http://forum.hawaaworld.com/showthread.php?t=3285186
كان ودي اكمل الجزء الثاني بعد الاول ..
بس مع ردود البنات مابيصير الموضوع مرتب
وهالحين .. نشوف مغامراتنا مع هالحافز
هذي مغامرتي اليوم الصبح .. والله شكلهم بيجيبون خبري
الجزء الثاني من مرمطة حافز >>> وشوله يسمونه حافز !! الا تحطيم موب حافز
قمت الفجر صليت فرضي .. وقلت ابريح شوي على مالدنيا تشرق .. الاالوالد يصحيني يلا ياغيدا قومي تسنعي ورانا مشوار نبي نروح بدري منشان نفتك منهم
قلت : وشوله اصحى الحين .. انا بأعاير الجوال على سبع ابريح هالحين والله نعسانة مافيني اروح بهالتعب
وشوي الا اشوف الساعه سبع و37 دقيقه قمت مرتاعة اصلح لي المتيسر من الفطور بسرررعة والنار شغاله ع الاخيييير وانا رايحه جايه .. مره البس .. مرة ادخل الجوال بالشنطة .. مامداني اصب الحليب بالكاس الا ابوي يصيح هيا يابنيتي وراك ماتعجلين بسرعه
قلت والله توي انزل الفطور اذا مستعجل خلاص موب لازم افطر نمشي هالحين
قال هيا افطري بسرعه نبي نلحق قدامنا زحام
.. اقرقع هالكآس الحليب بسرررعه ماني طايقة اشربه ..النسكافه خلصت وهو بدونها مابه طعم
واقوم افرش اسناني
همن البس .. واهم شي لاننسى السروال الطويل :22: تحسباً لأدنى حادث او انقلاب لاقدر الله .. من ورى سواقه الوالد
وبلمح البصر آخذ كتاب منشان اتسلى بالطريق او بالانتظار وانا والله مااقدر اناظر بالكتاب أخاف الوالد مايشوف سيارة ولاشي ع الاقل احاول اكون معه انبهه
وأخطف معي بالكيس قارورتين ماء بردتها بالفريزر اول ماصحيت .. عارفه اللي قدامي حر وشمس وعطش
وعاد لزوم الاوراق الرسميه تكون معي
وشوي الا جوالي يرن ..تررررن تررررررن الوالد يلا انزلي ترانا تأخرنا يمكن ماتلحقين مثل امس !
وانزل مامداني البس الدسوس .. بس ماسكتها بيدي
دخلت السياره الا والوالد مطررررطع مني باين عليه .. مشغل الرادو يبي يتسلى على ماتجي محسوبتكم
والله لو يدري ..انكب علي الحليب والحوسه بسبب هالعجلة
وبالطريق سااااكتة مابي اعصبه لانه معصب خلقه شايفني تأخرت بالحيل
مشينا من البيت سبع وعشر .. وبالطريق كانت المفاجأة !!
على الخط السريع زحاااااااااااااااام السيارات واااقفه من الزحااام
انا خفت من شفت هالزحام قلت هالحين الوالد اكيد بيقول بنفسه بيروح عليها مشوار اليوم وهي زودتها بالتأخير
والله السياره واقفه وابوي طرطع زيادة ماشين من اول الصبح وبرضه النكد ورانا ورانا !!
احاول انسي نفسي بالواقع المرير نزلت الكتاب من الكيس ابي اتسلى عليه .. تبوني اقلكم وش اسم هالكتاب ؟
أبشروا عيوني لكم حوائياااتي هههه
كتاب سلمان العودة اسمه (بناتي ) وهـ وش حليله امتص احزاني هالكتاب
وشوي الا ابوي يناظر من الدريشه اللي عندي يبي يغامر ويجي على المسار الأسرع .. يوم شفت العلم انتفخ نزلت هالكتاب منشان مااضايقه ويناظر براحته للسيارات
وحنا مره بالمسار اليمين ومره يمشي الزحام ومره يوقف
بالاخيييييير مشت السيارات وكالعادة نلقى السبب اللي موقفين الناس لاجله تااافه .. عطلوا الخلق بسبب سيارتين حكت في بعضها وكل واحد يتصل ومدري وشو
وعاد راحت هالسيارات وتفرقت كل واحد راح لحال سبيله
والوالد يحاول يعوض هالوقفه بالسرعه يسررررع ثمن فجأه يفرررمل .. تذكرت الملاهي وقطار الموت :32:
وربي كنه يلعب بالسياره .. مره يسرررع وشوي ينقص السرعه وشوي يثبت ع السرعة وشوي ينقص يعني السيارة صايرة تراقص !
