قصة راائعة وعجييبة عن الصدقة

الصراحة قرئت هذه القصة عن الصدقة واعجبتني وحبيت اشارككم بها اتمنى تنال اعجابكم.
السلام عليكم ورحمة الله وبركاته
سبحان الله والله دى حكايتى والله على ماأقول شهيد
وكل هدفى من حكاية موضوعى
أولا \حسن الظن بالله
ثانياً أوعى أوعى لما حد قدامك يطلع صدقة تقوليلوا لاء بلاش ده مايستاهلش شوف حد يستحق
أوعى تاخدى الناس بالمظاهر
الله أعلم بعباده بجد ربنا كريم قوى مفيش أحن منه
بصوا بقى حكايتى واتعظى وأوعى لما تكونى مهمومة تعبانة تشتكى لحد اشتكى لربك واتوسلى اليه مفيش غيره حاسس بيكى
بصوا حبايبى انا اولا عضوه معاكوا هنا
ولولا الاحراج كنت كتبت على العام لان فى ناس حبايبى وقرايب ليه هنا
انا الحمد لله طول عمرى ظروفى المادية كويسة جدا ودايماً بطلع حق ربنا من فلوس أوأكل أولبس وربنا يتقبل منى ومنكم
كنت بعمل الحاجة دى وانا خالصة النية لله
انا متجوزة ومعايا بنت وانا وزوجى شبه مطلقين ومش باشوفه وهو حتى مابيشوفش البنت لكن عازل نفسه عننا لأسباب لا يعلمها الا الله
وانا زهقت بصراحة ودلوقتى خلاص مش بيفرق معايا غيابه
لانى بفضل الله عايشه كويس وحاسه برضى من ربنا ودايما ربنا بينورلى بصيرتى للطريق الصح
المهم
يابنات فى يوم ضاقت بيا الدنيا قوى ومكانش معايا فلوس خالص
يااااخبر طب والبنت وطلباتها انا بنتى عندها 9 سنين

وانا وهى قاعدين فى شقتنا لوحدنا انا ليه أخوات بنات وكل واحدة ليها حياتها وأولادها وزوجها
كان فى ناس اعرفهم ظروفهم صعبة شوية وانا كنت عمللهم مبلغ كده بديهلهم كل شهر
ولما اتزنقت قولت ياااااااا طب والناس دول لوكانوا عاملين حسابهم على المبلغ ده هايعملوا ايه قولت بقى يلا ربنا معاهم ومعايا
الفلوس خلاص بدأت تشطب بنتى كانت بتروح المدرسه مع سواق لغيته وكنت بوديها انا لانى ماعيش فلوس ومع انها كانت متعوده على كتر المصاريف وده اللى اتعلمته من محنتى دى لازم أعودها تعيش بالقليل كان متهيالى انى كده بعوضها حرمان باباها
وبدأت أشطب فى الاكل اللى فى الفيريزر

ومع كل ده كنت محافظة على صلاتى والحمد لله وكنت بقيم الليل وادعى لربنا
ياااااارب ماتحوجنى الا ليك يارب انت بس اللى حاسس بيه
وفى نفس الوقت بقول الحمد لله انت فضلتنى عن ناس كتير بالأبتلاء ده عشان تتطهرنى من الزنوب
والحمد لله ان الابتلاء فى العيشه مش فى بنتى ولا فى دينى الف حمد وشكر
مهما أقولكم مش هاتتخيلوا الضيقة اللى كنت عايشه فيها
انا أعتبر مكنتش باكل وأوفر الأكل لبنتى لما ترجع من المدرسة
تعرفوا كنت بعمل ايه لما كنت اجوع كنت بعمل ميه بسكر عشان مايجليش هبوط
ولما حد من اخواتى اوجيرانى يسألنى عامله ايه أقولهم الحمد لله تمام
البيت والله فضى مفيش فيه اى حاجة لا رز ولا سمنه ولا سكر ولا اى حاجة فى التلاجة مفيش غير ميه بس وساعتها والله قولت الحمد لله فى ناس مش بتلاقى الميه ومش بتلاقى بيت تنام فيه
الحمد لله على كل شىء
بس المهم كنت بقولها بصدق ومن قلبى والله

