عجب العجاب

عجب العجاب @aagb_alaagab

كبيرة محررات

ساهر يلتقط مخالفات بعض عضوات عالم حواء << مشاركه بحملة قل خيرا او اصمت

الملتقى العام

بسم الله وعلى بركة الله :biggrin2:

السلام عليكم ورحمة الله وبركاته

كيف الحال والاحوال ان شاء الله طيبون وتزقحون وكلو شي زينون :biggrin2:

باختصار وبعيدا عن الكلام التسثير والخنبقه :biggrin2:

شفت المنتدى الله يجزاهم خير حاطين حملة قل خيرا او اصمت

وسولت لي نفسي اني اشارك بالحمله :biggrin2:

وقمت اشتغل على الموضوع الذي هو وليد اسبوعن كاملن من الشغلو عليهو :biggrin2:

بسم الله نبداء الموضوع


مع توضيح بالصور الموثقه التي التقطتها لنا ساهر :biggrin2:

الموقف الاول




اول مشهد تكرر علينا في الاونه الاخير بعالم حواء
وهو التحليـــــــــــــــــــل وما التحليـــــــــــــــــل

طبعا فيه بنات يستاؤن من مشاهدة العضوات لملفاتهم او دخول مواضيعه
او اجبار العضوات بالرد على مواضيعهم

طبعا المجال ماهو للافتاء بالجواز او التحريم
ولسنا اهل لذلك .

ولكن حنا نطالب منهم مسح هذي العبارات التي كثرت كثيرن واصبحت مزعجه جدن بالحيلون
والاهم الارتقاء بالمنتدى !

نجي للطرف الاخر
وهو عدم تقبل العضوات لرغبة العضوه
خلااص هي ماتبي احد يدخل ملفها براحتها لاتدخلونه
فيه عشرات الملفات لعضوات في عالم حواء
ماوقفت على هذي العضوه بس
وعشرات المواضيع الي تنزل يوميا
ولا كل ممنوع مرغوب !!

ملاحظه
دوري الان الحياد لست مع ولا ضد .

واقول لكم يالي كذا
(قل خيرا او اصمت )

الموقف الاخر


موضوووع السوااقه
من اشهر المواضيع التي نوقشت بعالم حواء
ياناس خلااص يرحم امكم خلااص
تعبنا من بنسوق ماحنا سايقين
موضوع النقاش فيه عقيم
ليش ينفتح !!
الامر فيه ظوابط شرعيه وظوابط قانونيه وظوابط مجتمعيه
لاانا ولا انتي الي منتظرينا نوافق ولا مانوافق عشان يسمحون بالسواقه
بتقولون لازم نوضح رغبتنا ومادري ايش
اذا صار فيه استبيان قولي رايك لانه بيكونون
ذيك الساعه صح طالبين رايك !
اما نقاش بالهواء مافيه فايده ليش اتعب نفسي واتكلم فيه

ملاحظه
موقفي هنا الحياد لست مع ولا ضد .
اقولكم يالي كذا
(قل خيرا او اصمت )



الموقف الاخر






اتهااام العضوات
سواء بالتشيع او بالتكفير او بالعلمنه !
لين متى وحنا نطلق على بعضنا احكام ونحدد مذاهب وعقائد
وكاننا نعلم الغيب !
قال تعالى
{ذَلِكَ عَالِمُ الْغَيْبِ وَالشَّهَادَةِ الْعَزِيزُ الرَّحِيمُ }السجدة6

يمكن البنت ماتقصد كلمه وطلعت منها نوضحه لها باسلوب انه
لا يجوز او لا يصح
يمكن فاهمه غلط نفهما يمكن جاهله ننورها
ولكن اذا جلسنا نطلق على فلانه شيعيه
فلانه لبراليه فلانه مدري وشي بعد
هل خرجنا بفائده سواء اننا خسرنا اخت لنا واننا شككنا بها
واتهامنها خطاء ودعت على من اتهمها وقد يستجيب لها الله
لان دعوة المظلوم مستجابه

قال رسول الله صلى الله عليه وسلم ( اتق دعوة المظلوم ، فإنها ليس بينها وبين الله حجاب ) رواه البخاري ومسلم .
اقولكم يالي كذا
(قل خيرا او اصمت )

