ان شاء الله زى ما اتعودتوا منى انى مش بنزل موضوع الا لما وهو موضوع على حق .
وفى الموضوع دا اولاً هنتعرف على شوية انواع من آلة الرسم على الأظافر وثانياً طريقة الأستخدام بالتكات بتاعتها وثالثاً هحط كام فيديو كده حلوين اوى للتصاميم .
هشرح باستفاضة علشان اللى معندوش فكرة عنها.
معتقدتش انكم هتصدقونى لو قلت لكم انى اشتريت آلة الرسم على الأظافر بسبب واحدة اجنبية ..أيوة واحدة اجنبية وبعد ما صرفت نظر عنها من كتر ما اللى جابوها بيقولوا عليها مش نافعة
بس بجد طلعت خطيرة والناس برة بتجيبها غالية ومعظم اللى جابها مش عارفين يستخدموها صح وانا كنت ممكن ابقى بردوا مش عارفة استخدمها واقول مش نافعة بس انا دورت وقطعت النت (زى قطعت الكتاب كده) لغاية ما عرفت كل تكات الآلة وقلت لازم انقلها هنا فى ملف كامل علشان تستفادوا زى ما فتوكات فادونى فى حاجات كتير ..طيب ندخل فى المفيد
أولاً :فكرة عامة عن الآلات الرسم الصغيرة:-
اللى عندنا فى المول مش محتاجين اكتر منه بس برا بقى انتوا عارفين هما مدلعين قد ايه وبيحبوا الأطقم بس طبعا الأسعار بالتالى نار!
دا اللى عندنا فى المول
اللى برا المول
ودى فيها 2مونيكير خاص بالآلة فقط
ودى فيها شكلين مختلفين (الدواريتين دول) و3 مونيكير خاصة بالآلة زى اللى فوقيها
ودى شكل مختلف فيها حجمين من اللى بتطبع الرسمة و4 اشكال من الرسمة وعلبة مناديل لأزالة المناكير وقلم اسيتون لأزالة الأخطاء والزوائد يمكن اعادة تعبئته وسى دى
ودى الالة الكبيرة طبعا
ودى اكتر آلة فيهم عجبانى الباكتج بتاعتها
ودا الكتالوج شامل كل خطوات الأستخدام وانواع المونكيرات اللى بتستخدم مع الالة وأفكار تصاميم وحتى كريمات المرطبة!
ودى تفاصيل العلبة من جوة وفيها مبردين فوق بعض مش باين واحد فيهم
بس المشكلة فى العلبة دى ان القاشطة بتاعتها من حديد وبعد عدة استعمالات للرسمة المدورة دى بتبقى مخدوشة فعلشان كدة القاشطة بتاعتنا البلاستك افضل وبتحافظ على الرسمات
نيجى بقى لتكات بسيطة فى الأول عن الآلة والمونيكرات:
* مش هقولك الرسمة هتطلع معاكى من اول مرة تعمليها لأ...هتحتاجى 10 مرات تدربى ايديك على الاستخدام ..اكيد دى حاجة جديدة علينا وعايزة تدريب
*فى اول استخدام للآلة بيبقى فيه طبقة رقيقة اوى من البلاستك الشفاف على الدوارية الحديد لازم تشيليها والا الرسمات مش هتظهر
*المونيكير اللى بيستخدم مع الآلة دى المفروض ميبقاش اللى بنستخدمه للأظافر وزى ما شوفنا معظم الآلات بيجى معاها مونيكير معين اسمه "كوناد" على اسم شركة الآلة الأصلية وطبعا انا بقول المفروض بس بستخدم العادى بس بمواصفات معينة بردوا ازى؟ بصوا المونيكير لازم يكون مش سايل اوى يعنى يكون بيمط زى دا
ودا مينفعش يتحط على الاظافر مباشرة لأنه مش بينشف الا بعد وقت كتير بس ميزته طبعا فى الآلة انه بيجيب الرسمة بتفاصيلها وبدقة
وعلى فكرة النوع دا موجود عندنا فى مصر برخص التراب علشان محدش بيشتريه لأنه مش بينشف (وعلشان ينشف لازم يتحط له اسيتون علشان يخف وينشف اسرع يعنى موال)مش هقول ماركة كوناد ولا حاجة ، روحى اى محل بيبيع مونيكرات رخيصة وجربيه زى ما البنت فى الصورة بتورينا انه مطاط كده طبعا مش هيكون مطاط اوى كدة بس يكون فيه شوية مط ، ولو هتستخدمى واحد خفيف مفيش مشكلة بس مترجيهوش قبل الاستخدام على الاسطمبة.