ويالله يالله وصلنا للبنك الساعة ثمان ونص الا والبنات جالسين قدام الباب على الدرج !!
قبل ماانزل قال لي الوالد : لااوصيك خذي اول الارقام وطامري معهم نبي نخلص من هالمشاوير اللي كسرت ظهورنا
نزلت عندهم قالوا لي حنا من الساعة سبع هنا !!
يالطييييييف وش ذا !! مومعقول !!
هو يفتح تسع ونص وانا جايه قبل مايفتح بساعه كامله وهم جايين من سبع !!
وكل شوي يكثر عدد البنات .. مره تجي عجوز ومره دفعة بنات ..
وحنا منظرنا بالشارع كننا مساكين وربي مذلة مابعدها
والشمس على روسنا والحر
جاء حارس الامن يبي يدخل غرفته قال :طريق طريق اجلسوا هناك (يقصد الرصيف ) ممنوع هنا !!
وربي فشيلة وش ذااا
والسيارات تمر يناظرون فينا العالم متكدسين قدام الباب
وشوي تجي سيارة نزلت وحده قالت لو سمحتوا طريق واضح انها موظفة قام فتح لها الحارس الباب جيت ابدخل قال ممنوع مو هالحين باقي ماجات الساعه تسع ونص
اناظر بالساعه 9 يالله تعبنا من الوقوف !!
وربي واقفين جنب بعض كتفي بكتف اللي بجنبي
وشوي جوالي يتصل الوالد .. ايه يبه .. قال : اذا فتحوا الباب طامري بسرعه وخذي رقم لااوصيك
قلت مايحتاج يبه وربي خجلت من حارس الامن ملصقين عند غرفته من الزحام
وحده من الحريم جايبه ولدها الصغيرون واقف معها بالزحام .. سألها ماما احنا وين ؟ قالت : احنا بـ معركة !! خخخخ
أي وربي لو المعركة ع الاقل بنكون شهيدات .. لكن ذا شهيدات من اجل دنيا وفتات رزق مايسوى شي !
وشوي يطلع حارس الامن مجموعه اوراق صغيرة بها ارقام
وعاااد شوفوا البنات كيييييف
وربي كأنها صدقه !!
قال : لحظه .. ! من جات اول وحده ؟لو سمحتوا شوي شوي !!
قالت وحده : انا جايه من سبع .. قال : اكيد ؟ قالت ايه >> إنقلب تحقيق
سألها من جاء بعدك : قالت هذه ..تأشر على وحده جمبها
وانا عيوني تسذا (:eek: ) خفت تروح علي الارقام
قال من بعد ؟
يالطيف ليه يسألها ؟ اصلآ البنات ماخلوا له مجال يآخذ راحته بالاسئله .. هجووووم يمدون أياديهم أنا انا .. كل وحده انا جايه من بدري
وربي استحيييييت وانا اكلمه ..
وأخيييييرآ عطاني رقم (3)
ويقول .. بشويش .. بشويش .. يضحك على البنات ..
اللي وراي تقول : ظلم .. ليه ماتعطينا حرام .. ظلم !!
حسيت كني بمحكمة !!
وشوي الوالد يدق علي يسأل : كم رقمك ؟ خخخخ
ماابي اجاوبه وهو يبي يعرف .. قلت ثلاث .. قال : بعد شوي بيفتحون الباب اطمرني وانا ابوك واجهيهم لحد مايخلصون هالحساب وانا اقول بنفسي ابشر بسعدك يايبه
انا اكلمه ومن الزحام وطمرة البنات .. طلع خشمي من فتحة العيون حق الغطوة خخخ .. والطرحه حالتها حاله
الموضوع كله عجله بعجله .. وياليت يفتحووون الباب بس ننستر من الخلق اللي برى ..
الرجال فاتحين من تسع نفس البنك !! والحريم لازم نص ساعة على ماتروق الموظفه وتمخمخ من القهوه وتناظر شوشتها بالمرايه !