الموقف الاخر




البدع وماادراك مالبدع
اقري السوره الفلانيه مدري وش يجيك
واقري هذي يحقق لك الله الي بالك
وكرري هذا الدعاء 70 مره يرزقك الله بفلوس
وهذا حديث قوليه فالليل
وغيييره وغيرره

الله قاادر على كل شي ادعيه بالي تبين ادعيه ناجي ربك
مايحتاج صيغ معينه الا الموثوقه الصحيحه
انتبهو مااقول ان مافيه صيغ معينه او احاديث صحيحه
او فضائل لسور القران !
نعم فيه ولكن اتكلم عن الاشياء الغير موثوقه
ويحاولون ينشرونها بعض الفرق مثل الصوفيه او الشيعيه وغيررهم < والحديث يطول
يابنات انتبهو لازم تاكدون قبل نشر اي شي
هل هذا صحيح ورد عن الرسول !
قال الرسول صلى الله عليه وسلم
(( من أحدث في امرنا هذا ما ليس منه فهو رد )) ))

وقال عليه الصلاة والسلام (( من دعا الى هدى كان له من الأجر مثل أجور من تبعه لا ينقص من أجورهمشيئا ومن دعا الى ضلالة كان عليه من الاثم مثل آثام من تبعه لا ينقص ذلك من آثامهم شيئا ))
ماقصرو الاداره ماقصرو الاداره وضعو هذا الموضوع لردع الاحاديث الكاذبه والبدع !
قبل النشر مري على هذا الرابط !


http://forum.hawaaworld.com/showthread.php?t=2565976
571
32K

يلزم عليك تسجيل الدخول أولًا لكتابة تعليق.

تسجيل دخول

عجب العجاب
عجب العجاب
موقف اخر




العنصريه
تعبنا من مواضيع العنصريه
حنا احسن وحنا احسن وحنا اشرف
والدوله الفلانيه احسن من الدوله الفلانيه
والقبيله الفلانيه احسن من القبيله الفلانيه
وحضري بدوي
وخضيري قبيلي
والموضوع ينفتح ماله دخل بهذي الامور كلها
وسبحان الله ينقلب مدري وشلون ينقلب كانه مفتوح عشان نتكلم
عن الاصل والفصل :biggrin2:

نسينا ان اكرمكم عند الله اتقاكم
نسينا لافرق بين عربي واعجمي الا بالتقوى
ولا هي بس عبارات وشعارات نرددها ولانفعلها !
ابدي من نفسك لاتقولين مجتمع مستحيل يتغير
ابدي بنفسك بعيالك باسرتك باهلك خلااص صرنا مجتمع

اقول لكم يالي كذا
(قل خيرا او اصمت )



موقف اخر





الاشاعات :biggrin2:
كل شوي طالعين لنا باشاعه اكبر من الثانيه
مره زلازل مره براكين مره فياضانات مره العقار ارتفع العقار نزل
حتى المواد الغذائيه ماسلمت
عصير اكتشفو فيه وهذا يجيب العقم
وهذا يجيب السرطان
وهلم جرا والي راح فيها الي يصدقون
وجميعا لها اغراض
الي ينشر على عمها ومايادري وين الله حاطه اي موضوع يقراه ينشره
وهذي مصيبه اعظم !
والي ينشر عشان لفت انتباه شوفوني !
والي ينشر لتخريب لسلع معينه
والدوامه كبيرره
اقولكم يالي كذا
(قل خيرا او اصمت )

موقف اخر





التحطييييم :biggrin2:
تجي وحده من اخواتنا منزله لبس عيد او فستان او منزله صور بيتها
او مطبخها او تاخذ رايهم بشي
شوفو بس التحطيم وووع مو حلو وووع قديييم وووع ماعندك ذوق
من باب وجهة النظر وحرية التعبير !
عمر الراي وحررية التعبير ماكانت بالتجريح
بتقولون لي مانحب المجامله مانحب الكذب
ماحد قالكم اكذبو ولا جاملو بس قولي رايك باسلووب !
بالكلمه الطيبه بالكلمه الحلوه صعبه يعني !
مثلا قولي لها حلو بس ناقصه كذا وكذا
او حلو وزيدي عليه كذا وكذا عشان يصير احلا
راعو نفسيات الناس لا تحطمونها .