وكنت بقول ربنا كريم هو فى حد بيموت من الجوع ورحمة ربنا وسعت كل شىء أكيد هايفك كربى ده ربنا حبيبى وأحن من أمى وأبوياوأحن منى على بنتى اللى قلبى بيتقطع عليها لما اشوفها نفسها فى حاجة ومش قادرة اجيب لها ولا ياحبيبتى لما كانت تيجى من المدرسه وتقولى صحباتى راحوا أشتروا شيبسى وحاجات حلوة وانا كنت مستنياهم بره بس ياماما متزعليش انا اكلت السندوتش بتاعى كله ومرضيتش اخد حاجة من صحابى
المهم بقى أخر يوم فى القصة الطويله دى كان معايه 2 جنيه ومفيش غيرهم فى البيت وكنت بوصلها المدرسة وانا راجعة لقيت واحد بيسأل الله قولت يابت يعنى ال2 جنيه دول هايعملوا ايه قولت أجيب رغيفن فينوا وحته حلاوه من اللى هى بنص جنيه دى
وأسيبهم لبنتى لما تيجى
وأدى الراجل ده الجنيه التانى يمكن هو كمان جعان
والله ده اللى حصل
المهم مشيت على البيت وروحت صليت وقولت ياااااارب
انا عارفة ان فرجك قريب أدينى اشارة وطمن ياااارب
والله والله وانا لسه قاعدة على المصليه لقيت الجرس بيرن



وببص لقيت ؟؟؟؟؟؟؟؟؟؟؟؟؟؟؟

أكياس فيها من خيرات الله آه والله لقيت واحدة معايا فى نفس العمارة كنت اتعرفت عليها مرة كانت والدتها تعبانه قوى وهى كانت قاعدة عندها وكانت مرة تعبت والدتها واستنجدت بيه كانت لوحدها وروحنا وديناها المستشفى وكنت بطلع أزورها
وبعد كده الست دى أتوفت ومن وكل سنه كانوا بيعملوا لها صدقة وسبحان الله كانوا بيوزعوا فى الجامع الحاجات دى يعنى من بره بره
اللى أنا مستغرباه بقى وعايزاكوا تسمعوا الكلام اللى قالتهولى بالظبت
قالت لى بالحرف الواحد \بصى أنا عارفه انك ربنا يباركلك مش محتاجة انا السنه دى شوفت ماما فى الحلم وحكيت الحلم لواحدة مفسرة قالت لى مامتك عايزة صدقة كتير وعايزاكى تخصى بالصدقة كل جيرانها وياريت معلش تقبليها منى عشان أحس انك بتعتبرينى أختك بجد وفعلا وفيت الصدقه للجيران كلهم \
ياسبحان الله وشوفوا بقى الشنط دى فيها ايه والله بدون مبالغة
فراخ وسمن وسكر وزيت ومكرونه ورز وشاى وبقوليات وايه بكميات كتيره والله ونفس الانواع اللى كنت بجيبها
وبنتى لما جت أكلت احلى فراخ ومكرونةههههههه

والمفاجئة الكبرى بقى بصوا كمان حصل ايه بالليل
واحدة أتصلت من الشغل عندى وقالت لى بكرة هايتصلوا بيكى
لانى كنت قاعدة من العمل على اختلاف كان ليه المفروض مكافأة ومش عايزين يصرفوها بقالها حوالى 3 سنين ولما زهقت قولت لهم خلاص هاقدم استقالة وفقدت الامل

أتصلوا بيا تانى يوم وقالولى تعالى خلاص هانصرفهالك والحمد لله مرتبى رجع وبالذيادة
وصرفت المكافئة بقى معايا الان حوالى 10000 جنيه
ياسلام شوفوا حسن ظنى بالله عمل ايه
وكفايه هو بس اللى حاسس بيه فى بنت خالتى كانت عندى ولسه كانت شنط الحاجة فى الصاله وشافتهم قالت لى ماشاء الله كنتى بتتسوقى ولا ايه قولت لها لا والله وحكيت لها على جارتى
تعرفوا قالت ايه
لا لالا دول ناس بتوع فشخرة يعنى بيدوا الناس اللى مش محتاجة فى ناس اولى منك
ضحكت وقولت سبحان الله
ومن هنا قولت انبهكوا أوعى تزعلى على حاجة بتطلعيها وتقولى مايستحقهاش ربنا بس هو اللى يعرف وربنا هو اللى بيبعت الارزاق
ودايماً دايماً خلى عندك ايمان ان ربنا مش هاينساكى
ممكن تمرى بأبتلاء لتكفير ذنوب
ممكن ليصطفيكى الله وتقربي له ويخليكى تشعرى بالناس أكتر
وتكثرى من الصدقات
ماتستكتريش خير فى ايد حد ومتقوليش ده زياده عليه لاء دى كل حاجة عند الله بقدر وحساب
وكمان اى ابتلاء ربنا بينزلوا علينا عارف ان أحنا قدوا
اصله عمروا ماهيديكى حاجة اكتر من طاقتك
\ولا يكلف الله نفساً الا وسعها \

وأخيرا وليس بيننا اخر
اتمنى اكون بشاره لكل اخت شايله هموم على راسها
سيبيها على الله هو المدبر لكل امر عسير
خلى توكالك على الله


وياريت تقيموا الموضوع عشان يتثبت ويكون بشاره للاخوات ويكون الفرج فى قربك لله
أستودعكم الله الذى لا تضيع ودائعه

منقووول من منتدى اخر