كل شوي تجي موظفة تقول طريييييييق وتخترق الزحام وتدخل الباب ويسكر وراها حارس الامن الباب
يطلع لنا برااااد من داااخل وريحة قهوه آآآآه ع المذله بس
البنات قالوا خلي الباب مفتوح نبي براد بس بدل هالحر والقرف
جات وحده من هالحريم المتمدنات واضح فيها الجرأه ..
قالت انا اشوفكم من بعيد قلت اكيد بيوزعوا فلوس لهم !
ليه مايفتحوا الباب وتدق على حارس الامن الباب وهو يناظر مستغرب قالت افتح الباب بدل مو جالسين بالشارع مايسير كذا
وهو يقول ممنوع لازم تسع ونص >>.. بالدقيقة والثانية
قالت ليه ممنوع ؟!
وتتخاصم معه تنااافخ مع الادمي
بعدين قالت له : اقول رح شوف شغلك !! انا ماكلمتك !
وش هالوقاحة !
صوتها يلعلع قدام الرجال .. وهالحارس المسكين عبد مأمور
وحده كلمتها قالت استهدي بالله ..
جالسه تقول : أنا راحت سيارتي .. الا كان رحت البيت !
وكل شوي نسأل عن الوقت .. واناظر بساعتي الوقت صار ثقيل مع الوقفه بالشمس والحر
باقي على مايفتح الباب 3 دقايق
بسرررعة عدلت الطرحه والغطوة
اناظر ابوي يسولف مع شايب وكل شوي يناظرني يأشر لي بيده ويرفع حواجبه >> يعني لااوصيك اطمرني واهجمي خخخخ
وبدأ العد التنازلي .. الى ان فتح الحارس الباب
وهجوووم .. أكثر من كذا
وربي بغيت اتعثر واطيح اسمع اللي وراي تقول بسم الله >> خافت علي اطيح:eek:
وصية الوالد ماراحت سدى :32:
دخلنا لقينا الموظفات مروقات جالسات ع الكرسي الدوار والهواء البارد والقهوه والمويا البارده .. وحنا برى ماعبرونا ع الاقل يحطون لنا كراسي ع الاقل نحس بالانسانيه
دخلنا لقينا موظفه تسد النفس معبسه .. قالت حسب الارقام
ينادون وين رقم واحد .. راحت عند موظفه تعبي اوراق طولت مررررره جلست اكثر من ربع ساااعه
بعدها جات رقم اثنين واخذت عشر دقايق يمكن
وشوي جاء رقمي وقلبي يقرقع من الفرح
واروووح يم الموظفه قالت : مرحبا بك في بنك الراجحي
عطتني اوراق اوقع فيها وش كثرها
وهي تسأل انتي موظفه قلت لاغير موظفة عاطله>> الاجابه جاهزه بس انتم عطونا وجه
وكل شوي تطلع لي ورقه تطلبني اوقع فيها
ورقه اوقع فيها توقيعين وورقه اوقع فيها توقيع
المهم يمكن وقعت عشرين توقيع !!
وهي كل وقتها تقربع بأزرار الكيبورد وعيونها بالشاشه سريعه مررررره لدرجة توقعت انها بتغلط بالبيانات من شدة سرعتها وشوي تقوم بسرعه من الكرسي الدوار ويتحرك الكرسي بعدها يآخذ كم لفه
باااين عليها سنعه بالحيل
.. شوي الاتنادي رقم اربعه !! ماقالت لي خلصتي مابشرتني اهيء اهيء>> مبققه فيها
قلت خلصت قالت ايه ..
ثم قالت : لازم تودعين بحسابك اقل شيء الف ريال والا بنسحب كل شهر ريالين ونص !!
ولازم يتحرك الحساب كل ست شهور !
وانا ابي اتاكد منها .. ارجع اسالها وتجاوبني
ثم اطلع دوغري على الباب مريت ع الاستقبال سألتهم ابي بطاقة صراف .. قالت : الجهاز عطلان .. فيه فرع جديد .. قامت توصفني مكانه .. اناظر بالساعه 10 ونص
طلعت لقيت الشايب جالس مع واحد مفرشين على الرصيف بظل البنك
طلعت والوالد مبسوط .. قلت يبه الصرافه ماطلعوها ..ثم وصفته بالفرع الجديد
قال : بس هالحساب افتكينا منه .. والله يعين على البقية
وقبل مايحرك السيارة .. قلت الا وش رايك يبه نروح عند قسم الرجال كود انهم يخرجون لنا بطاقه ازين من تعقيد النسوان :eek:
نبي نجرب قبل مانطلع .. ناظر بالاوراق وهو متردد .. قال أجل توكلنا على الله .. دخلت معه قسم الرجال مستحيه بالحيل ماغير ادودل براسي ..