اقولكم يالي كذا
(قل خيرا او اصمت )

موقف اخر





الدعاوي :biggrin2:
بس شغالين بالدعاوي والتحسب
كل ماطق عود بحصاه قالت جعلك وجعلك
ولو اقولها ادعي على اليهود والكفار
قالت لي كلمتين ولا قالت وشوله حرام ماخطو علي !
سبحان الله
وش خلينا لاعداء الدين اذا كان كل هالدعوات
نقولها لبعض لاخواتنا المسلمات
تحسب ودعاوي والله شعر جسمي يوقف منها
لهذي الدرجه وصل فينا الحال

اقولكم يالي كذا
(قل خيرا او اصمت )

موقف اخر




عدم احترام وجهات النظر
بالغصب وبالقوه بتقتنعين برايي
وخذي مد وجزر
خلاص الله يعطيكم العافيه كل وحده قالت رايها
توكلو على بيوتكم :biggrin2:
لازم يعني غصب تقتنع برايي
لا اكييد خلاص بكيفها انا قلت رايي ليش اجادل
انتهينا وشوله تطويل االسالفه وخلق خلاافات
والجدال الي مامنه فايده !
قال الرسول صلى الله عليه وسلم "أنا زعيم ببيت في ربض الجنة لمن ترك المراء وان كان محقا، وببيت في وسط الجنة لمن ترك الكذب وإن كان مازحا، وببيت في أعلى الجنة لمن حسن خلقه"

اقولكم يالي كذا
(قل خيرا او اصمت )
عجب العجاب
عجب العجاب
موقف اخر





المشاجرات على العام
صراحه شي مخزي ويفشل
بينك انتي وعضوه شي او بينكم سواء تفاهم
عندكم الخاص !
ليش حطووه
عشان الاشياء الخاصه ليش كل العضوات يشوفونه
ويطلعون على المشاكل الي بينكم
وتكبر السالفه
ويتدخلون اطراف مالهم علاقه بالسلفه وممكن انهم يزيدون
الطين بله ويكبرونها

اقولكم يالي كذا
(قل خيرا او اصمت )


موقف اخر




التخريــــــــــــــب
شفنا كيف بعض الاحيان
اذا كان فيه مشاده بين عضوتين في موضوع من المواضيع
نشوف بعض البنات الله يهديهم يتدخلون
وليته بالمصالحه لا بالتخريب
وانتي غلطتي وانتي الحق عليك
وهي صح وانتي غلط
ياختي ماعندك كلمه زينه وماتعرفين تصلحين بين الناس
اسكتي لا تدخلين رجاء لا تكبرين الاموررر
وبعض البنات الله يهديهم تاخذها العزه بالاثم
وتعتبر ان الاعتذار يسقط من هيبتها وينزل من مكانتها
نست ان الاعتذار من شيم الكرام
وان الاعتراف بالخطاء فضيله


اقولكم يالي كذا
(قل خيرا او اصمت )




موقف اخر




الحــــــــــــــــــش
الحش والقيل والقال بحجة الفضفضه !
وبعذر ماحد يعرفنا ولااحد داري عنا
طيب الله مايعرفكم مايدري عنكم !
سبحان الله ياختي ليش الوحده تعرض نفسها لمثل هذي الامور
عمتي قالت عمتي سوت عمتي حيه عمتي عقرب :biggrin2:
سلفتي تغار سلفتي تقلدني سلفتي اخذت خوات زوجي مني
حمولتي فيهم وفيهم حمولتي مايدانوني وحمولتي يكرهوني
عيالهم ازعجوني ازعجو عيالي خربو عيالي
كم مره قرينا مثل هذي المواضيع !
وطبعا مايحتاج نفتح الموضوع من هنا خلااص توالت الحشات من هنا :biggrin2:
وكل وحده تدلي بدلوها :biggrin2:
انتبهو انا مااقول المشكله الي تنزلها العضوه تطلب حل لها او شي
لا انا اقصد ان بعض المواضيع تفتح لهذا الغرض
او ان الموضوع يكون عضوه نزلت مشكلتها تبي حلول وتتفاجاء بان الموضوع انقلب الى مزايدات !
اقولكم يالي كذا
(قل خيرا او اصمت )


{مواقف اخرى }


وطبعا تنقسم النصائح الى زوجيه واجتماعيه << تخصصات وش حسبالكم :biggrin2:

نشووف الاجتماعيه




لوم العضوه واسقاط الاتهامات عليها :biggrin2:
تجي اختنا بالله منزله موضوع تبي نصيحه تبي احد يرشدها
واذا بها تتفاجاء بسيل عارم وموجه مدمره من الاتهامات
والسباب والشيل والحط
ولو انها عنهدم كان قطعوها تقطيع
ياناس ياعلم ياهوه شوي شوي :biggrin2:

ماقولكم لاتقولون الحق بس تضنون لو قلتو الحق بهذي الطريقه
راح تتقبله انتي اسالي نفسك لو غلطتي وجاء احد يعاملك نفس المعامله
تتوقعين انك راح تتقبلين !

