مساكم الله بكل خير غالياتي ..
البارحة الله لا يعودها علي من ليلة (تنذكر وما تنعاد إن شاء الله) :eek:
بحكم إني حامل وبشهري الأخير مستكنة ببيتي وصار لي أسبوع كامل لا أروح و لا أجي حتى بيت أهلي ما رحت له خبركم الظروف الصحية اللي صاير ما تشجع الواحد يسوي زيارات وصرت يوميا أطلع مع زوجي بعد صلاة الفجر أمشي وارجع..
والبارحة حسيت بوجع قوي بجسمي توقعته عادي شوي ويروح لكن تفاجئت بن حراراتي كل مالها وترتفع
:06: جتني روعة وصرت كل شوي اتحمم بموية باردة علشان تنزل الحرارةوكانت تنزل نص ساعة بس
وترجع ترتفع ياربي لطفك .. واتصل على زوجي بدوامه واقوله ويجي مسكين طيران لأنه متأزم من سالفة
الانفلونزا صلى العشاء ورحنا (لمستشفى الملك خالد الجامعي ) لأني أتابع حملي عندهم وطبعاً ما كان فيه عيادات
بذاك الوقت الا (الطوارئ) واول ما قربنا من الطوارئ الله وكيلكم على الزحمة والناس والعالم كبار وصغار وكلن لابس كمامة نزلت ورجليني تتصافق من التعب ومن الخوف قلت لزوجي ادخل شيك على الوضع وتعال علمني وجلست برا الطوارئ قلت على الاقل اتنفس شوية هوى المهم طول زوجي وانتظرته وكنت جالسة ادعي
ان ربي يستر عليه لان الوضع كان من جد مهزلة جامعين كل الخلق باستراحة صغيرة رجال وحريم واطفال وماشين بالسرا غرفة للكبار وغرفة للاطفال رجع زوجي ومعاه رقم (61) وكان الدور واقف على رقم (19) قال يعني يبيلنا حدود ساعة الين يجي دورنا وقعدت اسئلة عن الوضع جوا قال (اللي ما فيه شي اكيد بيمرض) انا عاد لفت بي الدنيا المهم انتظرنا ساعة كاملة ولما راح زوجي يشوف الدور وصل لأي رقم لقاهم لسى موقفين عند رقم (35) قال خلينا نروح نتعشى ونرجع لهم وفعلاً رحنا تعشينا ورجعنا بعد ساعة بالضبط كانوا عند رقم (51) قلنا هانت قدامنا 10 ارقام وجلسنا ننتظر برا وبعد نص ساعة دخلنا لقيت قدامي رقمين وظليت واقفة والسيب مليان وحسيت اني ابختنق ما قدرت اتنفس وزوجي يقول تحملي والحمد لله نادت رقمي واطمروادخل الا الاقي ممرضتين هنديات يقيسون الضغط والحرارة والنبض ويسالون عن الاعراض ويعبون ورقة وبعدين يرسلونها لمكان ثاني نمسك فيه سرا علشان يشوفنا الدكتور :angry2: هنا خلاص انا انهرت يوم دريت اني بقعد 3 ساعات ثانية بالمستشفى قال زوجي خلينا نروح نشوف يمكن يمشون الناس اسرع ورحنا للعيادة اللى حددوها لقيناهم حاطينها بمكان فيه اصلاحات وعمال :eek: وغير كذا الناس قاعدين على الأرض من الزحمة ولافيه تهوية زي الناس ومافيه غير دكتور واحد يكشف على الحريم والرجال !!!!
راح زوجي يسال كيف النظام قالوا انهم ينادون بالاسماء حسب الأولوية وانا واقفة مستحية امر لأن السيب كله رجال الا اسمع حرمة قاعدة تهاوش على الاستقبال تقول مو معقولة من قبل المغرب وانا هنا وماناديتوا قالها اللي بالاستقبال بكل وقاعة اذا ما تبين تستنين طسي :angry2: أنا قلت خلاص ابطلع ماراح انتظر وش هالمهزلة هذا اللي ناقص زحمة وكتمه وسوء تعامل بعد ولما جاء زوجي قلتله ولا دقيقة ابقعد ..
حاول يهديني بس قلتله انت شايف الوضع ما يحتمل ابد وفعلا طلعنا وكانت الساعة حوالي 11 وقال عسانا نلحق على واحد من المستشفيات الأهلية ورحنا للحبيب قالوا لي لانك حامل لازم تشوفك أو يشوفك اخصائي نساء وولادة
وطبعا بهذاك الوقت 11:30 مافيه أحد قالوا تعالي بكرة الصباح لأنك ماتتابعين عندنا فما نقدر نستدعي لك أحد الحين قلت عادي لو يكشف على طبيب عام لأني مامعي الا حرارة بس رفضوا :angry2: طلعنا والساعة قربت على 12 قال زوجي خلينا نروح لمستشفى للمملكة يمكن يكون افضل وفعلا رحنا ونفس الكلام قالوا لازم يشوفك دكتور نساء وولادة قلت ياعالم انا مافيني غير حرارة وحسيت ان حراراتي كل مالها تزود من المرمطة الا بالصدفة لقيت موظفة من العلاقات العامة اعرفها سلمت عليها وحكيت لها سالفتي قالت ابحاول اكلم احد من دكاترتنا وماقصرت رجعت لي بس ربع ساعة وقالت لازم تاخذيت المضاد الحيوي حق الانفلونزا «تاميفلو»
قلت وشلون أخذه وانا ما عندي اي عرض من اعرض الانفلونزا اصلاً ؟؟؟
قالت تراه مجرد مضاد حيوي قلت معصي بعد معصي أنا رافضة أصلاً اخذه لو كانت عندي انفلزنزا فما بالك وانا ماعندي شي للحين غير الحرارة !!!!
