قصة ولادتي الحمدلله ..

قصة ولادتي بمستشفى قوى الامن


السلام عليكم .. اخباركم ياعسولات
انا الحمدلله لي تقريبا عشرين يوم من ماولدت بكررريه جبت بنوته الله يحفظها

ماعرف اقول مقدمات لكن ببدأ مباشرة

يوم 15/1 كان عندي موعد اشعه بالمستشفى رحت كالعاده اسوي الاشعه واطلع ما يأخذ مني نص ساعه بالكثير


الي كانت تعمل السونار طبيبه سعودية اخلاقها في راس خشمها حسبي الله عليها سوت السونار وجلست يمكن ساعه تفغص بطني وتقلبني يمين وشمال

انا حسيت الوضع مو طبيعي سألتها طنشتني

اتصلت الدكتوره ع الاستشاري وقعد تهرج انجليزي الي فهمته انه لازم ينوموني حالتي مستعجله

بعد ماخلصت مكالمتها رجعت اساألها قالت بعدين تعرفين انتظري برا



جلست يمكن نص ساعه انتظر برا وانا اسمع ضحكها وسوالفها مع الممرضات

كنت ع اعصابي ودموعي متجمعه بعيوني من الخوف والقهر من تعامل هالدكتوره


انتظرت فتره
بعدين نادتني واعطتني ورقه قالت روحي قسم التنويم

سألتها ليش ينوموني قالت بعدين تعرفين حسبي الله عليها دنيا واخره ماقالت لي ششئ وانا جاء ببالي خلاص بنتي ماتت ببطنني لان الوضع خطير ع قولتها


المهم رحت عند زوجي بالانتظار وانا دموعي اربع اربع مو قادره حتى اشوف قدامي

اعطيته الورقه وراح قسم التنويم ورفضوا يقبلوني الا بعد قلة حيا

المهم دخلت الغرفه واعطتني الممرضه ملابس التنويم وقالت لي اشوي وتجي الدكتوره

طبعا هذا الكلام كله الساعه 11 الظهر وانا جيت المستشفى الساعه 8 الصباح


جت عندي دكتوره مصريه صغيره مره يعني يمكن عمرها ع بداية العشرينات


سالتها ليش منوميني وش السالفه ماحد قالي شئ !؟؟؟؟؟؟

قالت ان نبض الجنين ضعيف والدم مايوصله


سكت لان خلاص ماعد باليد حيله كشفت ع الرحم كان مفتوح واحد سم اعطتني تحميله طلق صناعي


ماحسيت بشئ لين الساعه 6 المغرب كشفت كان مفتوح 2 سم واعطتني تحميله ثانيه


وهنا بدأ العذاب شفت الموت بعيني كان سكاكين تطعن ببطني وظهري

سوت لي الممرضه تخطيط يمكن ثلاث مرات وفي كل مره تقول الطلق ضعيف تعبببببببببببت تمنيت الموت ولاشفته


بعد ماخلص التخطيط قمت امشي في الممرات وكنت كل ساعتين تقريبا اخذ دش لجسمي بمويه دافيه وكان يخفف الألم وكنت اسوي تمرين القرفصاء وتمارين يوغا عشان اهدأ ..


صبرت لين الساعه 2 الفجر وخلاص انا انتهيييييييت

طبعآ كنت اتألم بس بدون صوت او صراخ بس آهات خفيفه تطلع غصب عني


لكن ماعد قدرت اتحمل دقيت ع زر استدعاء النيرس جاني ممرضتين فلبنيتين قلت لهم الم فضيع ماقدر اتحمل شوفوا لي حل حتى لو اولد قيصيري


تخيلوا يابنات ورب البيت وانا بالحاله هذي هم يضحكون ويقولون انتي بكريه باقي بدري مو الحين


قلت لها اكشفي شوفي كم قالت لا امشي وبعد ساعه ساعتين نشوف كم


قمت مشيت خمس دقائق وحسيت في شئ يدفع تحت كأني باتبرز الله يكرمكم ومن الخوف قفلت ع رجولي حسيت بنتي بتطيح واحس بدفع قوي تحت خلاص وصلت حدي


رجعت غرفتي حقت التنويم وجلست ابكي واقولها احس النونو بيخرج


وأخيرا كشفت علي وقالت مفتوح 8 سم ولاده وجلست تصارخ بالممرضات البيبي بيخرج انقلوها ع غرفة الولادة