مافيها شي لو قلتي والله يافلانه انتي شكلك طيبه وحبيبه وتخافين الله
بس لو سويتي كذا وكذا كان صار احسن
عطيها كم كلمه حلوه بالبدايه بعدين قولي الي بخاطرك من غير تجريح

لاحظو تصرف صفوة الخلق واطهر البشريه
وجه عليه الصلاة والسلام نصيحه وملاحظه لمعاذ رضي الله عنه
وقال يا معاذ .. والله إني أحبك .. فلا تدعن في دبر كل صلاة أن تقول : اللهم أعني على ذكرك .. وشكرك .. وحسن عبادتك ..

وعندما نصح ووجه عمر الفاروق رضي الله عنه
يا عمر .. إنك رجل قوي .. فلا تزاحمن عند الحجر ..
لاحضتو كيف وصل النصيحه عليه الصلاة والسلام
لاحضتو كيف سبقها بكلام طيب هين لين وفتح له مدخل ليوصل اليه النصيحه
حتى تتقبله النفس البشريه

ياليت انا نقتدي بالرسول بالقول والعمل ولا نردد شعارت وهتافات بدون عمل < والحديث يطول

اقولكم يالي كذا
(قل خيرا او اصمت )
عجب العجاب
عجب العجاب
نصيحه اجتماعيه اخرى




الخـــــــــــــــــــــدم
النصائح شغاله على هالخدم واشكال والوان واغلبها تحريضيه الا من رحم الله !
مثلا حللي فلوسها اكرفيها كرف الحمير (الله يعز من يقرا )<< هذي من عندي :biggrin2:
تاخذ فلوس ماتشتغل بلاش !
انتبهي هذي واضح انها سحاره !
كلهم سحره خطافات رجال حسبي الله عليهم !
انتبهي لاتعطينها رواتبها الا اذا جت تروح !
سكري عليها لاتاخذينها معكم هذا الي ناقص تمشى بعد !
لاتضحكين معها وتسولفين لاتعطينها وجه !
وغيييره وغيررره وغيرره
ماقول ان فيه منهم كذا ماقول انهم ملاك ولا يغلطون ماقول ان فيه منهم يعملون بالسحر والجن .
لكن النظره التعميميه غلط صح فيه منهم كذا وعانينا اغلبنا من الخدم وبلاويهم لكن هل جميع الحالات متشابهه
هل جميع الخدم متشابهون هل جميعهم مايخافون الله !

اصلا تجي وحده منزله موضوعها وتوها شغالتها ماجت ولا شافت خيرها من شرها :biggrin2:بس جت تستشير وانهالت عليها النصائح ماشاء الله !

نسينا قول الرسول عليه الصلاة والسلام (اعطو الاجير حقه قبل ان يجف عرقه ).
نسينا قوله بابي هو وامي (الرفق لا يكون في شيء إلا زانه ولا ينزع من شيء إلا شأنه)
فعن أنس بن مالك رضي الله عنه قال: (خدمت رسول الله صلى الله عليه وسلم عشر سنين والله ما قال لي أف قط ولا قال لي لشيء لم فعلت كذا وهلا فعلت كذا). روه مسلم

اقولكم يالي كذا
(قل خيرا او اصمت )

نصيحه اجتماعيه اخرى :biggrin2:


.