والله ماشاء الله لازحام ولاشي
يمكن اربع رياجيل جالسين بالكراسي وموظفين بالاستقبال
رحنا عند الاستقبال على ماخلص اللي قبلنا
سألهم الوالد .. قال الموظف : لامو من عندنا روح القسم *******
قلت بنفسي .. آآآه لازم من نون النسوه المعقدين الله يعين عليهم >> متعقدة منهم بالحيل نفسي عافت طاريهم
ماشاء الله جاوب الموظف لأبوي بسهوله بدون لكاعة
وجالس يوصفه بفروع قريبه .. قلت يحليلكم يالرياجيل ليت امورنا تمشي بسهاله مثلكم
ونمشي على الفرع القريب .. حسب التوصيف .. مالقاه
وقف السياره على جنب .. ثم سأل .. الين ماتوصل للحقيقه خخخخ
كل واحد يقول وصف لحاله
ثم شوي يناظر بالطريق .. الا واحد بالعربه يبيع جح .. دق له بوري ثم نزل شرى له واحده >> يبي ينسى مشوار المرمطة
نلفلف الى ماوصلنا للفرع الجديد ثم نزلت للبنك و علطول للإستقبال اطلبها بطاقة صراف .. قالت عندك حساب قلت ايه قالت وشهي هويتك قلت بطاقة احوال
قالت سجلي اسمك .. ثم هي سجلت اسمي
فرحت حسيت انهم ان شاء الله بيعطوني قالت اجلسي انتظري .. قلت وحنا وش ورانا غير الانتظار !
مالقيت مكان اجلس الحريم زحااام
واللي واقفه بولدها واللي ببنتها النونو
وانا كل شوي انتظر ينادون اسمي
حسيت ان الموضوع طول .. قمت رحت لها قلت انا انتظركم تنادون ابي اطلع صرافة قالت : النظام خرب من شوي ..
خذي هالرقم دقي علينا الساعة باكر الساعة تسع نخبرك اذا تصلح تعالي بسرعه .. واسمك عندنا ..
قلت بنفسي يااافرحه ماتمت .. يعني فينا فينا هالمشاوير !
رحت دقيت ع الوالد لقيته ينتظرني بمحطه قريبه قال انا موقف السياره بظل المحطة !
رحت يمه .. قال لي مبروك يابيتي .. قلت : لاتعجل يبه ..مابعد قضينا !!
قالوا .. خرب النظام ! :eek:
قال : الله يعين .. ونتوجه على البيت
بالطريق .. جالس يحكي لي وش صار معه لما طلعت
قال : يابنيتي انا حاس اني جيعان .. قلت خلني اشوف هالكيس اللي جابته غيداء ابشوف وش فيه
لقى فيه كتابي اللي جبته .. ولقى كيس ابوفروة خخخخ جالس يضحك .. قال كليت منه حبتين :22:
قلت الكيس واللي فيه فداك يبه .. وانا جايبته لعيونك ادري انك تحبه مثلي ..:32:
وعلى ماوصلت البيت .. مكروفة حدي..اشغل المكيف .. انزل عباتي .. انفض فراشي .. اتمدد .. ظهري احسه انكسر وربي الم فضيع كني طحت من جبل عالي !
وننتظر باتسر .. اذا ربي كتب لنا حياة .. ابكتب لكم المرمطة اللي تنتظرني ويارب تتيسر لي بطاقة الصراف وينفتح لي موقع حافز الخايس خربااان له اسبوع وانا احاول عطلان مااعرف اشغله من قوقل كروم !!
والسموحة خواتي ان صار لي شي ولاشي وانا باقي ماكملت معاناتي مع مهزلة حافز وربي اكتب لكم شيء من اللي صار وانا ظهري منجز ورجيلاتي متكسرة !!
يالله من فضلك يارب
ياقلبي علييييييييييييك.. احمدي ربك انتي ارسلولك عطووك وجه.. انا للحين لا حس ولا خبر..
بس ان شاء الله تضبط كل امووووووورك..
وننتظرك بالجزء الثالث والاخير ان شاء الله عشان ترتاحين انتي وشايبك..