طلعت و أنا ضايقة مره وش هالعالم 0خذوه فغلوه ) استغفر الله و أتوب اليه ..
قال زوجي مالنا الا أخوك يسعفنا لأنه يشتغل (بمستشفى الملك فيصل التخصصي) واتصلنا فيه وكان نايم وقتها وتعذرنا منه وحكيت له السالفة قال : عطيني بس ربع ساعة وابرد لك ..
وفعلاً كلها عشر دقايق ورجع اتصل فينا قال روحي الحين طيران على المستشفى وبتلاقين ممرضة هناك تنتظرك بالطوارئ بتأخذك وببتوديك عن دكتورة تكشف عليك وفعلا وصلت الا هي تنتظرني وطارت بي عند دكتورة اسمها خلود وفحصتني وسألتني كم سؤال جاوبتها قالت لاطالما ماعندك اي شي ثاني غير الحرارة فمعناها ان ماعندك انفلونزا ولله الحمد بس لما قاست الحرارة كانت موصلة 40 قالت اكيد فيه شي رافعها ولما فحصت أذني لقت عندي التهاب فيها وهذا اللي كان مسبب لي الحرارة :p الحمد لله انها جت على الأذن
وهنا حسيت بحملي كبير انزاح عني بفضل من الله وقالت لي أهم شي انتبهي لاترتفع حرارتك لأن ارتفاع الحرارة بالجسم يقلل المناعة وخصوصا عند الأطفال والحوامل وكبار السن وكتبت لي على مخفض للحرارة وكبسولات مضاد حيوي كل 8 ساعات وقالت اشربي عصير برتقال بالليمون قدر ما تقدرين .. وقالت خلي زوجك يتبع هالنظام واذا استمريتوا على هالنظام يومين تقدرون تختطلون عادي بالناس لنه يقوى مناعتكم واستمروا عليه العلاج أسبوع كامل وعصير البرتقال بالليمون بدون توقف ..
معليش عارفة أني كثرت عليك بالحكي لكن اللي كنت حابه أوصله لكم :
1- انعدام التنظيم الصحي وخاصة بموضوع (الأمراض المعدية ) داخل مستشفياتنا وخاصة الحكومية منها.
2- انعدام مسؤلية الأطباء تجاه المرضي (التوصية بأخذ علاج ما بدون كشف).
3- قلة الثقافة الصحية لدى الكثير منا .
4- جهلنا بطرق الوقاية الصحيحة من الأمراض المعدية .
الله يكفينا واياكم شر الجهل و المرض ..
والله يتمم علينا حملنا بخير وصحة وسلامة ..
:26:
سارة الدوسري @sar_aldosry
عضوة فعالة
يلزم عليك تسجيل الدخول أولًا لكتابة تعليق.
هذي مستشفياتنا وهذا سنعهم
إذا عندك واسطه روحي وانتي مغمضه
ماعندك مالك إلا ربك ثمن اقريشاتس
ومستشفى خالد معررررررررررررررروف الطوارئ عندهم كنت ادخله الساعه 11بالليل وما اطلع منه الا مع اذان الفجر << عقب قاطعناه نهائيا (يخلي اللي مو مريض مريض غصب من طول الإنتظار الممل واللي على غير سنع)
واذا دخلتي على الدكتور والممرضه تلاقينهم يسولفون ويضحكون ويمشون المرضى على أقل من مهلهم <<موسعين الصدر لأخر درجه)
ما نقول غير ربي يكون بعوون المواطن السعودي الطفران
وربي يشفيك ويهون عليك
إذا عندك واسطه روحي وانتي مغمضه
ماعندك مالك إلا ربك ثمن اقريشاتس
ومستشفى خالد معررررررررررررررروف الطوارئ عندهم كنت ادخله الساعه 11بالليل وما اطلع منه الا مع اذان الفجر << عقب قاطعناه نهائيا (يخلي اللي مو مريض مريض غصب من طول الإنتظار الممل واللي على غير سنع)
واذا دخلتي على الدكتور والممرضه تلاقينهم يسولفون ويضحكون ويمشون المرضى على أقل من مهلهم <<موسعين الصدر لأخر درجه)
ما نقول غير ربي يكون بعوون المواطن السعودي الطفران
وربي يشفيك ويهون عليك
الصفحة الأخيرة
من جد الوضع مأساوي الله لايبلانا
مافي ادنى اهتمام والي قهرني وصفو لك الدواء حتى قبل لايشوفونك
استغفر الله العظيم :(