قطيعة الرحم

ماشاء على التحريض على قطيعة الرحم
تجي وحده منزله موضوع عن مشكله بينها وبين اختها وابنت عمها واو خالتها او جدتها او امها او ابوها << وهذي والله الطامه العظمى اذا وصل الامر للتحريض لقطيعة الوالدين باب من ابواب الجنه

واذا بنا نتفاجاء بـ هي غلطانه عليك ولو اني منك مااطب بيتها !
والله سوينا للناس كل شي ومالقينا غير المصايب بلا زيارات بلا هم !
والله الناس مايبين بعيونهم شي احسن شي اقعدي ببيتك ولا تروحين لهم !
لا تكلمنيها ولا تعتذرين هي المغروض تحس بغلطها وتعتذر !
وهلم جرراااا

ليش التحريض يابنات على قطيعة الرحم خلاص انتي قطعتي رحمك
ليش تحرضين الناس وتاخذين اثامهم واوزارهم ويتعلقون برقبتك يوم القيامه
ويقولون ياربي هي الي اشارت علي !
قال الرسول صلى الله عليه وسلم (لا يدخل الجنه قاطع رحم )
اقولكم يالي كذا
( قل خيرا او اصمت )



















ومادراك مالنصائح الزوجيه

المخربه للبيوت :biggrin2:


نصيحه زوجيه مدمره :biggrin2:



التفتيش والتنبيش وراء الزوج
ياختي وش لك بالطلايب والتفتيش وسماع نصائح المخربات
مثل فتشي ورا زوجك لاتنامين على اذونك
يامامنه للرقال يامامنه للميه في الغربال
ولو اقولها وش الغربال فكت فمها :biggrin2:
لاتنصحين الناس بخرب بيوتهم رجاء وانتي بيتك عامر
ربي قادر على ان يرسل لك من يخرب بيتك
ولو كان بدون قصد الله كرمنا بالعقول نعرف نفكر صح مو بس تفكير غلط .
اوما فتشي جواله !
فتشي ايميله !
فتشي بوكه !
فتشي سيارته !
اووخص يالمباحث الجنائيه :biggrin2:

اقولكم يالي كذا
(قل خيرا او اصمت )
عجب العجاب
عجب العجاب
نصيحه زوجيه اخرى مدمره :biggrin2:




نصائح الخروج مع الزوج :biggrin2:

والله زوجي بس يناظر بالحريم !<< وتلقين الرجال ماطق لهم خبر بس من قو الغيره :biggrin2:
زوجك عينه زايغه ومايستاهلك !
زوجك اكيد له علاقات مع البنات مدام هذي تصرفاته !
انتهبي لزوجك ترا البنات صارو هم الي يغازلون الرجال !
وتجيب للحرمه المشاكل وهي بغنى عنها ويصير كل مابغو يطلعون
صارت هالقضيه انت تناظر وانت خاين وانت مغازلجي ..

اقولكم يالي كذا
(قل خير او اصمت )

نصيحه زوجيه مدمره اخرى :biggrin2:




الـــــــــــــــــــزن :biggrin2:

زني على راسه لين يجيبلك الي تبين !
زني على راسه لين يجيب لك شغاله !
زني على راسه لين يجيب لك بيت ملك !
زني على راسه لين يطلعك من بيت اهله !
زني على راسه لين يغير الكنب !
ووووووووووو

ياناس كلن وضروفه كلن وحسب استطاعته وكلن ومادياته

وبعدين انتي زوجك ينفع معه الزن هي زوجها ماينفع معه !
وبعض الرجال اكره ماعنه المره الزنانه الحنانه
كنها نحله باذنه :biggrin2:
والنتيجه شوفت عينكم ....

اقولكم يالي كذا
(قل خيرا او اصمت )

نصيحه زوجيه اخرى مدمره :biggrin2:





التحريض ضد ام الزوج

والله هذا الي يقطع قلبي لا حول ولا قوة الا بالله
وصلت فينا المواصيل لهذي الدرجه اعوذبالله
وكان ام الزوج الشيطان الرجيم
او العدو الاول للاسلام
معامله بكرره وحقد وظلم
وان لله وان اليه راجعون
الدنيا دواره يااحبايبي والي تسوينه اليوم تلقينه بكرره
والي تزرعينه اليوم تحصدينه بكره
شفنا كيف النصائح ضد ام الزوج لا تروح معكم
من حقكم تتمشون لحالكم بدون مراقبه !
هي عجوز مايصلح لها الطلعات والتمشيات !
عيشي حياتك توك بعز شبابك !

