت واجباتك؟
راشد: هيه خلصتهم .. بابا
احمد: هلا
راشد: بابا ابا بلي ستيشن تو
احمد: بشتري لك بلي ستيشن ثري
راشد: مابا ثري .. ابا تو
احمد: انا بشتري لك ثري
راشد: مابا .. ابا تو
احمد: هههههههههه ثري احسن
راشد: ابا توووو
احمد: يالذكي .. اصلا ماشي ثري
راشد توه استوعب السالفة: ههههه هيه صح ماشي .. متى بتشتريلي؟
احمد: مممم يوم ما يكون عندي شغل
راشد: انت كل يوم عندك شغل
احمد: لا يوم الخميس والجمعة ما عندي شغل
راشد: خلاص .. بس لا تنسى
احمد: ان شاء الله
راشد: بابا
احمد: خير بابا؟
راشد: لا ماشي
احمد: شو بلاك؟؟
راشد: نسيت
احمد: هييه .. خلاص يدك نش ولا بعده؟
راشد: هيه نش ... هيييه تذكرت
احمد: شوو؟؟
راشد: اليوم واحد اتصل وكلمني قالي انه يحبني وااايد وانه يبا يشلني وياه
احمد: نعم؟؟؟ .. منو هذا؟
راشد: ماعرف .. بس هو قال لي انه يحبني وانه بيشتري لي إلي اباه
احمد: وانت شو قلت له؟
راشد: ما قلت له شي
احمد: شو ما قلت له شي ؟؟
راشد: ماعرف انا سكت
احمد: متى اتصل؟
راشد: يوم انت طلعت من البيت
احمد: هييه .. وبعدين؟
راشد: بعدين عمتي مهره سحبت مني التلفون وقالت الووو بس هو قفل
احمد: هييه .. وما جفتوا الرقم؟؟
راشد: مادري عمتي مهره تعرف
احمد: خلاص انا بسير وبسألها.. انت دش داخل ولا تطلع برع
راشد: ليش؟؟
احمد: سوي إلي اقوله لك وخلاص
راشد: والبلي ستيشن؟
احمد: بشتريه لك
دشوا احمد وراشد .. وطلع احمد حجرة مهره بسرعة
احمد: مهره ... صج إلي سمعته من راشد؟
مهره: شو قال لك؟
احمد: عن هذاك إلي رمساه اليوم؟
مهره: هيه صج
احمد: وما جفتي الرقم؟
مهره: امبلا .. بس الظاهر انه متصل من تلفون عمومي
احمد: منو هذا بعد .. من وين طلع لنا؟
مهره: ما ادري انا ما حبيت اقول لك ع التلفون عسب ما تخاف وتسوق بسرعة
احمد: ما عليه ما صار شي .. بس منو هذا .. ما سمعتي صوته ولا شي؟
مهره: لا .. انا يوم قلت الوو قفلوا .. تعرف انه من جم يوم ما ادري منو يتصل ويقفل
احمد: صج؟؟؟
مهره : هيه .. انا لاحظت هالشي وميره بعد
شوي ويدش راشد الحجرة
راشد: بابا جوف شو لقيت .. بلي ستيشن يديد .. مكتوب عليه اسمي جوف ر ا ش د
احمد وهو معصب: رده لنفس المكان إلي لقيته فيه
راشد: كان عند باب البيت
احمد: مب انا قلت لك لا تطلع برع
راشد: انا ما طلعت .. بس مادري منو دق الجرس ويوم فجوا الباب لقيته عند الباب
احمد: هييه
مهره: منو هذا بعد؟؟ .. من وين طلع لنا الحين
احمد: مادري بس لازم اعرف هالشي بسرعة
نزل احمد تحت بسرعة وسأل امه
احمد: يمه ماجفتي منو إلي ياب هذا ؟؟ ..
واشر ع البلي ستيشن
ام احمد: لا ماجفت احد
احمد: هييه خلاص .. ابوي وينه؟
ام احمد: في حجرته
احمد: انا بسير له الحين