جابوا كرسي متحرك ودخلوني غرفة الولاده بسرعه وكل وحده من جهه تفسخ ملابسي وتسحب دم ومغذي وابر لان خلاص بيخرج الرأس

دقيت ع زوجي وقلت له خلاص ولاده

طبعآ ولا احد يعرف اني باولد ولاقلت لامي ولا اخواتي لاني وحيده بالرياض وهم بعيدين عني ماحبيت اشغلهم معي خصوصا امي تعبانه مابتتحمل حسيت نفسي وحيده تمنيت احد معي كأني بغربه



المهم اعطوني الاكسجين الاسود

والحمد لله قد تعلمت طريقة التنفس الصحيح اثناء الدفع


وجلست ادفع لين خرجت بنتي كان وزنها صغير بس رغم كذا وسعوني وخيطوا ..



وخلصت ولادتي الحمدلله لكن نجي للاصعب

تخيلوا يابنات بعد ماطلعوا المشيمه ونظفوني خلوني ارتاح اشوي لوقت الخياطه

جت الدكتوره المصريه الي اعطتني الطلق الصناعي اول مره

المهم بدأت تخيطني بدون بنج حسبي الله عليها

لاني هاديه وماكنت اصرخ في ولادتي ع بالهم ماحس

جلست اترجاها واقولها ابغى بنج حطت لي البنج وكملت خياطه بس بعد ماطلعت روحي بأول غرزه


وخلصت خياطه تركوني ارتاح حتى جاء زوجي وجلس معي اشوي

بعدين طلعوه

وقامت الممرضه توصلني الحمام طبعآ ماتسبحت لان الجو باااااارد مرررره بس غسلت الجزء السفلي ..

ورجعوني غرفة التنويم

بنتي شفتها ع السريع بعد الولادة لانهم حطوها في العنايه وزنها كان كيلو و800غرام جلست بنتي عندهم ثلاث ايام وشافوا وضعها طبيعي وطلعوها طبعاً كنت بس اجي عندها ارضعها من صدري واروح حتى طلعوها


وهذي هي قصة ولادتي في مستشفى قوى الامن الحمد لله ع كل حال

انا مابغى اخوف الي يراجعون وبيولدون في هالمستشفى واحب اقولهم المستشفى حلو مررره لكن انا حضي دايم شين
والي صار معي مو شرط يصير معك انا حاله خاصه بسبب وضعي ووضع الجنين

ورغم الي صار لي اشوف انه مستشفى حلو مقارنة بباقي المستشفيات الحكومية



ومثل مافي قوى الامن سلبيات فيه ايجابيات وراح اختصرها لكم في نقاط


سلبيات

1تعامل بعض الممرضات سئ ((( لاحضوا انا قلت البعض مو الكل )))

2 مايشرحون لك وضعك بشكل واضح يعني يسووون كل شئ وانتي ماتدرين الا بعد مايقرروون


3 قسم التنويم فيه حضانات الاطفال قريبه مره يعني مافي نووووووووم


الايجابيات


1 النظافه عندهم جدآ جدآ ممتازه يغيرون لك مفارش السرير كل يوم

الحمام تجي العامله يمكن ثلاث مرات تنظفه باليوم ومو اي نظافه

قسم التنويم بشكل عام نظيف


2 الاكل عندهم نظيف وصحي ومتنوع وتقدرين تغيرين لو ماعجبك اﻻاكل

3غرفة الولادة لك وحدك بس ماعرف الكل كذا وولا لا

4 عندهم إبرة ظهر بس انا ماخذتها

5 يصرفون لك قيصريه والي ماتعرفها هي مثل المغطس تركب بالافرنجي وتتنقعين فيه و يصرفون لك سفوف ومسكنات وفتامينات ..

6 قبل تطلعين تجي عندك وحده تعلمك طريقة الرضاعه الطبيعيه وتشرح لك فوائدها

7 يصرفون لك من المستشفى رضاعات ولهاية وحفايظ وحليب وفتامينات للنونو





وسامحوني يابنات كلامي مو مرتب

والله ييسر لكل حامل حملها وولادتها

وتكفون ادعولي تفك خياطتي وارتاح منها ويرتفع وزن بنتي لان نفسيتي تعبتتتتتت كل من شافها جلس يقول صغيره

والله يوفق الجميع واي وحده عندها سؤال او استفسار عن مستشفى قوى الامن تسالني وان شاء الله ارد عليها

دمتتم بووووود


حسبي الله الذي لا إله إلا هو عليه توكلت وهو رب العرش العظيم

استغفرالله