بتسافرين؟؟ اذن ادخلي موضوع يهمك

من زمان وانا ودي اكتب بعض النصائح للمسافرين سواء للداخل او الخارج وهي نصايح عامه شي تعلمته وشي سمعته وقلت انقل لكم يمكن تنفعك وتدعون لي بسفره حلوه

اول شي قبل السفر بفتره

بعد ماتقررين المكان اللي بتسافرين له ابدي اجمعي معلومات عن هالمكان من اماكن سياحيه وتسوق وفنادق وكل شي فيها وتحاولين تسوين لك جدول لرحلتك

بحيث تقسمين الايام على المناطق اللي بتروحين لها وكل منطقه وش الاماكن اللي بتزورينها بحيث تقسمين الاماكن على الايام واذا بتروحين لاكثر من مكان بنفس اليوم علشان تستغلين الايام حاولي انك تجمعي كل الاماكن القريبه من بعض بيوم واحد علشان لايضيع الوقت بالمشاوير

وبعد كذا ابدي دوري على مكان الاقامه واحجزي من بلدك احسن لك من انك تروحين وانت بعد سفر وطريق وتدورين تدورين على سكن حتى لو حطيتي ببالك فندق معين احجزي فيه على الاقل لو اول يوم من الوصول (بعض الناس مايحب يحجز قبل ) علشان ترتاحون وبعدين تدورون لكم على مكان

ولاننسى المواصلات للي بيسافرون بالطائره اذا بتروحين لاماكن تستعملين فيها التاكسي حاولي تدورين لك رقم اضمن لك واللي بالسياره لاينسون الخرايط

واقري تجارب الناس في السفر لنفس مكانك احيانا يكون فيه تنبيهات صغيره لكن مفيده وتنفعك

الحين جمعتي كل المعلومات نتقل للتجهيز

اكتبي كل الاغراض والملابس اللي بتحتاجينها وشوفي الناقص واشريه ولاننسى حاله الجو لمكان الرحله وحتى لو كان مثلا يسوده جو معين لايمنع من اخذ بعض الملابس الاخرى يعني بتروحين مكان صيف خوذي لك لو جاكيت لانه يمكن تزورين مكان بارد مثل الجبال والعكس كذلك

بعد ماجهزتي اغراضك كامله نتقل للفلوس وهي اهم شي بالسفر

لاتعتمدين على نوع معين يعني لاتخلين كله كاش او بطاقه لا نوعي جزء من المبلغ خليه كاش وجزء خليه شيكات سياحيه ولاننسى البطاقه

تتساءلون ليش لانه لو لاسمح الله الشخص تعرض لسرقه يكون عنده بدل ولا ينزنق ويتورط والبطاقه ماتنفع لحالها لانه لو مثلا توقفت بسبب خلل ولا غيره برضو الواحد يتورط

طيب حددي الميزانيه وزيدي عليها مبلغ لانه ماتدرين عن الظروف اللي بتواجهك مثل لاسمح الله مرض او غيره يكون الواحد معه ولا يضطر انه يشحذ فلان وعلان

طيب توزيع الفلوس لاتكون كلها بمكان واحد يعني لاتكون كلها مع زوجك لا بعضها معك وبعضها مع زوجك وحتى الاولاد الكبار ممكن تعطونهم مبلغ بتعرفون ليش برضو علشان السرقه ولا الضياع

لاننسى نصرف شوي فلوس من نفس عمله البلد علشان تحتاجونها بالمطار والافضل ان الفلوس تكون كلها اما بالدولار او اليورو لانه بعض المصراف ترفض غيرها

خلصنا الفلوس نتقل للادويه لازم تاخذين معك الادويه اللي تاخذينها وزياده لانه ممكن ماتكون متوفره بالبلد اللي انت رايحه له

الحين نجي لترتيب الشنط لاتخلين لك شنطه وزوجك شنطه عيالك شنطه لا وزعي الملابس على الشنط بحيث كل شنطه يكون فيها ملابس لكم كلكم علشان لو ضاعت شنطه مايجلس واحد منكم من دون ملابس

ولاننسى عند اختيار الشنط انها تكون سهله النقل وذات جوده عاليه ماتخرب من النقل وتكون خفيفه علشان التنقل يكون سهل وحطي لك شنطه زايده من الشنط اللي ممكن تتطبق علشان التسوق والهدايا وماتضطرين تشترين شنطه وبيتك مليان شنط

جهزتي الشنط ورتبيتيها وخلاص بتسافرون لاتنسون جوازاتكم والفيز وغيره من الاوراق المهمه <<< اللي بيطلعون برى

الاشياء الثمينه تكون معك بشنطه اليد وحاولي ماتاخذين شي غالي مثلا ساعه ولا ذهب مو لازم تشخصين علشان لاتنخطفين بسببها

البوصله لاتنسونها علشان القبله واوقات الصلاة <<< الحين متوفر ببعض اجهزه الجوال

والكاميرا لاتنسونها

وصلتوا للبلد <<< الحمد لله على السلامه

رحتوا للفندق او مكان الاقامه خوذي منهم كروت الفندق علشان اذا ضعتوا ولا شي يكون معكم اسم الفندق وعنوانه

وحطي مع كل فرد نسخه وعلميهم انه لو لاسمح الله ضاعوا ولا شي يكون معهم اسم الفندق ولاننسى نعطي الاطفال مبلغ بسيط لو احتاجوا لشي

نجي للاشياء الثمينه على طول حطيها اما بالصندوق او عند الامانات بالفندق ونجي للرقم السري لازم شخصين يعرفون برضو احتياط للظروف

انتبهوا للانظمه والقوانين في الدول علشان لاتتعرضون لغرامه ولا سجن او غيره

وقبل لاتروحون مكان اسالوا عن اوقات العمل وافضل وقت علشان لاتروحون متاخرين ولا قبل الموعد

وانتبهوا للاكل انه يكون حلال ومذبوح على الطريقه الاسلاميه خصوصا بالدول غير المسلمه

وبالنسبه للفنادق لاتنسين تحطين ورقه عدم الازعاج <<< متعقد من موقف صار لي

هذي اهم النصائح بانتظار ردودكم واضافاتكم واذا تذكرت شي ابرجع اكتبه واي اسئلة انا حاضره