لييييييييش ياناس والله حرام عليكم هذي النصائح الي تساعد الشيطان وتعينه
ولا حول ولا قوة الا بالله
اقولكم يالي كذا
(قل خيرا او اصمت )
عجب العجاب
عجب العجاب
مووووقف اخر





التهجم على المشرفات :biggrin2:

مااقول غير الله يعين المشرفات ويااجرهم ويجعل مايقومون فيه في ميزان حسناتهم
كل يوم مواضيع تنزل اشكال واالوان فيها المفيد فيها الغريب فيها الاشاعات
فيها التحريض على الدين فيها المكرر وفيها وفيها وفيها .....

وشفنا كيف التطاول عليهم من البعض الله يهديهم
ياختي حطيها براسك يعني ليش المشرفه متقصدتك انتي يعني !
ولا حاطتك براسها !
اكيد موضوعك مخالف او مكرر او فيه مسبب
مع العلم اني عانيت من الحذف وغير ه << قلبت :biggrin2:
وتنطلق الدعاوي والتحسب والتلفظ على المشرفات

ساعدو المشرفات الله يجزاكم الجنه ولا تطلقون عنانكم للدعاوي
والتحسب :biggrin2:

اقولكم يالي كذا
(قل خيرا او اصمت )

موووقف اخيرررر نتيجه لما سبق :biggrin2:



الطررررد والكررش من المنتدى

بعد ماطاح الفاس بالراس تندمت على انها توقفت
وش ينفع الندم كان بامكانك توصلين صوتك ورايك باسلوب ارقى !
كان بامكانك تعبرين عن رايك باحترام !
كان بامكانك تكسبين حسانات من خلال مواضيعك ويعود عليك بالاجر !
كان بامكانك التواصل مع من احببتي !

اتقي الله واجعلي هذه الايه امام عينيك
(( مَا يَلْفِظُ مِنْ قَوْلٍ إِلَّا لَدَيْهِ رَقِيبٌ عَتِيدٌ))

قبل ان تخافين من التوقيف خافي من الله الذي يحاسبك على كل صغيره وكبيره وعليك ملائكه مامرون يحصون ويجمعون ماكتبتيه
وعليك شهود مستنطقون



قال الله تعالـى في مُـحكم التّـنـزيـل :
( يَوْمَ تَشْهَدُ عَلَيْهِمْ أَلْسِنَتُهُمْ وَأَيْدِيهِمْ وَأَرْجُلُهُمْ بِمَا كَانُوا يَعْمَلُونَ )

اقولكم يالي كذا
(قل خيرا او اصمت )


انتهى بحمدالله وتوفيقه ....

ملاااحظه كبر الجدار :biggrin2:
لا يعني اني سقت هذه النماذج ان العيب في منتدى عالم حواء
العيب فينا الاعضاء
نعيب منتدانا والعيب فينا ومال منتدانا عيبا سوانا :biggrin2:
المنتدى محافظ على كتاب الله وسنة نبيه
المنتدى لم يدفعنا للتسجيل فيه الا سمعته الطيبه
المنتدى قدم الكثير والكثير

لو جمعت جميع اعضاء عالم حواء وقلت لها عددي لي الفوائد التي اكتسبتيها من عالم حواء لما قدرت على تعدادها !
ملاحظه اخرى :biggrin2:
لا يعني اني قمت بمناقشة هذه النماذج
انها اصبحت هذه النوعيه ظاهره !
لا على العكس تمام ولله الحمد انها لم تصبح ظاهره بل اهل الخير والصلاح موجودون ونراهم يدافعون ويذبون عن اخواتهم وعن الاسلام قبل كل شي
ويخافون الله في الصغيره والكبيره والنصائح المفيده الطيبه .
ولو خليت خربت !

الموضوع من تعبي ومجهودي الشخصي وتصاميمي :biggrin2:

حاولت البعد عن الكلام المنمق والعبارات الرنانه
استخدمت الاسلوب الاقرب للوصل للفكره بصوره اسرع
تعبت كثير على الموضع اتمنى انه راق لذائقتكم
واتمنى من كل قلبي ان يصل الى قلوبكم
واتمنى ان نضع ايدينا بايدي البعض ونتكاتف للرقي باخلاقنا اولا
ثم الاخرين
اتمنى ان نتغير للافضل والاحسن
وليكن شعارنا جميعا
(لنقل خيرا او لنصمت )
اتمنى ان اكون وفقت بطرح الموضوع .....

فأن اصبت فمن الله وان اخطاءت فمن نفسي والشيطان
والله من وراء القصد ...