كنت كتبت قبل قصة ولادتي وما كملتها لان الموضوع تقفل في نفس اليوم.. وبكملها لكم الحين كنت كاتبه:
والحين بكمل لكم:
اهم شي يابنات جت الساعة 12 والحال مثل ما هوقلت برجع لبيتي وقمت اناظر اهلي شخص شخص حسيت انها اخر نظرات لي..حتى امي قبلت راسها ومابي ابين لها انه فيني شي وودعتهم بس بالنظر.. حتى بيتهم والحوش يوم جيت اطلع حسيت انها اخر خطوات لي فيه .. ورجعت لبيتي..
نومت بنتي وعلى طول طيران عالمطبخ جهزت لي كوب نعناع مع قرفه وكمون ..وولعت الفحم عشان احط فيه كبو واتبخر فيه.. واقول ان شاء الله تسهل ولادتي واولد بسرعه.. جت الساعه 2 واحتمى الطلق وانا كل شوي اروح للحمام ولاشفت دم ولا اي شي.. وقمت ادور بذا الصاله لان المشي يسهل الولاده وشوي اصلي وادعي وشوي اكل تمر وشوي اصيح كانت حالتي صعبه جدا جدا..والله ان الطلوق اللي جتني موب طبيعيه تعور مره ومدتها طويله.. اهم شي معاد قدرت اصبر صارت الطلوق كل دقيقتين احس ان روحي بتطلع مع كل طلقه ولا شفت اثر في الحمام قلت يالله بروح للمستشفى وكلي امل ان الرحم منفتح 7سم.. دخلت على بنتي اودعها وطحت عليها وانا اصيح حسيت انها اخر مره احضنها استودعتها ربي وطلعت..
رحت للمستشفى كانت الساعه 6 الصباح على طول اخذوا وزن وظغط وحراره..
وبعدين قاسوا الرحم<<<أكره هذي الحركه .. ومن اصعب الاشياء اللي تمر علي ابكي زي الطفله واسكر رجولي واصارخ حالتي حاله.. كنت ادعي ان اللي تقوسني تكون حليمه معاي..
اهم شي بعد الصيحه والزونبليطه اللي سويتها صار الرحم منفتح 3سم فقط.. وقالوا لي بنعطيك طلق صناعي..
يوم سمعت ذا الكلام قلت لالالا.. والبس ملابسي واكب روبهم الخايس واطلع قلت انا بروح للبيت.. قالو خطر عليك اجلسي..
قلت لزوجي بكل ألم وعصبيه وخوف وحزن كل المشاعر موجوده فيني:انا برجع لبيتي تفاهم معهم.. واطلع عند الباب وقام زوجي وةقع على الاوراق وتخلصت منهم..
لاني مابي طلق صناعي وما احب يكشفون علي للقياس ونفس الوقت مابي بعد هذا التعب اولد قيصري..
ركبت السياره وانا منسدحه من الألم .. شي موب طبيعي.. حتى يوم وصلت للبيت امشي شوي وشوي انسدح عالارض من الام الطلوق والله انها كل دقيقه..
قلت هالمره بصبر لين اشوف اثر بملابسي..
جت الساعه 10 ما شفت ولا شي .. وعيوني حسيت انها بتطلع من الطلوق..
قلت خلاص مفدر اباخذ ابرة ظهر وبولد ما فيني صبر.. طلعت حتى بنتي نسيتها ما ودعتها من حرارة الطلوق..
وصلت للمستشفى وصارالرحم مفتوح 7سم الحمد الله..
طلعت على غرفة الولاده وكانت الساعه 10:30
وش غرفة الولاده رعب اول ما دخلت وحطوني بالسرير استقبلتني فلسطينيه حسبي الله عليها قالت لازم اقيس الرحم.. قلت لها لا توهم قاسوه 7سم .. وتهاوشت معاها وبالخير استسلمت لها.. صرت في حاله اني ارجي الرحمه من الجميع بس اهم شي اولد ولا اموت.. تخيلوا راحت هيبتي من ذيك المنطقه .. صرت افتح رجولي سهوله اللي يبي يقييس يقيس وااللي يبي يشوف يشوف من شدة الألم معاد همني وفي نفس الوقت ابي اساير الجميع لانه لامفر منهم.. مربطيني من جميع الجهات..
اقولكم وش سوت ا الفلسطينيه دخلت يدها وما طلعتها قلت لها خلاص خلاص طلعي يدك وهي تقول اصبري.. وشلون اصبر!! وهي قاعده تقور في رحمي.. تدرون وش سوت!! فتحت كيس الجنين وقامت ذا المويه تنكب..
ومن بعدها والطلوق ورت بعض تقريبا نص دقيقه..