*الطابعة المطاطة دى بعد كذا استخدام بتنعم ومش بتلقط الرسمة من الاستطمبة ...الحل اننا نبردها بمبرد الأظافر علشان تنضف وتلقط الرسومات .
* الطابعة المطاطة دى متقربيش منها الاسيتون علشان تحافظى عليها اطول فترة ممكنة لما تفركيها بأيديك او فى ورق بيطلع المونيكير اللى عليها.
* يفضل انه يكون عندك مونيكير الأطبقة الاساسية او (base coat ) أو (nail hardner) لأن دى بيحمى الأظافر ويسهل عمليه الطبع على الأظافر.
* المونيكير الشفاف اللى اسمه (top coat) دا بيتحط طبقة نهائية علشان الرسمة تفضل لأطول فترة ممكنة ، وكمان لو هتحطى احجار الصغيرة اللى بتلمع يبقى لازم تستعمليه طبقة نهائية والا الاحجار هتقع مع اول غسل للأيدين مثلا .
يتبع..........
لازم تحطى قدامك كل حاجة هتستخدميها علشان المونيكير ما ينشفش لما تروحى تجيبى حاجة بعيد
هتحتاجى:
الآلة (الطابعة -الأستطمبة -القاشطة)
قطن- وممكن قطن الودان لو عايزة
اسيتون
المونيكير - المونيكير الشفاف - المونيكير الطبقة الاساسية(يمكن الاستغناء عنه)
ورق (جرايد او منديل مطبخ ) يتفرش تحت الحاجات
1- اغسلى ايديك ونشفيها كويس .والاظافر ميكونش عليها مونيكير قديم ولو فيه شيليه بالاسيتون.
2- لازم تتاكدى انك شيلى البلاسيتك الرقيق من الاسطمبة وبعدين تحطى المونيكير base coatعلى اظافرك
(او لو عايزة تحطى الرسمة على الاظافر على طول ) ، او ممكن تستخدمى مونيكير عادى على طول على الاظافر (هتناول الموضوع دا بالتفصيل فى التصاميم)
3- تحطى المونيكير بتاع الاسطمبة (او براحتك الخفيف) على الاسطمبة وتقشطى الزوائد بزاوية 90 درجة كده
او بزاوية 45 درجة
هنا بقى القشط بيظبط معايا بال90 درجة بس ممكن يظبط مع ناس تانية ب45 درجة
4- هاتى الطابعة وحطيها على الاسطمبة بقوة متوسطة خلى بالك مش جامد ومتطوليش المدة علشان متوبظش الرسمة ، وبعدين اطبعيها على اظافرك بطريقة دائرية كده وبراحة علشان ايديك متتزحلقش
هنا البنت حطت رسمتين فوق بعض الورد وبعدين الاوراق
5- وفى الاخر حطى الطبقة الشفافة النهائية.. وممكن متحطيش براحتك بس هتتقشر اسرع
الفيديو دا بيوضح الخطوات بسهولة ولو ركزتى مع ايد البنت هتعرفى تعمليها بسهولة ، وكمان فيه افكار حلوة
ثالثاً :التصاميم :-
هبتدى بأشكال الأسطمبات وارقامهم وكل اسطمبة هتلاقى السبع صور فى سطر واحد وتانى حاجة الفيدوهات الدعائية بتاعت شركة كوناد اليابانية ... وبما اننا مبنعرفش يابانى هنتفرج بس على اللى هيا بتعمله )
وبالمناسبة ارقام الاسطمبات أصلية ومش ضرورى يكون التقليد نفس الارقام وممكن متدوروش على الأسطمبات بالارقام لكن بالأشكال ، كل الفيديوهات بيتكلموا عن الأصلى انما اللى بيوصل لينا وسعره مناسب لينا بيكون تقليد ولو عرفت رقم اسطمبة موجودة فى المول هكتبها جنب الرقم الأصلى
اشكال الأسطمبات
تصميم الفرنش
هنا البنت بتعمل فرنش مانيكير بأسطمبة رقم M19 ، وفرنش النقط اسطمبة رقم M45 ، والنجوم اسطمبة رقم M3