نفسى حد يطمنى ارجوكم ساعدونى

السلام عيكم ورحمة الله وبركاته

بنات انا عاوزه اخد رأيكم ف حاجه ياريت اللى عندها تجربه زى تجربتى تفيدنى وجزاكم الله خيرا

انا متزوجه من عامين وزوجى شغله فى دوله تانيه غير اللى انا عايشه فيها واول سنه فى الزواج فضل معايا 3

شهور وما اراد الله بالحمل وسافر وفى السنه التانيه نزل واراد الله بالحمل الحمد لله وكنت حامل بتوأم

وعديت اول شهرين بالحمل وجالى نزيف الحمد لله لحقت نفسى ورحت المستشفى وعملولى اللازم ووقف

النزيف والدكتوره كتبتلى على ابر مثبته واخدتها والحمد لله عديت الشهر الثالث والرابع والخامس بسلام

ولكن فى اخر ثلاثة ايام بالشهر الخامس نزلت منى ميه بيضاء جريت على الدكتوره قالتلى ثقب فى كيس

الماء حول واحد من الاجنه وكان كل واحد منهم فى كيس منصل عن الثانى واخدت الادويه اللازمه لحالتى

لمدة 13 يوم والله انى فى الايام دى حصلى اللى ماشوفته ابدا فى حياتى وتعبت تعب شديد جدا واخدت ادويه

توقع جبل وربنا يجعله فى ميزان حسناتى يارب المهم بعد 13 يوم من المعاناه جانى الم طلق الولاده وكنت

فى الشهر السادس وعملت المستحيل علشان الطلق يقف ولكن ارادة الله اقوى وتوفى الجنين فى رحمى

ونزل فى الحوض وروحت المستشفى وولدت الاتنين واحد ميت والثانى عاش لمدة يوم وتوفاه الله

والحمد لله رضيت بقضاء الله وحمدته وشكرت فضله واكيد ربنا اراد لى ولزوجى الخير وبعد قضاء

الاربعين روحت لدكتور مشهور جدا واول ما قلتله على اللى حصلى طلب منى اشعة الصبغه

علشان يطمن على وضع الرحم ويعرف ايه سبب اللى حصلى وحسيت من كلامه معايا ان الوضع غير

مطمئن ورحت تانى يوم وعملت الاشعه واذا بدكتور الاشعه يصدمنى ويقولى ان انا عندى نصف رحم بس

واول رد فعل ليا انى حمدت الله ولكن الصدمه خلتنى مش عارفه انطق واخدت النتيجه ورحت للدكتور بيها

واكد لى نفس الكلام وقالى ان شاء الله خير وهتحملى تانى بس هيبقى فىه عملية ربط بعد الشهر الثالث

والولاده اذا اراد الله هتبقى فى نهاية الشهر الثامن انا دلوقت عاوزه اعرف منكم فى حد عنده رحم

زى رحمى وربنا اراد لها الحمل ولا لا وهل انا كل ما هحمل هيحصلى برده ولاده مبكره وهل الحمل

بيجى مع حالتى دى بسرعه ولا بياخد وقت وهل عملية الربط دى بتساعد ان مفيش ولاده مبكره تحصل

تانى وبعد عملية الربط بتحرك طبيعى فى حدود شقتى ولا ممنوع الحركه خالص واسفه جدا انى طولت

عليكم بس واللهى انا حالتى نفسيتى فى الارض نفسى ارتاح بجد وجزاكم الله خيرا