في هذي اللحظات انشغلت في نفسي واتشهد بالشهاده... معاد قدرت اقرا قران ولاحتى ادعيه ..
وزوجي الله يعافيه حاط يده على راسي ويقرا علي شوي ويحط الاكسجين اللي فيه بنج علي شوي.. حطيت له علامات عض وتمخيش في يده من شدة الالام والله لين الحين موجود.. وكان يقول لي حسابك بعدين..
اهم شي من الخوف والتعب كل عضله في جسمي ترتجف كنت بردانه بالمره ونفس الوقت كل جسمي معرق عأن احدد كاب علي مويه.. وهذ الاوكسجين اللي معاه بنج تعبني احس وجهي كله نمل واحس بدوخه قلت خلاص ما ابيه..
كانت تقولي اللممرضه اذا جت الطلقه خذي نفس واذا حسيتي ان البيبي في الحوص زي احساس انو فيك براز الله يكرمكم خبريني.. قلت اوكي وانا ما غير اخذ نفس مع كل طلقه واقول لا اله لال الله.. شفت الموت قدام عيوني..
بعد كذا حسيت انفيه براز الله يكرمكمم وخبرتها وجتني الدكتوره عللى طول وقالت خلاص الراس تحت اشوفه كانت الساعه 12:30.. وجهزوا لها الابر والمقصات وخرابيط كثيره.. حتى سرير البيبي قدامي اشوفه و قالتلي اذا جتك الطلقه ادفعيجت الطلقه الاولى ودفعت.. والثانيه ودفعت واشوف الدكتوره تحط لي ابر ابنج.. قالت لي ادفعي بأقوى ما عندك عشان تولدين بسرعه.. والله يابنات كل امة لا اله الا الله يمكن عددهم 10 من الدكاتره واقفين فرجه علي وكنت اقول اذذا ولدت بهاوشهم.. الحين موب وقته.. وكل ما جت الطلقه شجعوني على الدفع..
اهم شي جت الطلقه اثالثه والرابعه بارده.. بس الخامسه جت طويله.. ومع صراخ الممرضات تحمست ودفعت بأقوى ما عندي والحمدالله طلع البيبي..ااه ااه والله انه احلى شعور تحسين فيه الله يجزا والدينا بالجنه.. كانت الساعه 12:50 بالضبط..
ياحلو البيبي لما يطلع ويحطونه عليك من جد تحبينه..انا ما كان ودي بالحمل وكانت ولادتي الاولى قيصري ما شفت فيها طلعة البيبي.. بس والله انه شعور جميل جدا..
هذي قصة ولادتي من اولها لاخرها.. بس عندي لكم شوية نصايح :
*اكثري من الدعاء المكتوب في الافاده فيما جاء في ورد الولاده.. وادعي لوالديك الله يجزاهم عنا خير الجزاء
*مع اول طلفه تحسين فيها الى اخر طلقه خذي نفس طويل بقدر الامكان..عشان تقدرين عالدفع اذا جا وفته
*لاتخبرين احد انه فيك ولاده الا الشخص اللي بيوديك.. لانهم اذا دروا راح يشتقون معك ويمكن تتأخر ولادتك وتتعسر..حتى لو كانوا اهلك وبيدعونلك لاتقولين لهم.
*لاتروحين للمستشفى الا وانتي مستويه من الألم ..الا اذا انكبت معاك مويه روحي على طول
*خلي معدتك فاضيه بس اشربي سوائل حاره زي النعنع والكمون والقرفه..
*اكثري من اكل التمر قد ما تقدرين لانه يساعدك عند الولاده وخاصه في الدفع
*انا انصح الجميع بابرة الظهر .. لان الطلوق اتعب وتهد الحيل حتى بعد الولاده والنفاس وانتي حره
*ارفضي الطلق الصناعي لانه جدا حار وفي نفس الوقت يمكن يختنق البيبي من شدة الطلق.. وهذا صار لي في ولادتي الاولى
وبس اذا تذكرت شي بقوله لكم.. وعندي نصايح مهمه لكم بعد الولاده (فترة النفاس) وبكتبها في موضوع ثاني ان شاء الله.. ولا تنسوني من الدعاء
عيني شرهه @aayny_shrhh
عضوة جديدة
يلزم عليك تسجيل الدخول أولًا لكتابة تعليق.
الف الف مبروك والحمد لله على سلامتك وعقبالنا ان شاء الله بالولادة السهلة الطبيعية الميسرة ياحي ياقيوم
الصفحة الأخيرة
والله دخلت جو معاك
ما شاء الله عليك عندك صبر مهو بطبيعي
واستفدت من نصايحك